Menya Yakuza wamenyekanye mu gusobanura filme z’Igihinde byatumye ingo nyinshi zisenyuka

Usanga akenshi  n’ubwo baba bakunze kumva amajwi y’aba basobanuzi, nyamara  benshi mu bakunzi b’izi filime batazi amasura y’aba basore, ari nayo mpamvu Inyarwanda.com igenda ibagezaho bimwe mu byerekeranye n’aba basore baba bakunzwe n’umubare w’abatari bake mu bakunzi b’aya mafilime.

Amazina ye yitwa Nsengiyumva Abdoul Karim, ni umusore wavukiye i Nyamirambo kugeza na n’ubu niho atuye.Yakuza yatangiye gusobanura filime abikundishijwe n’umwe mu bagande basobanuraga izi filime mu gihugu cya Uganda, doreko akenshi ariho yakunze kuba ndetse akaba yaragiye anahigira amwe mu mashuri yize.

Yakuza usobanura Filime

Kuva icyo gihe abikunda yatangiye kubikora ariko asa n’ubyiga, nyuma y’igihe yaje kubimenyera atangira kubikora nk’umwuga ushobora kumutunga. Uyu musore yasobanuye filime nyinshi zitandukanye ariko izo yaje kumenyekanamo cyane ni Filime z’uruhererekane z’igihinde ari nazo zatumye amenyekana cyane,aha twavuga nka Chot Bahu, Punariviva ,Ashuku n’izindi.

Tuganira n’umwe mu bakunzi b’izi filime n’ubwo atashatse ko izina rye rijya hanze yadutangarije ko yamaze igihe cy’ibyumweru bitatu yaratandukanye n’umugabo we kubera gukurikirana izi filime z’uyu musobanuzi bigatuma atangira gukunda byimazeyo uwasobanuraga izi filime ariwe Yakuza kandi nyamara batari baziranye.

Njye nigeze gushwana n’umugabo wanjye birakomera  ku buryo yaje no kunsubiza mu rugo gusa nyuma namusabye imbabazi aza kumbabarira, ariko ibi byose byatewe na filime yitwa Chot bahu narebaga n’ubwo iyi filime yari nziza ariko uwayisobanuraga nawe nisanze nsigaye mukunda kandi ntamuzi no kugeza ubu byarananiye kureka kureba filime asobanura, ariko naje kubiganiraho n’umugabo kugeza ubwo nawe yaje kugeraho arazikunda ubu sinshobora kuzireba atarataha, ndamutegereza tukazirebana ariko nawe icyantangaje ni uko iyo hagize undi uyisobanura avugango twihutishe.

Tumubajije impamvu yakunze uyu musobanuzi yadutangarije ko ari umusobanuzi ubizi kandi ubiryoshya ndetse ko ikindi ari n’umusobanuzi utavuga amagambo mabi ku buryo n’umwana iyo areba iyo filime nta mpungenge ugira cyane nk’umubyeyi.

Uretse uyu twabashije kubona tukavugana, byigeze no kuvugwa cyane mu bitangazamakuru ubwo yasobanuraga filime yitwa Chot Bahu byavuzwe ko yagize uruhare mu gusenya ingo nyinshi, kwirukanisha abakozi kubera gushiririza inkono, n’ibindi. Yakuza mu kiganiro twagiranye twamubajije uko iki kibazo yacyakiriye yagize ati,”

Nibyo koko byigeze kuvugwa cyane ariko iyo ngiye gusobanura filime nanjye ngerageraza gushakira abakunzi banjye filime nziza kandi zikunzwe, rero ni benshi bakunda ibikorwa nkora, mbega no kuba bakunda uburyo nsobanura ndabyishimira kandi bikantera imbaraga, ni benshi babimbwira. Nyine ubwo navuga ko arimpano y’umuntu.

Twagize amatsiko yo kumubaza niba yarize ururimi rw'igihinde cyangwa yarabayeyo doreko akenshi usanga izi filime ziri muri uru rurimi gusa, adusubiza muri aya magambo, ati, “Njye sinize igihinde yewe si nanabayeyo ahubwo ndi Kampala nabanye n’abahinde cyane ndetse turakorana ibi byatumye ngenda nkimenya gutyo ,igihinde ubu ndakizi ariko sinavuga ko nkizi cyane ariko ndakizi.”

Yakuza asanga gusobanura Filime ari Impano

Yakuza nk’abandi bose nawe usanga akunze kongeramo uturingushyo dutandukanye cyane aha yemeza ko ariwe ushaka uburyo yabiryoshya kugira ngo n’ureba filime arusheho ku ryoherwa. Bimwe bamuziho ngo ni Yabwatse, Arafekenya n’ibindi. Yakuza asanga kugeza ubu uyu ari umwuga umutunze ndetse umaze no kumugeza kuri byinshi nkuko abyemeza gusa asanga hakirimo imbogamizi zitandukanye zirimo gutwara ibyo baba bakoze ku buntu n’ibindi.