Peace Cup 2017: Police FC idafite Seninga irasura Gicumbi FC kuri uyu wa Gatandatu (Indi mikino)

Seninga Innocent watangiye gutoza iyi kipe mu mwaka w’imikino 2016-2017 yagize ikibazo cy’uburwayi ubwo bari mu myitozo bategura umukino wa Gicumbi FC  bakinnye kuwa Gatatu tariki 10 Gicurasi 2017 bakaza no kuwutsinda babifashijwemo na Mico Justin wababoneye ibitego bibiri (2).

Bisengimana Justin umutoza wungirije niwe wari watoje uyu mukino ahura na Gicumbi FC yahize atoza.

IKipe ya Police FC ibura Seninga Innocent izaba ifite abakinnyi basanzwe bitabazwa uretse Neza Anderson umaze igihe urwaye. Ndatimana Robert na Twagizimana Fabrice bita Ndikukazi bose barakize ndetse banakinnye imikino ine iheruka.

Ku kibuga cy’i Gicumbi, Police FC izaba isabwa kurinda izamu ryayo inarebera hamwe uko yakongera umubare w’ibitego nubwo bitajya biyihira kuko umukino wa shampiyona uheruka bahanganyirije 0-0.

Mu yindi mikino izakinwa mu mpera z’iki Cyumweru, ikipe ya APR FC iheruka kugwa miswi na Sunrise FC, izaba iyakira kuri sitade Amahoro saa cyanda n’igice (15h30’).

Undi mukino ukomeye uzakinwa, ni uwo Rayon Sports igomba kwakiramo FC Musanze kuri sitade Amahoro ku Cyumweru saa cyenda n’igice (15h30’). Umukino ubanza, Rayon Sports yatsinze FC Musanze ibitego 2-1 kuri sitade Ubworoherane.

Kiyovu Sport yatsinzwe na FC Marines igitego 1-0 mu mukino ubanza wabereye i Rubavu, iraba ifite urugamba rutoroshye kuri uyu wa Gatandatu ku kibuga cya Mumena saa cyenda n’igice (15h30’) aho isabwa gutsinda umukino kugira ngo ikomeze muri ¼ cy’irangiza.

Imikino ya 1/8 cy’irangiza izasozwa kuwa Mbere tariki 15 Gicurasi 2017 ubwo AS Kigali izaba yakira Mukura Victory Sport kuri sitade ya Kigali. Umukino ubanza AS Kigali yatsinze Mukura Victory Sport ibitego 2-0.

Dore uko imikino ya 1/8 iteye:

Kuwa Gatandatu tariki 13 Gicurasi 2017

*APR Fc vs Sunrise Fc (Amahoro Stadium, 15:30)
*SC Kiyovu vs Marines Fc (Mumena, 15:30)
*Amagaju Fc vs La Jeunesse (Nyagisenyi, 15:30)
*Bugesera Fc vs AS Muhanga (Bugesera, 15:30)
*Gicumbi Fc vs Police Fc (Gicumbi, 15:30)

 Ku Cyumweru tarikii 14 Girurasi 2017

*Rayon Sports vs Musanze Fc (Amahoro Stadium, 15:30)
*Espoir Fc vs Etincelles Fc (Rusizi, 15:30)

Kuwa Mbere tariki 15 Gicurasi 2017

*AS Kigali vs Mukura VS (Stade de Kigali, 15:30)

Mico Justin niwe watsindiye Police FC ibitego bibiri

Bisengimana Justin umutoza wungirije niwe wari ufite ikipe kuko Seninga yari yaraye afashwe n'indwara

Seninga Innocent ubwo yatozaga Police FC itsinda Kiyovu Sport ibitego 2-1 ku munsi wa 26 wa shampiyona

Ndatimana Robert wari umaze igihe adakina muri iyi minsi ahagaze neza hagati mu kibuga

Twagizimana Fabrice bita Ndikukazi kapiteni wa Police FC nawe  kuva yagaruka mu kibuga bakina na United Stars bigaragara ko ahagaze neza