RFL
Kigali

Amakipe 10 y'umupira w'amaguru muri Afurika akize cyane kurusha ayandi mu 2020

Yanditswe na: ISHIMWE Olivier Ba
Taliki:15/10/2020 13:29
0

Umupira w'amaguru ni wo mukino ukunzwe n'imbaga nyamwinshi haba muri Afurika ndetse no ku isi muri rusange. Amakipe menshi aharanira gutwara ibikombe, gutsinda imikino myinshi ariko byose uko biba burya bikurikirwa n'amafaranga. Ese waba uzi ikipe iza ku mwanya wa mbere mu makipe akize muri Afurika?



Muri Afurika haba amashampiyona asaga 55 kandi arimo amakipe atandukanye ni yo mpamvu tugiye kurebera hamwe ku mugabane wose amakipe 10 akize kurusha ayandi.

10. Mouloudia Club d'Alger


Mouloudia Club d'Alger uzakunda kubona bayise MC Alger. Ni ikipe ikina shampiyona y'igihugu cya Algeria ikaba yarashinzwe mu 1921 yitwa Mouloudia Chaabia d'Alger. Muri iki gihe imaze cyose ni imwe mu makipe yitwara neza muri iki gihugu ikaba ibarirwa amadorari miliyoni 10.

9. L'Esperance Tunis


L'Esperance Tunis ni ikipe ikina icyiciro cya mbere muri Tunisia abenshi murayizi kuko yigeze no kuza gukina mu Rwanda. Iyi kipe yashinzwe mu 1919 ikaba ifite ibikombe 48 bikinirwa muri Tunisia ikanagira ibikombe 12 mpuzamahanga. Kuri ubu iyi kipe ibarirwa ku bukire bwa Miliyoni 11 z'amadorari. 

8. TP Mazembe


Tout Puissant Mazembe ni yo kimpe ihagarariye izindi muri aka karere ka Afrika y'Iburasirazuba, ikaba ikina icyiciro cya mbere muri Repubulika Iharanira Demokarasi ya Congo. Mazembe yashinzwe mu 1939 ubwo yitwaga FC Saint-Georges, ubu ikaba iyobowe n'umuherwe witwa Moise Katumbi. Kuva mu 1939, iyi kipe imaze gutwara ibikombe 36 bituma iba ikipe ikomeye muri Congo. Mazembe kandi ibarirwa ku gaciro ka Miliyoni 11 z'amadorari.

7.Wydad Casablanca


Abantu benshi bayandika nka WAC ikaba ikina icyiciro cya mbere cy'umupira w'amaguru muri Marocco. Kuva   mu 1937 iyi kipe yashingwa, imaze gutwara ibikombe 2 bya Champions League igikombe kimwe cya CAF Cup Winners ndetse n'ibikombe 20 bya shampiyona ya Marocco.  Wydad Casablanca mu 2020 iri kubarirwa mu gaciro ka Miliyoni 12 z'amadorari.

6. Orlando Pirates


Orlando Pirates ikina icyiciro cya mbere cy'umupira w'amaguru muri Afurika yepfo. Ubwo iyi kipe yashingwaga mu 1937 yitwaga Orlando Boys Club. Pirates na Mamelodi Sundowns nizo kipe muri Afurika y'Epfo zifite agahigo ko gutwara igikombe cya Champions League yegukanye mu 1995. Pirates kandi ikaba ibarirwa agaciro ka Miliyoni 15 z'amadorari.

5. Zamalek Sporting Club


Zamalek nayo ni iyo mu gihugu cya Misiri yashinzwe mu mwaka 1911 bayita Qasr El Nile Club. Zamalek ifite ibikombe 5 bya Champions League ibikombe 4 bya CAF Super Cup. Ikaba ibarirwa agaciro ka Miliyoni 18 z'amadorari.

4. Club Africain


Club Africain ibarizwa muri Tunisia ikaba yarashinzwe mu 1920. Umutoza wayo mukuru yitwa Lassaad Dridi ndetse ikaba yakirira imikino yayo kuri Stade Olympique de Radès. Ikipe iza ku mwanya wa 4 mu makipe akize muri Afurika ibarirwa agaciro ka Miliyoni 20 z'amadorari.

3. Pyramids FC


Ikipe dusanga ku mwanya wa gatatu ni ikipe ya Pyramids FC yo mu Misiri. N'ubwo iza kuri uyu mwanya ariko ni ikipe yashinzwe vuba kuko yavutse mu 2008 yitwa Al Assiouty Sport nyuma yaje kwitwa Pyramids mu 2018 kubera ko icyo gihe yari fashwe n'undi muntu. Pyramids ni ikipe iri gushorwamo amafaranga cyane bituma kuri ubu ibarirwa agaciro ka Miliyoni 22 z'amadorari.

2.Kaizer Chiefs


Imwe mu makipe akomeye muri Afurika y'Epfo yashinzwe mu 1970. Kaizer Chiefs imaze gutwara ibikombe bisaga 50 ikagira agahigo ko kuba ibarirwa abafana basaga Miliyoni 16 bituma iba imwe mu makipe afite abafana benshi muri Afurika. Mu 2020 iyi kipe ibarirwa Miliyoni 23 z'amadorari.

1. Al Ahly SC


Al Ahly niyo kipe ishora amafaranga menshi mu mpano z'abakinnyi. Iyi kipe ya Al Ahly yakirira imikino yayo mu mujyi wa Misiri i Cairo. Iyi kipe iyoboye urutonde rw’amakipe akize muri Afurika, ni imwe mu makipe akuze kurusha ayandi kuko yashinzwe mu 1907. 

Al Ahly SC ifite ibikombe 8 bya Champions League, ibikombe 6 bya CAF Super Cup. Mu mwaka wa 2001 Al Ahly yatowe nk’ikipe y’ikinyejana. Kubera ibikombe mpuzamahanga bisaga 20 iyi kipe ifatwa nk’iy'ibihe byose yitwara neza nyuma ya Real Madrid. Mu 2020 Al Ahly ibarirwa mu gaciro ka miliyoni 28 z’amadorari.






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND