Umunyamakuru Uwase Delphine mu gahinda ko kubura murumuna we Mwenedata Euphrate

Amakuru agera ku Inyarwanda.com avuga ko nyakwigendera Mwenedata Euphrate wari umupolisi w'u Rwanda yazize urupfu rutunguranye dore ko yanyereye mu bwogero akagwa hasi agahita ajyanwa kwa muganga ari nabwo yahise yitaba Imana. Uwase Delphine mukuru wa nyakwigendera, yanditse ati 'Iyo biba ari ibishoboka nasaba Rurema byibuze umunota umwe akakugarura nkakuvugisha." Yongeyeho ati: "Umusada uwutange mu ijuru nk'uko wawutangaga mu isi,..nzahora nkukunda."

Uwase Delphine yanditse kuri Facebook ati: "Kuki koko ugiye? RIP my lovely sister my only one I will miss you." Yaje no kwifashisha indirimbo 'Kuki wabyemeye' ya Ambassadors of Christ choir mu kugaragaza agahinda atewe no kubura umuvandimwe we, abaza Imana impamvu yemeye kumutwara umuvandimwe we ari nawe rukumbi yari afite. Kuri ubu ikiriyo kiri kubera i Rugende mu murenge wa Rusororo mu karere ka Gasabo. 

Nyakwigendera Mwenedata

Nyakwigendera Mwenedata azashyingurwa i Rusororo ku wa Gatandatu tariki 13 Mata 2019. Abo mu muryango wa nyakwigendera badutangarije ko ku wa 13 Mata 2019 Saa Mbiri zuzuye za mu gitondo ari bwo bazajya gufata umurambo mu bitaro bya Polisi bya Kacyiru, Saa Yine zuzuye habe umuhango wo gusezera kuri nyakwigendera mu rusengero rwa Methodiste Kabuga, Saa Tanu habe Misa yo gusabira nyakwigendera, hanyuma saa Munani nyakwigendera ashyingurwe i Rusororo.

Nyakwigendera Mwenedata yazize urupfu rutunguranye

Delphine hamwe n'umuvandimwe we witabye Imana azize urupfu rutunguranye

Delphine na Pasco mu kiganiro 'Himbaza',.hano bari batumiye Tonzi

Gahunda yo gusezera no gushyingura Nyakwigendera

IMANA IMUHE IRUHUKO RIDASHIRA