Ahabanza Imikino

NBA yahagaritswe kubera Coronavirus - AMAFOTO

Yanditswe na: SAFARI Garcon
Taliki:12/03/2020 10:56 0

Shampiyona ya mbere ku isi mu mukino w’intoki wa Basketball muri Leta Zunze Ubumwe za Amerika ‘NBA’ yamaze guhagarikwa igihe kitazwi nyuma y’uko hari abakinnyi bagaragaweho icyorezo cya Coronavirus.

Muri Amerika ho umukinnyi w'ikipe ya Utah Jazz ikina shampiyona ya NBA basanze afite iyi virus, byatumye kuri uyu wa kane batangaza ko imikino yose ya NBA ibaye ihagaritswe.

NBA yatangaje ko imikino yose yari iteganyijwe isubitswe kuva kuwa gatatu nijoro (kuwa kane mu gitondo muri aka karere) kugeza igihe rindi tangazo rikomora iyi mikino rizasohokera nyuma y'uko hari umukinnyi wa Utah Jazz basanzemo iyi virus nk'uko iyi kipe yabitangaje.

Ibi byatangajwe mbere gato y'umukino wari ugiye guhuza Jazz na Oklahoma City Thunder ugahita usubikwa muri iri joro ryo kuwa gatatu muri Amerika.

NBA yatangaje ko umukinnyi basanganye iyi ndwara atari yaje kuri uyu mukino.

Abakinnyi babiri ba Jazz Rudy Gobert na Emmanuel Muddiay ntibari mu bagombaga gukina uyu mukino cyangwa ku kibuga.

Amakuru ataremezwa n'ababishijwe avuga ko uyu mukinnyi Rudy Gobert ari Umufaransa.

Nyiri ikipe ya Dallas Mavericks, Mark Cuban, yumvise ibyatangajwe na NBA mu ijoro ryakeye yagize ati:"Natekereje ko ari nko gushyenga. Ndumva atari ukuri. Wagira ngo ni filimi".

Undi mukino wari ugiye guhuza Sakramento Kings na New Orleans Pelicans mu ijoro ryakeye nawo wahise usubikwa.

Mu gihe gito iyi Virus imaze, abantu babarirwa mu bihumbi 116,000 nibo bamaze kugaragarwaho iki cyorezo, ibihumbi 64,000 nibo bavuwe barakira , gihitana abantu ibihumbi 4,000.

Itangazo ryasohowe na NBA rihagarika iyi shampiyona igihe kitazwi