RFL
Kigali

Arsenal yatsinzwe umukino wa kabiri muri Premier League 2020/21 isubira inyuma ku rutonde -AMAFOTO

Yanditswe na: SAFARI Garcon
Taliki:17/10/2020 20:45
0

Nyuma y'umukino Arsenal yatsinzwemo na Liverpool 3-1, yongeye gutakaza undi mukino muri Premier League 2020/21, ubwo yatsindwaga na Manchester City yari mu rugo igitego 1-0, bituma imanuka ku rutonde rwa shampiyona, aho ubu yicaye ku mwanya wa gatanu n'amanota 9 mu mikino 5.



Uyu mukino wabereye ku kibuga Etihad cya Manchester City, wasifuwe n'umwongereza Chris Kavanagh w'imyaka 35.

Umukino watangiye amakipe yombi anganya imbaraga mu kibuga hagati ariko Manchester City ikaza imbere mu guhererekanya neza byanatumye ibona corner ebyiri zikurikiranye ku munota 12, nyuma yuko Mahrez ahinduye umupira mwiza kwa Aguero, myugariro wa Arsenal Gabriel awohereza muri Corner.

Amakipe yombi yakomeje gukina acungana, ariko ku munota wa 23 abakinnyi ba Arsenal bararangara, Sergio Aguero azamukana umupira awucomekera Phil Foden atera ishoti rikomeye mu izamu rya Leno awukuramo, Raheem Sterling awusubizamo atsinda igitego cya mbere cya Manchester City.

Nyuma yo gutsinda igitego, Manchester City yakomeje gusirisimba imbere y'izamu rya Arsenal ishaka igitego cya kabiri ariko ubwugarizi n'umunyezamu Leno bagenda birwanaho.

Ntabwo Arsenal yacitse intege kuko yakomeje gushakisha aho yamenera ngo yishyure igitego cyane cyane binyuze ku mipira yatangwaga na Bukayo Saka, Aubameyang na Willian, ariko uburyo bagerageje ntibwabahira.

Iminota 45 y'igice cya mbere yarangiye igitego cya Sterling ari cyo gitandukanya amakipe yombi.

Arsenal yagarutse mu gice cya kabiri yahinduye imikinire, dore ko yasatiriye cyane izamu rya Manchester City, irusha Manchester City guhererekanya neza hagati mu kibuga, ibona uburyo butandukanye bwo kwishyura igitego ariko ntibwabyazwa umusaruro.

Ku munota wa 69, umutoza  Arteta yakoze impinduka, avana mu kibuga Willian hajyamo Alexandre Lacazette, Pepe asohoka mu kibuga hinjira  Edward Nketiah, mu gihe Thomas Partey yasimbuye Granit Xhaka.

Ilkay Guendogan ku ruhande rwa Manchester City yinjiye mu kibuga asimbuye Sergio Aguero, Phil Foden yasohotse mu kibuga hinjira Fernandinho.

Arsenal yakomeje gukora ibishoboka byose ngo yishyure igitego yatsinzwe ariko biranga, iminota 90 y'umukino irangira itakaje amanota atatu nyuma yo gutsindwa na Manchester City 1-0.

Gutsinda uyu mukino byatumye Manchester City izamuka ku rutonde rwa shampiyona aho yavuye ku mwanya wa 14, kuri ubu ikaba iri ku mwanya wa 10 n'amanota 7.

Man City XI: Ederson, Walker, Dias, Ake, Joao Cancelo, Bernardo Silva, Rodri, Foden, Mahrez, Aguero, Sterling

Arsenal XI: Leno, Bellerin, David Luiz, Gabriel, Tierney, Ceballos, Xhaka, Saka, Willian, Pepe, Aubameyang

Sterling ni we watsinze igitego cyatandukanyije impande zombi


Abakinnyi ba Manchester City bishimira igitego cya Sterling

Ceballos ahanganye na Sterling

Bukayo Saka yakinnye umukino mwiza

Arteta na Guardiola baramenyeranye cyane kuko barakoranye muri Man.City

Thomas Partey yagaragaye mu mukino we wa mbere akinira Arsenal






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND