RFL
Kigali

Covid-19: Amerika ku isonga, abatuye Isi mu rujijo! Menya byinshi ku muti n’urukingo by’iki cyorezo

Yanditswe na: Eric Misigaro
Taliki:25/06/2020 16:06
0

Leta Zunze Ubumwe za Amerika ni igihugu cy'igihangange ariko Covid-19 yakigezemo ishinga imizi. Muri Mata 2020 nibwo Amerika yatangaje ko covid-19 ishobora kuzahitana abagera ku bihumbi 100-240 muri iki gihugu. Ubu, Isi yose amaso yaheze mu kirere itegereje umuti cyangwa urukingo.



Icyorezo cya coronavirus gikomeje kuzahaza uduce tumwe na tumwe tw’Isi. Ku rundi ruhande, hari abatuye Isi bari kwibaza amarekezo y'ahazaza h’ubuzima bwabo abandi nabo bati 'igishoboka ni ugutuza tukabana nayo kuko ntaho iteze kujya'. Dr Tedros uyobora Ishami ry'Umuryango w'Abibumbye ryita ku Buzima, OMS aherutse gutangaza ko abatuye Isi basabwa gushyira hamwe kugira ngo babashe gutsinda iki cyorezo.

Covid-19 ni virusi yo mu bwoko bwa corana yatangiriye mu gihugu cy’u Bushinwa mu ntara ya Hubei mu mujyi w’ubucuruzi wa Wuhan. Iyi virusi yo mu bwoko bwa corona yahawe akabyiniro ka covid-19 kubera yadutse mu mwaka wa 2019, nyuma y'uko covid-19 igaragaye mu mpera za 2019 yaje gutangira gusakara mu ntangiriro za 2020.

Gusa ikibazo cyaje kuzamba bitewe nuko ibihugu byinshi bitigeze biyitondera cyane cyane iby'ibikomerezwa twavugamo nka Leta Zunze Ubumwe za Amerika yavugaga ko ari ibicurane ntacyo yabatwara, gusa ubu yarabahagije. Nk'uko byatangajwe n'umwe mu bategetsi ba Amerika uhagarariye ikigo kirwanya indwara z'ibyorezo yavuze ko kugira ngo iki gihugu kuyihashye basabwa gushora akayabo kangana na Tiriyali 7 z’amadorali y’Amerika.

Magingo aya, abayobozi ba Leta zimwe na zimwe mu zigize Isi bari kwibaza ikigiye gukorwa ngo barokore intama zibahanze amaso ari bo baturage barebera. Aha ni naho leta ziri guhera zifata icyemezo cy’uko buri muntu wese agomba kwambara agapfukamunwa ndetse no guhagarika ibindi bikorwa byose bidashobora gukorwa abantu bategeranye birimo; ibirori, ibiriyo, insengero, utubari, amashuri…

Nonese waba uzi ko Isi ifite ikirango kimwe(Ibendera)?

                     

Uti iri bendera rihuriweho n’Isi yose se ni irihe? Iki kirango ubu ni agapfukamunwa kabaye umwambaro ndetse benshi batangiye kwambara udutuma bagaragara neza. Hari n'abakora udufite amafiyeri n’imbirimbo itagira uko isa. Dushingiye kuri uyu murimbo wa bamwe bashakira mu dupfukamunwa hari abatangiye kumva ko bagomba kwimenyereza kubana na Covid-19 kuko nta yandi mahitamo.

Igihugu cyazahaye ndetse kiri ku Isonga ni Leta Zunze Ubumwe za America iyoborwa na Donald Trump aho gifite abagera kuri 25.8% by'abarwayi bose bari ku Isi ba Coronavirus. Magingo aya, abarwayi ba coronavirus ku Isi yose ni 9,542,451 abahitanwe nayo barangana na 485,280 naho abamaze gukira barangana na 5,186,690.  

Kuki America ndetse n’ibindi bihugu by’ibikomerezwa ari byo byazahaye?

America ni cyo gihugu kiri ku Isonga ndetse imibare iri kugaragara ntiri gutungura benshi kuko mu mezi 2 ashize iki gihugu cyarazahaye bikomeye. Kuri ubu, abarwayi ba covid-19 ku Isi, abagera kuri 25.8% bose ni abanyamerika (Bararenga kimwe cya kane cy'abarwayi bose).

Benshi bamaze no kwiyakira kuko hari inkuru yigeze guturuka mu biro bikuru by’iki gihugu aho bamwe mu bayozi ndetse n’ikipe y’inzobere zifite mu nshingano ku rwanya indwara z'ibyorezo batangaje ko hari imibare bateganya ko ishobora kuzibasirwa n’iki cyorezo.

Bwana Dr Anthony Fauci na Dr Deborah Birx batangaje ko iki gihugu nibura abantu bari hagati y’ibihumbi 100-240 bazahitanwa na covid-19, magingo aya ibihumbi bisaga 122 by’abanyamerika bakaba bamaze guhitanwa n'iyi ndwara.

Ni ikihe cyizere cyatumye iki gihugu gitangaza iyi mibare y’abantu giteganya ko bazahitanwa n’icyi cyorezo

Akenshi iyo hagiye gutangazwa imibare nteganya, hagenderwa ku mibare y’ibiri kuba ndetse n’imibare y’ibyabaye mu minsi yatambutse. Iyi ngingo ni yo America yafashe izigenderaho itangariza abaturage bayo ko abantu bagera ku bihumbi 240 bashobora kuzamburwa ubuzima n'iyi ndwara.

Ubu igihari ni uko umubare muto watenganyijwe umaze kurenga kimwe cya kabiri ari nayo mpamvu ituma benshi bavuga ko iki cyorezo kugira ngo kizashire ku Isi bigoranye dore ko amezi amaze kuba 7 hari gushakishwa umuti ariko bikaba byarananiranye kuba haboneka umuti cyangwa urukingo rw’icyi cyorezo.

Ibijyane n’umuti cyangwa urukingo rwa covid-19 byaba bivugwaho iki?Ibihugu byinshi byamye bitangaza ko bifite inkingo ndetse n’imiti biri kugerageza, gusa magingo aya, abatuye Isi benshi amaso yaheze mu kirere kuko abo biringiye ari bo bashoramali ndetse n’inzobere na leta zabo nta nkuru y’ihumure biri gutanga.

Kuri uyu munsi wa none buri umwe ku isi afite amakuru ye ku bijyanye n’igihe Covid-19 ishobora kuzaciribwa intege dore ko na bimwe mu bihugu byari byaratangaje ko byatangiye kugira icyizere cyo kuyirandura burundu hari ibyongeye gusubira mu buzima bwa Guma mu rugo' kubera ubundi bwandu bushya biri kugenda bibona, aha twavuga nk’u Bushinwa, Koreya y'Epfo, u Budage n'ibindi.

Nk'uko bamwe mu bahanga babitangaza, umuti w’iki cyorezo kuwukora bisaba kwitonda kandi ko binahenze cyane kubera haba hasabwa igeragezwa rihagije. Kuva iki cyorezo cyatera Isi, byagiye bivugwa ko hari inkingo ziri hafi ariko harimo izikorwa zageragezwa ntizikore nk'uko bisabwa bikaba intandaro yo kuzihagarika.

Dr Anthony Fauci uhagarariye ikigo cyo muri America cyitwa “The US National Institute of Allergy and Infectious Diseases (NIAID)” mu minsi yashize ni bwo yatangaje ko hari icyizere cy’umuti witwa Remdesivir wari usanzwe ukoreshwa mu kuvura Ebola, gusa byaje kurangira nacyo bitanze.

Ni iki gitangazwa n’Ishami ry’Umuryango w'Abibumbye rishinzwe Ubuzima, OMS/WHO ?

OMS/WHO’ ivuga ko magingo aya nta muti ndetse n’urukingo by’iki cyorezo bihari, gusa ikavuga ko hari inkingo ndetse n’imiti byinshi biri kugeragezwa mu mpande zose z’Isi.

Ikindi iri shami risaba abantu ni ugukomeza gukurikiza amabwiriza yo kwirinda iki cyorezo, harimo kwirinda guhurira mu ruhame, kwibuka kwambara agapfukamunwa igihe ugiye ahantu ucyeka ushobora guhura n’abantu no gukarana intoki kenshi kandi n'amazi meza.

Kuwa 22 Kamena 2020 Dr.Tedros uhagarariye OMS yavuze ko impamvu isi yananiwe gutsinda covid-19 ari uko gushyira hamwe byabananiye ndetse bigahumira ku mirari kubera ubuyobozi budafatika Isi ifite ari byo biri gutuma iyi virusi ishobora kuzahaza abatuye Isi.

Ibihugu 5 byazahajwe na Covid-19 kurusha ibindi ku Isi

1.      USA

Abarwayi: 2,462,708

Abapfuye: 124,282

Abakize: 1,040,608

2.      Brazil

Abarwayi: 1,192,474

Abapfuye: 53,874

Abakize: 649,908

 

3.      Russia

Abarwayi: 613,994

Abapfuye: 8,605

Abakize: 375,164

 

4.      India

Abarwayi: 473,719

Abapfuye: 14,907

Abakize: 271,723

 

5.      UK

Abarwayi: 306,862

Abapfuye: 43,081

Abakize: Nta mibare igaragara y’ihame

Src: WHO, wordmetrics






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND