Ronaldo ntiyigeze akandagira mu kibuga, mu minota yose y'umukino w'umunsi wa 10 wa Shampiyona, Manchester United yaraye itsinzemo Tottenham ibitego 2-0, byinjijwe na Fred ndetse na Bruno Fernandes.
Muri uyu mukino, umutoza Erik Ten Hag wa Manchester United yari yakoresheje Marcus Rashford ku mwanya w'ubusatirizi bwo hagati (Centre Forward) mu gihe abasatirizi bo ku mpande bari Antony Da Silva na Jodon Sancho.
Uyu mukino ntiwagoye umutoza Ten Hag, kuko Fred yabonye igitego cyo ku munota wa 47 mbere y'uko Bruno Fernandes atsinda icya kabiri cyo gushimangira intsinzi ku munota wa 69, byatumye ikipe itagira igitutu cyo gusimbuza abakinnyi.
Ku munota wa 76, Antony yasimbuwe na Scott McTomminay, mbere y'uko Jodon Sancho na Casemiro batanga imyanya kuri Anthony Elanga na Cristian Eriksen binjiriye rimwe mu kibuga ku munota wa 87.
Aha umukino waganaga ku musozo ndetse bisa n'aho gahunda zo gusimbuza zashyizweho akadomo ku mutoza Erik Ten, bituma Cristiano Ronaldo yikubita ava mu bakinnyi ajya mu rwambariro, bigaragaza ko yababajwe no kutagaragara mu kibuga.
CR7 yaraye avuye ku kibuga umukino utarangiye
Mu kiganiro n'itangazamakuru, Ten Hag utoza Manchester United yabajijwe kubya Ronaldo wavuye ku kibuga umukino utarangiye, avuga gusa ko yamubonye asohoka akamwihorera, ategereje ko baza kuvugana kuri uyu wa Kane.
Mu gitondo cyo kuri uyu wa Kane, Cristiano yagaragaye afatanya n'abandi imyitozo ku kibuga cya Carrington, ariko ntihavuzwe niba yagiranye ibiganiro n'umutoza Erik Ten Hag.
Ikinyamakuru SkySports cyanditse ko umutoza Ten Hag yafashe umwanzuro wo kudashyira Ronaldo ku rutonde rw'abakinnyi azakoresha mu mukino w'umunsi wa 11 wa Shampiyona, aho Manchester United izakirwa na Chelsea kuri Stamford Bridge uhereye i Saa 18:30 z'umugoroba wo kuya 22 Ukwakira 2022.
Kutarebana neza kwa Ten Hag na Ronaldo, bishobora gutuma uyu rutahizamu asubukura gahunda yo kuva muri Manchester United, iyo yari afite n'ubundi mu mpeshyi y'uyu mwaka ariko isoko rikarinda rifungwa atarajya mu yindi kipe.
Ikipe ya Sporting Lisbon yo muri Portugal ari nayo Ronaldo yazamukiyemo, niyo iri ku ruhembe rw'izivugwaho kumwifuza, mu gihe bivugwa ko atindiwe no kugera muri Mutarama 2023 ngo asezere ku bakunzi ba Manchester United.