Imyiteguro n’Umwihariko w’imurikwa rya alubumu ‘Umurima’ MC Tino azerekaniramo umukunzi we-VIDEO

MC Tino agiye kumurika alubumu ‘Umurima’ igizwe n’indirimbo cumi n’ebyeri (12), eshatu(3) muri zo azazimurika ku munsi w’igitaramo naho icyenda (9) yagiye azishyira hanze mu bihe byatambutse. Uko ari 12 yiteguye kuziririmba mu buryo bwa ‘live’ mu gitaramo cye azakora kuri uyu wa Gatandatu tariki 08 Ukuboza 2018 kuri Wakanda.

MC Tino afite amateka yihariye mu muziki Nyarwanda, yakoze imirimo inyuranye yamushyize mu biganza by’Itangazamakuru. Yabaye Umunyamakuru kuri Radio zitandukanye nka Flash Fm, Royal Fm n’ahandi…..Yabaye umushyushyarugamba mu birori bikomeye, ubukwe kugeza yifashishijwe mu irushanwa rikomeye rya Primus Guma Guma Super Stars yateye umugongo.

Urugendo rwe rw’umuziki rusa n’urwatangiriye mu itsinda rya TBB yiyomoyeho. Ni umusore urangwa n’inyogosho zinyuranye, biherekezwa n’urwenya rwinshi wagera ku mbuga nkoranyambaga ze akoresha ukisekera bitewe n’ibyo yandikaho.

MC Tino agiye kumurika alubumu yise 'Umurima'.

Aritegura kumurika alubumu ya mbere kuva atangiye umuziki nk’umwuga. Inyuma y’ibyuma bifata amajwi n’amashusho, avuga ko alubumu ‘Umurima’ yatumye akora bidasanzwe, ngo nyuma yo kuyimurika azikomereza umuziki n’ubuzima busanzwe, yasanze kumurika alubumu ari ‘inzira itanyurwa na benshi’.

Mu kiganiro na INYARWANDA, yavuze ko ageze kure imyiteguro imuganisha kumurika alubumu ‘Umurima’ yazingiyeho indirimbo 12. Yavuze ko amaze igihe kinini arwana no gushyira ku murongo buri kimwe cyose gikenewe kugira ngo bizagenda neza mu gitaramo umuhanzi wa mbere azaririmbamo saa mbiri z’ijoro (20h:00). Yagize ati:

…Turi mu musaha ya nyuma nk’uko ubivuze. Aho tuvugira ubu ng’ubu turi gukora imyitozo ya nyuma….Ikintu nibanzeho cyane ni ugusubiramo indirimbo zanjye….Ni ubwa mbere ngiye gukora ‘live’, ndashaka kwiyitaho kuri ‘repetition’ zanjye ‘you know practice’ nzikora neza cyane kuburyo umunsi nyamakuru nugera,..byibuze umuntu azatahane ishusho mu mutima we avuga ati Tino nawe arashoboye.

Akomeza avuga ko kugeza ubu amaze kubona abahanzi bose bazamufasha, abazamufasha mu bijyanye na ‘protocal’, aba-Dj’s n’abandi bakenewe kugira ngo igitaramo kizagende neza. Avuga ko yashyize imbere imyiteguro y’iki gitaramo kuko ngo bishobora kutagenda neza mu bijyanye n’ubwitabire ariko nibura abahageze bakabona ko Tino yiteguye neza. 

Anongera ho ko mu ijoro ryakeye yagize ubwoba atekereje ko umunsi wo kumurika alubumu wageze, ngo bamwe mu nshuti ze baramuhumurije bamwizeza ko ibintu bizagenda neza. Ati « ….Uzi ko ejo nanditse kuri ‘status’ mbwira abantu ko ‘Umurima’ wageze natangiye ari imikino. Ninjoro ni bwo nagize ubwoba bwinshi cyane.

« Nari ndi mu rugo kubera maze iminsi nasohoka kubera iyi show nsinshaka kuzagira […] Noneho ninjoro ndyamye Papito ari muri studio….Numva, ndavuga ubu se koko ibi ng’ibi bigiye kuba,... Kwakundi uba ufite ubukwe, umunsi wa nyuma ukavuga ese birabaye wana, uzi ko bugeze wana. So ariko ngeze aho kubera inshuti nyinshi ntukagire ubwoba bizacamo, ..»    

MC Tino agereranya ku murika alubumu ‘Umurima’ nk’ubukwe kuri we, kuko ngo yakoze ibishoboka byose kugira ngo nawe umunsi we uzasigare mu mateka. Avuga ko umwihariko wa mbere uri mu imurikwa rya alubumu ye ‘Umurima’ harimo no kuba ari bwo bwa mbere agiye kuririmba mu buryo bwa ‘Live’. Yavuze ko azaririmba indirimbo 12 mu buryo bwa ‘Live’ anongereho indirimbo z’abandi bahanzi agamije gushimisha ingeri zinyuranye z’abazitabira igitaramo cye.

Yahishuye ko muri iki gitaramo cye ari nabwo azerekana umukunzi we. Ariko ngo bizaterwa n’ubwitabire bw’abazaba bari muri iki gitaramo cye. Ati “Imyaka ibaye myinshi gusa ikintu cya mbere mubanze muze, urumva…Njyewe ni mbona ‘salle’ yuzuye urumva , bizaterwa n’amarangamutima….Ariko sha azaba ahari.” Tino avuga ko iyo yishimiye akora uburi kimwe cyose, ngo amukundira amuguru ye.  

MC Tino yamenyekanye mu itsinda rya TBB, ashinguramo ikirenge atangira gukora umuziki ku giti cye. Ubu amaze gukora indirimbo nka: “Njyewe nawe”, “My Love” yahuriyemo na Javada, “Umurima” yitiriye alubumu ye nshya, “Mula”, “Finest Girl” yakoranye na Aime Bluestone, “My Time” n’izindi nyinshi.

Iki gitaramo kizabera Wakanda ku isoko rya Kabeza mu mujyi wa Kigali. Imiryango izaba ifunguye guhera saa kumi n’ebyeri (18h:00’) z’umugoroba. Uyu muhanzi yahamije ko azaririmba mu buryo bwa ‘live’, mu gihe abo yatumiye bazaririmba ‘play back na semi live’. Kumurika alubumu ye nshya “Umurima” bizaba tariki 08 Ukuboza 2018. Kwinjira muri iki gitaramo ni ibihumbi bitanu (5,000 Frw), mu gihe ku banyeshuri ari ibihumbi bitatu (3,000 Frw).

Urban Boys ni bamwe mu bahanzi bazifatanya na MC Tino.

REBA HANO IKIGANIRO TWAGIRANYEE NA MC TINO