Imyaka ibaye 8 Minani Rwema (Sur la terre) atabarutse. Umuryango we ubayeho ute?

Nyuma y’imyaka umunani uyu muhanzi atabarutse (30 Werurwe 2008- 30 Werurwe 2016), Inyarwanda.com yagiranye ikiganiro kirambuye n’umufasha we  Minani Umuliza Jackie adutangariza uko babayeho ndetse anabazwa ibijyanye n'akamaro ibihangano byasizwe na nyakwigendera byaba bimariye umuryango we.

Ubu imyaka ibaye umunani atuvuyemo gusa njye sinjya nemera ko imyaka ari umunani ishize mba mbona ari nk’umunsi umwe ushize kuko mba nkeka ko hari aho yagiye byibuza agiye gutaha tukabonana - Umulisa

Yongeyeho ko  mu myaka umunani ishize Minani Rwema atabarutse hari byinshi bamaze kongera kwiyubakamo kuko abana bakuze umuto akaba yiga mu mwaka wa gatatu w’amashuri abanza mu gihe umukuru ageze mu mashuri yisumbuye.

Abajijwe n’umunyamakuru niba ibihangano uyu muhanzi yasize hari icyo bimariye umuryango we, Madam Minani Umuliza Jackie yadutangarije ko ashimishwa cyane no kubona ibi bihangano byifashishwa n’umuryango mugari w’abanyarwanda n’ubwo nta kintu kivamo kijyanye n’amafaranga wenda yafasha umuryango w'uwabihanze. Aha uyu mubyeyi yadutangarije ko ama CDs y’ibihangano bya Minani Rwema ahari ndetse ari ku isoko n’ubwo atagurwa ku buryo buhagije.

Minani Umuliza Jackie yatangaje ko nta mihango iteganyijwe yo kwibuka uyu muhanzi, ariko ko bari kwibuka kandi bahora bamwibuka.

Nta yindi mihango twateguye yo kumwibuka gusa twe n’inshuti turi kumwibuka kandi duhora tumwibuka. Nahoze mbona abantu batandukanye bashyize amagambo yo kwibuka Minani Rwema ku mbuga nkoranyambaga, ni ukuri ni iby’agaciro turashimira buri wese watubaye hafi muri iyi myaka umunani ishize by’umwihariko abakomeje kutuba hafi kugeza n’uyu munsi - Umulisa

Minani Umulisa Jackie ashima cyane uburyo abahanzi babanye na Minani Rwema bamweretse ubumuntu kandi bakamuba hafi cyane, bishimangira ko nyakwigendera yari yarabanye neza n'abantu benshi. Uyu mubyeyi yaboneyeho umwanya wo gushimira byimazeyo umuhanzikazi Mariya Yohana udasiba kumuba hafi umunsi ku wundi kuburyo hari abantu benshi bazi ko Mariya Yohana ari umubyeyi.

Abahanzi babanye na Minani ndetse n’abandi bari bamuzi banyeretse ko yari azi kubana pe. Ni inshuti zacu batuba hafi tugenda tuvugana kenshi n’ubwo ubuzima bwakomeye wenda gusurana bitakiba cyane ariko tuba tuvugana nta muntu naveba bambaye hafi baba hafi umuryango wanjye. Nibaza ko iyo batahaba nari kwiheba ariko ubu ndakomeye kandi  n’abana bacu barakomeye bari gukura kandi iterambere rirahari - Umulisa

Uyu mubyeyi yakomeje ashimira  umuryango wa Minani Rwema ndetse n’umuryango we kuba barakomeje kubaba hafi bakamufasha. Minani Umuliza Jackie yasabye abakunzi ba Minani Rwema n’abakunzi b’umuziki nyarwanda gufata mu mugongo uyu muryango bagura n’ibihangano bya nyakwigendera  dore ko ari umwe mu mitungo yasigiye umuryango we. Ibi bihangano bikaba bibarizwa muri Library Caritas ndetse no ku Kibuga cy’indege I Kanombe kimwe n’ahandi henshi hacururizwa ibihangano by’abahanzi nyarwanda.

Minani Rwema yari umuhanzi w'umuhanga mu kuvuza ingoma

Minani Rwema yavutse mu mwaka wa 1975 mu Gatumba mu gihugu cy’u Burundi, ari naho yakuriye akahigira amashuri abanza n’ayisumbuye mbere yo gutahuka mu Rwanda nyuma ya Jenocide yakorewe Abatutsi mu Rwanda.

Uyu muhanzi washimishiga benshi mu bihangano bye, yitabye Imana mu gihe yari n’umunyeshuri muri Kaminuza yigenga ya Kigali (ULK). Akaba yarigeze no kuba umuyobozi wungirije w’Akarere ka Kanombe ushinzwe urubyiruko, siporo n’imyidagaduro.

Umuhanzi Minani Rwema yasize umugore we, Minani Umuliza Jackie bashakanye mu 2003 bakabyarana abana babiri ari bo Agahozo Aniela na Rwema Kevin.

Uretse guhanga ku giti cye, uyu muhanzi yari yarabaye mu matorero ndangamuco menshi, aha twavuga nk’itorero Indahemuka yari abereye umuyobozi.

Inyarwanda.com, twifurije umuryango wa nyakwigendera gukomeza kwihangana ndetse n’inshuti ze zose. Imana ikomeze imuhe iruhuko ridashira.