MC Tino yasubijwe amasengesho yamazemo igihe asaba kuzasubira muri Guma Guma atitwa MC

MC Tino, ni umwe mu bagize itsinda rya TBB afatanyije na bagenzi be babiri; Bob na Benjah, iri tsinda rikaba riri mu bahanzi 10 bahatanira ibihembo bya Primus Guma Guma Super Star y’uyu mwaka wa 2016, iyi ikaba ari nayo nshuro yabo ya mbere babashije gutorerwa kujya muri aya marushanwa asa n’aho ari yo marushanwa rukumbi abahanzi nyarwanda baba bahanze amaso.

MC Tino yashyushyaga abantu cyane aho yari umushyushyarugamba (MC)

N’ubwo MC Tino asanzwe ari umuhanzi ubarizwa mu itsinda rya TBB kandi bakaba ari ubwa mbere bagiye muri aya marushanwa, uyu musore azwi cyane muri aya marushanwa kurusha na bamwe mu bahanzi bayitabiriye kenshi, kuko we buri gihe yabaga ari ku rubyiniro ayoboye ibi bitaramo afatanyije na Anita Pendo, gusa muri uyu mwaka wa 2016 ntazongera gufatanya na Anita kuko we ahubwo azaba ari mu bahanzi bahatana.

Muri uyu mwaka wa 2016, hagomba gushakwa undi uzafatanya na Anita agasimbura MC Tino 

MC Tino usanzwe ari n’umunyamakuru kuri Radio ya K FM, yabwiye Inyarwanda.com ko mu gihe cy’amarushanwa ya Primus Guma Guma Super Star y’umwaka ushize wa 2015, yajyaga arara kenshi asenga asaba Imana ngo izamufashe aho gusubira muri aya marushanwa nk’umushyushyarugamba, azasubiremo ari kumwe na bagenzi be bafatanyije itsinda rya TBB, ibi akaba yarabikoraga ari nako bakora cyane ngo bereke rubanda ko bashoboye.

Tino, Bob na Benjah bagize itsinda rya TBB

MC Tino avuga ko we amenyereye cyane iby’aya marushanwa, akaba azi abaturage bo mu turere dutandukanye ibyo bakunda n’uko bishimira umuziki kuko aha hose yagiye ahagera, ibi akaba yizeye ko bigiye gufasha itsinda rya TBB mu myiteguro batangiye gukora ngo bazitware neza muri aya marushanwa ya Primus Guma Guma Super Star 6.

REBA HANO "WE ARE ONE" YA TBB: