Bishop Nkurikiyumukiza Jean de Dieu n’abandi bapasiteri babiri barashinjwa gutekera imitwe umugabo witwa Christopher bakamurya amafaranga bamubwira ko hari ibintu bamuteze mu buriri bwe kandi ari bo bari babishyizemo, bakamubwira ko yabaha amafaranga bakajya kubijunya muri Uganda.
Amakuru agera ku Inyarwanda.com avuga ko magingo aya aba bapasiteri uko ari batatu bari mu maboko ya polisi kuri station ya polisi ya Kicukiro ndetse bakaba bamazemo iminsi. Amakuru dufite ni uko ko bari kwemera icyaha bashinjwa.Bishop Nkurikiyumukiza Jean de Dieu nyuma yo kuva mu itorero Umusozi w'Ibyiringiro, kuri ubu bivugwa ko nta torero afite abarizwamo nkuko Inyarwanda yabitangarijwe n'umwe mu bapasiteri b'inshuti ze za hafi utifuje ko dutangaza izina rye.
Inyarwanda.com yagerageje kuvugana n’umuvugizi wa Polisi mu mujyi wa Kigali, SP Emmanuel Hitayezu kugira ngo tumubaze ku itabwa muri yombi ry'aba bapasiteri ntitwabasha kumubona kuri terefone ye igendanwa.
Uko ikibazo giteye:
Bishop Nkurikiyumukiza Jean de Dieu uzwi cyane ku izina rya Imanizabayo wahoze akorera mu itorero Umusozi w’ibyiringiro rikuriwe na Apotre Liliane Mukabandege, ubu butekamitwe ashinjwa yari abufatanyije na Pastor Siriyake n’undi mupasiteri tutabashije kumenya izina rye ndetse na Bishop Imanizabayo avuga ko atamwibuka izina. Benshi mu bapasiteri twabajije uyu mupasiteri wa gatatu tukabereka ifoto ye, bavuze ko batamuzi.
Tariki 15 Mata 2017 ni bwo aba bapasiteri bagiye i Kabuga gusengera umuntu witwa Christopher bagenda bitwaje ibintu mu mifuka bamubwira ko hari ibintu abanzi be bamuteze biri mu buriri. Abo bapasiteri bagezeyo ngo bashyira mu buriri bya bintu bari bitwaje, barongera babikuramo, bamubwira ko bazajya kubijugunya muri Uganda. Icyo gihe bamwatse itike, abaha amafaranga 180.000 Frw barayarya. Nyuma yaho baje gusubirayo bajyanye ibindi bintu arabafata.
Bishop Imanizabayo nyuma yo gutabwa muri yombi na Polisi, yasabye imbabazi ndetse yemera icyaha yakoze nk’uko amakuru bir mu ijwi rye Inyarwanda.com twabashije kubona. Yakomeje avuga ko atazongera ubwo butekamitwe. Yasabye imbabazi Christopher ndetse avuga ko atazongera guhemukira igihugu. Bishop Imanizabayo mu gusaba imbabazi nkuko amakuru twahawe abivuga, yagize ati:
Nkurikiyumukiza Jean de Dieu ndemeza ko nahemukiye Christopher n’umuryango we, twagiye gusengera mu rugo rwe tugakura ibintu muri matora ari ukumubeshya twabitwaye, hari ku itariki 15 Mata 2017 hanyuma tunavuga ko tugiye kubijugunya muri Uganda, aduha itike. Ndasaba imbabazi ko bitazasubira. Twasubiyeyo tariki 19, njyewe ubwanjye njya muri parafu mvuga ko mbikuyeho hari ibyo twatwaye, ndasaba imbabazi Christopher n’umuryango we. Nari kumwe na Pastor Siriyake. Ndasaba imbabazi ko bitazongera, sinzi icyabinteye sinzongera ukundi ndashaka gukorera Imana nkiranutse, bansabire imbabazi Christipher kandi no guhemukira igihugu sinzasubira ukundi.
Inyarwanda.com yagerageje kuvugana na Apotre Liliane Mukabadege ngo tumubaze ku bivugwa kuri Bishop Imanizabayo wahoze ari umwe mu bapasiteri bafatanyaga kuyobora itorero Umusozi w'Ibyiringiro, ntitwabasha kumubona kuri terefone ye igendanwa kuku atigeze ayitaba. Inyarwanda.com turakomeza kubakurikiranira iyi nkuru.
Eng
RSS 
TANGA IGITECYEREZO