BASKETBALL: REG BBC yongeye gutsinda Espoir BBC, IPRC Kigali BBC igeza ubutumwa kuri APR BBC-AMAFOTO

Agace ka mbere k’uyu mukino kabaye aka Espoir BBC kuko yari ifite amanota 15 kuri 14 ya REG BBC, Ibi byaje gukomeza kuko mu gace ka kabiri n’ubundi Espoir BBC yongeye gutsinda amanota 24 mu gihe REG BBC yari ikiri ku manota 17 bityo igice cya mbere cy’umukino kirangira Espoir BBC iri imbere n’amanota 39 mu gihe REG BBC ifite igikombe cya shampiyona yari ifite amanota 31.

Mu gace ka gatatu ni bwo REG BBC yazuye umugara yereka abari muri sitade ko nta byo kujenjeka izanye bityo ihita itsinda amanota 26 mu gihe Espoir BBC yari ifite amanota icumi (10). Mu gace ka nyuma, REG BBC yongeye kwigarurira umukino itsinda amanota 17 mu gihe Espoir BBC yari igifite amanota 12.

Beleck Bell wa REG BBC yatsinze amanota 29 muri uyu mukino mu gihe Sangwe Armel wa Espoir BBC yamuje inyuma afite amanota 21 mu gihe uwa gatatu mu gutsinda amanota menshi yabaye Rukundo Fabrice (Espoir BBC) wagejeje amanota 17 naho Shyaka Olivier (REG BBC) yatahanye amanota icumi (10). Kaje Elie (REG BBC) yatsinze amanota umunani (8).

Beleck Bell (ufite umupira) ni umukinnyi mushya muri REG BBC bakuye muri Cameroun

Kazeneza Emile Galois umukinnyi ukiri muto akaba na kapiteni wa Espoir BBC yafashije cyane iyi kipe kuko yayitsindiye amanota 14 anabafasha muri gahunda yo kuzibira cyane mu gutanga imipira itanga amanota.

Kazeneza Emile Galois ashaka uko yatsinda  

Kazingufu Ali Kubwimana yatanze imipira itandatu ibyara amanota anabuza amanota (Assists) anabuza amanota icumi (10) kuba yakwinjizwa na Espoir BBC (Rebounds). Kubanatubane Jean Philip wa Espoir BBC nawe yatanze imipira itandatu yabyaye amanota (Espoir BBC) imibare anganya na Kubwimana Kazingufu Ali kapiteni wa REG BBC.

Uyu mukino wabanjirijwe n’uwo IPRC Kigali BBC yatsinzemo APR BBC amanota 92-81. Muri uyu mukino, IPRC Kigali BBC itozwa na Buhake Albert yatangiye itsinda uduce tubiri twa mbere kuko yabanje gutsinda amanota 24-18 na 24-13 mbere yuko APR BBC itsinda agace ka gatatu ku manota 27-17. Agace ka nyuma nabwo IPRC Kigali BBC yake ikosora ihita itsinda amanota 27-23 ya APR BBC ikipe bisa naho idakanganye cyane muri iyi shampiyona.

Nijimbere Guibert umukinnyi ukiri muto ukinira IPRC Kigali BBC yasaruye amanota 30 muri uyu mukino aza akurikiwe na Niyonkuru Pascal bita Kaceka wa APR BBC kuko yatsinze amanota 18. Irutingabo Fiston (IPRC Kigali BBC) yatsinze amanota 14 mu gihe mugenzi we Nkaniro Bello yatsinze amanota 13 mu mukino.

Munyaneza Eric (21) ashaka uko yakora amanota 

Nijimbere Guibert kandi uretse gutsinda amanota 30, yatanze imipira irindwi (7) yabyaye amanota anarinda inkangara ya IPRC Kigali BBC inshuro zirindwi (7) ibintu byakozwe kenshi na mugenzi we bakinana, Ndoli Jean Paul wabikoze inshuro 11. Ku ruhande rwa APR BBC, Iyakaremye Emmanuel yatahanye amanota 12 naho Mugiraneza Fabrice atsinda amanota 15

Ramadhan Alex amaze gufata umupira azamutse

Irutingabo Fiston wa IPRC Kigali BBC azamukana umupira