Kuwa Gatandatu tariki 16 Nzeli 2017 ni bwo ikipe ya Rayon Sports yatsindaga APR FC igitego 1-0 mu mukino wasozaga irushanwa ry’Agaciro Development Fund 2017. Igitego cyatsinzwe na myugariro Rutanga Eric kuri coup Franc yabonetse ku munota wa 87’. Imibare y’ibyabaye mu mukino bigaragaza ko Rayon Sports hari byinshi yagiye yitwaramo neza.
Muri uyu mukino wari ufite byinshi bisa naho bifitanye isano rinini haba ku batoza n’abakinnyi, Rayon Sports yari ifite umutwaro wo gutsinda APR FC kugira ngo haboneke amahirwe yo gutomborera igikombe nk’uko amategeko y’irushanwa yabivugaga.
Duhereye ku bigaragaza ishyaka riva ku masano y’abakinnyi n’abatoza, Karekezi Olivier utoza Rayon Sports yakinanye na Jimmy Mulisa muri APR FC banatwarana ibikombe yewe bimwe babaga batsinze mucyeba.
Dukubise akajisho mu kibuga wasangana nibura mu bakinnyi babanje mu kibuga harimo abagiye guhura bwa mbere bakinira amakipe atandukanye. Twavuga nka Yannick Mukunzi wari ugiye guhura na APR FC yabayemo imyaka umunani, Eric Rutanga yakiniraga Rayon Sports ahura na APR FC bwa mbere mu mateka ye.
Yannick Mukunzi (ibumoso) na Usengimana Faustin (iburyo)
Usengimana Faustin yongeraga guhura n’ikipe yahozemo ari mu bwugarizi bwa Rayon Sports yari yarabayemo, Ndayishimiye Eric Bakame yabaye muri APR FC ubu ni kapiteni wa Rayon Sports.
Yannick Mukunzi na Usengimana Faustin baganira imbere y'abafana bahoze bashimisha
Eric Rutanga nawe yari yaje guhura na APR FC
Myugariro Nyandwi Saddam bwari ubwa mbere agiye gukinira imbere y'abafana benshi
Ku ruhande rwa APR FC yakoreshaga Imanishimwe Emmanuel wahoze muri Rayon Sports, Bizimana Djihad nawe wayikiniye akanayivamo agana muri APR FC. Ibi byaje gutuma ishyaka ry’abakinnyi n’abatoza rizamuka ariko bihira cyane Rayon Sports kuko imibare y’umukino igaragaza ko yari hejuru gato kuri APR FC.
Muri uyu mukino, Rayon Sports yateye amashoti atatu (3) agana mu izamu mu gihe APR FC nta shoti na rimwe (0) yabonye. Ibi bivuze ko ikipe ya Rayon Sports yari ifite ubusatirizi bukora kurusha APR FC.
Rayon Sports kandi yateye amashoti atatu (3) aca hanze y’izamu mu gihe APR FC yabonye amashoti abiri (2) gusa , ibi byumvikanisha ko ikipe ya Rayon Sports yagize ukugerageza kwinshi kurusha APR FC mu kijyanye no gupima amahirwe y’igitego.
Ikipe ya Rayon Sports yateye koruneri esheshatu (6) mu gihe APR FC yateye koruneri ebyiri (2) mu minota 90’. Iki nacyo ni ikimenyetso cyiza kigaragaza ko ikipe ya Rayon Sports yari ifite imbaraga nyinshi zituma isatira ubwugarizi bwa APR FC bityo bakarenza imipira ku gitutu.
Ikipe ya APR FC ahantu yitwaye neza mu mukino nuko yakoze amakosa 11 kuri 12 ya Rayon Sports. Nubwo byaje gusa naho bibaye imfabusa kuko Hakizimana Muhadjili wa APR FC yaje guhabwa ikarita itukura ku munota wa 62’ w’umukino.
APR FC kandi yatahanye amakarita atatu (3) y’umuhondo mu gihe Rayon Sports yahawe amakarita atanu (5) y’umuhondo. Ibi bivuze ko muri uyu mukino ikipe ya Rayon Sports ari yo yari ifite ibyago byo kuba umunota uwo ariwo wose yari guhabwa ikarita itukura.
Mu kugumana umupira igihe kinini mu kibuga nta mukinnyi wa APR FC ukoraho, ikipe ya Rayon Sports yabikoze ku mpuzandengo ya 55% mu gihe APR FC yabigerageeje ku kigero cya 45%.
Muri gahunda yo gusimbuza, Sinamenye Cyprien yasimbuye Twizerimana Martin Fabrice (46’), Tuyishime Eric asimbura Sekamana Maxime (55’) naho Nshuti Innocent asimbura Issa Bigirimana ku ruhande rwa APR FC naho muri Rayon Sports, Bimenyimana Bonfils Caleb yasimbuwe na Nahimana Shassir (62’), Nova Bayama asimbura Muhire Kevin (75’).
Imbaraga zo gusimbuza zatanze umusaruro ukomeye ku ruhande rwa Rayon Sports kuko coup franc babonye yavuye kuri Nahimana Shassir wakoreweho ikosa ubwo yari ashatse kwinjira mu rubuga rw'amahina akabangamirwa na Rugwiro Herve. Nahimana Shassir yari yinjiye mu kibuga ku munota wa 62' asimbura Bimenyimana Bonfils Caleb. Ibi bitanga ubutumwa ko intebe y'abasimbura ya Rayon Sports ikungahaye cyane kurusha iya APR FC kuko iyo APR FC isimbuje akenshi izana abakinnyi bakiri bato mu gihe Rayon Sports uwuvuyemo ashobora gusimburwa n'uwumuri hejuru.
Abakinnyi babanje mu kibuga:
Rayon Sports XI: Ndayishimiye Eric Bakame (GK-C1), Nyandwi Saddam 16, Rutanga Eric 3, Manzi Thierry 4, Usengimana Faustin 15, Yannick Mukunzi 6, Niyonzima Olivier Sefu 23, Manishimwe Djabel 8, Muhire Kevin 11, Bimenyimana Bonfils Caleb 7 na Tidiane Kone 19.
APR FC XI: Mvuyekure Emery (GK,1), Rukundo Denis 28, Imanishimwe Emmanuel 24, Rugwiro Herve (C-4), Nsabimana Aimable 13, Twizerimana Martin Fabrice 6, Bizimana Djihad 8, Nshimiyimana Imran 5, Sekamana Maxime 17, Hakizimana Muhadjili 10 na Issa Bigirimana 26.
Iyo urebye mu bakinnyi babanje mu kibuga ubona ko ku ruhande rwa Rayon Sports ariho bazakora impinduka ku mukino wa Super Cup kuko Kwizera Pierrot aramutse nta kibazo afite azabanza mu kibuga bitume Niyonzima Olivier Sefu asubira ku ntebe y’abasimbura. Ku ruhande rwa APR FC bitewe n’umubare w’abakinnyi bafite ubunararibonye bafite nk’abasimbura bigaragara ko nta mpinduka nyinshi bazakora mu gihe aba babanjemo ntawaba yagize ikibazo.
Andi Mafoto....
APR FC igera mu marembo ya sitade Amahoro
Rayon Sports bagera kuri sitade
Didier Bizimana (ibumoso) na Jimmy Mulisa (iburyo)
Ikirango cy'irushanwa gisohoka
Igikombe cy'AGACIRO 2017 giteruwe
Bimaze kumenyerwa ko Rugwiro Herve ariwe kapiteni wa APR FC
Rugwiro Herve Amadeurs ateruye umwana uba uri kumwe na kapiteni
Nshimiyimana Imran ateze amatwi inama za Didier Bizimana ufite byinshi azi ku mukino uhuza amakipe yombi
Hakizimana Muhadjili
Rukundo Denis myugariro wa APR FC wakinaga umukino we wa mbere ahanganye na Rayon Sports
Uva ibumoso: Lomami Marcel ushinzwe ingufu z'abakinnyi, Nkunzingoma Ramadhan utoza abanyezamu, Ndikumana Hamad Katauti umutoza wungirije na Karekezi Olvier umutoza mukuru muri Rayon Sports
Min.Uwacu Julienne ayoboye abandi banyacyubahiro mu gusuhuza abakinnyi
Rwatubyaye Abdul nawe yaciye muri APR FC nubwo atakinnye uyu mukino
Mu mateka ye Karekezi Olivier hazahoramo ko umukino wa mbere yahuyemo na APR FC yayitsinze
Mukunzi Yannick anywa amazi
Umunota wo kwibuka Mutuyimana Evariste
Ishyaka rya Niyonzima Olivier Sefu
Yannick Mukunzi agenzura umupira hagati mu kibuga
Karekezi Olivier na Jimmy Mulisa batanga amabwiriza
Rutanga Eric munsi ya Hakizimana Muhadjili bahoranye
Hakizimana Muhadjili hagati y'abakinnyi bahoze babana muri APR FC
Ni umukino uba wiganjemo kuregana cyane
Karekezi Olivier umutoza mukuru wa Rayon Sports
Nshimiyimana Imran arebana na Tidiane Kone
Abakinnyi ba Police FC bari bumiwe hejuru muri sitade ubwo bari bamaze gutsindwa na AS Kigali
Abafana
Ibyaranze umukino wa APR FC na Rayon Sports
Nyandwi Saddam myugariro wa Rayon Sports yugarira Hakizimana Muhadjili
Hakizimana Muhadjili asohoka nyuma y'ikarita itukura
Ni umukino usaba ko abakinnyi bashyira hamwe imbaraga
Mbere yuko Eric Rutanga atera coup franc yabyaye igitego
Rwarutabura yishimira igitego
Usengimana Faustin areba abafana ba APR FC
Ibyishimo birahenda bityo rero iyo bibonetse abantu barirekura
Sugira Ernest yamanutse mu kibuga ashimira abakinnyi ba Rayon Sports
Agaseke ka tombola
Ndayishimiye Eric Bakame amaze gutombola yarirutse abafana bahita bamenya ko Rayon Sports itwaye igikombe
Nyandwi Saddam afashe urupapuro rwabahaye igikombe
Ntamuhanga Thumaine Tity, Rwatubyaye Abdul na Nshutinamagara Isamael Kodo baganira
Usengimana Faustin agaramanye umudali
Usengimana Faustin yasubiye muri Rayon Sports ahurirana n'igikombe
Nyandwi Saddam yumva uko igikombe kimera
Rwarutabura abaza Manishimwe Djabel ati"Ese ko wowe utishimye bite"?
Igikombe cyabonye nyiracyo
AMAFOTO: Saddam MIHIGO-Inyarwanda.com
TANGA IGITECYEREZO