Mu birori bya Met Gala Rihanna yagaragaye yambaye ingofero ikoze nk’iya Papa, yatijwe na Caridinali

Met Gala ni ibirori biba buri mwaka kuva mu mwaka 1948, bizwi ku izina rya Costume Institute Gala cyangwa Met Ball. Ni ibirori bigaragarizwamo imyambarire idasanzwe ,imideli imurikwa n’ibyamamare bitandukanye. Buri cyamamare cyose cyitabiriye ibi birori kiba kigomba gushaka umwambaro wihariye ujyanye n’insanganyamatsiko iyi nzu ngandamurajye ishyiraho buri mwaka. Insanganyamatsiko y’uyu mwaka wa 2018 y’ibi birori Met Gala nii”Imideli n’imitekerereze Gatolika”

Rihanna ukunze kugaragaza udushya mu myambarire muri ibi birori,kuri iyi nshuro ntiyatengushye abari bamwitezeho agashya mu myambarire. Mu ikanzu isanzwe ngufi imbere, ariko inyuma ari ndende, yahisemo kwambara ingofero ikoze neza nk’iya Papa, umushumba wa Kiliziya Gatulika ku isi. Rihanna w’imyaka 30 y’amavuko mu byo yari yambaye byose,kuva ku nkweto kugeza ku ngofero hari hatatsweho amabuye y’agaciro

Musenyeri wa diyoseze Gatolika yo mu mujyi wa Newyork, Caridinali Timothy Dolan yatangaje ko ari we watije iyi ngofero Rihanna ndetse yanayimuzaniye mu gitondo cyakurikiye ibi birori. Mu mashyengo menshi Caridinali yagize ati “Iriya ni ingofero yanjye,yayingaruriye muri iki gitondo,yanshimye cyane,yansezeranije ko azanyitura”

Met Gala,ni ibirori bitegurwa n’inzu ndangamurage y’imyambarire yo mu mujyi wa New York izwi nka Metropolitan Museum of Art's Costume Institute igamije gukusanya amafaranga yayifasha kurushaho kwiyubaka. Kuri iyi nshuro ya 70 ibi birori byabaye ku mugoroba wo kuri uyu wa mbere taliki ya 7 Gicurasi 2018, bibera i Newyork mu gihugu cya Leta Zunze Ubumwe za Amerika.

Source:The time