Apotre Masasu yatunguranye mu gitaramo Gospel Live Jazz cyitanzwemo asaga miliyoni 2 yo gushyigikira Cubaka-AMAFOTO+VIDEO

Muri iki gitaramo Gospel Live Jazz, Cubaka Justin yari yatumiye abahanzi banyuranye barimo; Christian Irimbere, Serge Iyamuremye, Arsene Tuyi, Shekinah worship team, Gisubizo Ministries na Patient Bizimana. Kwinjira byari ubuntu ku bantu bose. Ni igitaramo cyitabiriwe cyane mu buryo abantu benshi batacyekaga. Mu bitabiriye iki gitaramo harimo na Gaby Irene Kamanzi wari umaze igihe agataragara cyane mu bitaramo. 

Apotre Masasu yakoreye udushya twinshi muri iki gitaramo

Apotre Masasu Yoshuwa uyobora itorero Evangelical Restoration church ku isi yatunguranye akora ikintu abanyamadini badakunze gukorera abahanzi bo mu matorero yabo. Yashyizeho umwanya wo gutera inkunga Cubaka Justin, ni uko ahamagara abantu 20 bashaka gushyigikira impano iri muri Cubaka, buri umwe amusaba ko yatanga ibihumbi 100 by'amanyarwanda (100,000Frw). Abo bantu 20 bahise baboneka ako kanya ndetse haboneka n'undi witanze amadorali 100 y'Amerika ndetse we ahita ayishyira. 

Cubaka mu gitaramo cye bwite yise Gospel Live Jazz

Akandi gashya Apotre Masasu yakoze kagatungura abantu ni uko yacinye akadiho abantu bose bagatangara. Yahamagaye abaririmbyi bajya imbere ku ruhimbi (stage), ni uko babyinira Yesu karahava. Apotre Masasu yasirimbye ndetse akora ibidasanzwe arasimbuka cyane, bamwe mu bari mu gitaramo bavuza amashyi y'urufaya, abandi batera za Haleluya na Amen nyinshi. Cubaka hamwe n'abahanzi bose yatumiye bafashije abari muri iki gitaramo gusabana n'Imana binyuze mu kuyiramya no kuyihimbaza. 

Mu kiganiro na Inyarwanda.com, Cubaka Justin yadutangarije ko yakozwe cyane ku mutima n'uko igitaramo cye cyagenze. Twamubajije icyamushimishije cyane, avuga ko yashimishijwe cyane n'isengesho Apotre Masasu hamwe n'abandi bakozi b'Imana bamusengeye. Yagize ati: "Ikintu cyanshimishije cyane ni ya masengesho Apotre (Aravuga Masasu) yansengeye hamwe Pastor Lydia Masasu n'abandi bakozi b'Imana, wa mugisha Apotre yampanuriye ni byo byanshimishije cyane."

Cubaka yashimishijwe cyane no kurambikwaho ibiganza n'abakozi b'Imana

Ku bijyanye n'inkunga yakusanyirijwe mu gitaramo Gospel Live Jazz ku gitekerezo cya Apotre Masasu, Cubaka wateguye iki gitaramo ndetse agatungurwa no gukusanyirizwa inkunga y'asaga miliyoni ebyiri, yatangiye abwira Inyarwanda.com yishimiye iki gikorwa. Ati: "Nacyakiriye neza kandi ndanamushimira (Apotre Masasu), ndanashimira abantu bose bagize icyo batanga kugira ngo bateze imbere umurimo w'Imana. Habonetse 2,140,000 Frw na 100$"

AMAFOTO Y'UKO BYARI BIMEZE

Apotre Masasu hamwe n'umufasha we Pastor Lydia Masasu

Gisubizo Ministries mu gitaramo cya Cubaka Justin

Apotre Masasu yafashijwe cyane

Arsene Tuyi

Gaby Kamanzi na Patient Bizimana

Pastor Lydia Masasu

Pastor Lydia Masasu asuhuzanya na Cubaka Justin

Cubaka Justin mu gitaramo yise Gospel Live Jazz

Intumwa y'Imana Masasu

Apotre Masasu yakirigise gitari

Ubwo Masasu yasabaga abantu gushyigikira Cubaka bakagura CD 

Cubaka yasabiwe umugisha n'abakozi b'Imana

Patient Bizimana yaririmbye mu gitaramo cya Cubaka

Serge Iyamuremye mu gitaramo cya Cubaka

REBA AMASHUSHO UBWO MASASU YARIRIMBAGA KAKAHAVA