Ahabanza Imyidagaduro

iHeartRadio Music Awards 2025: Taylor Swift yihariye ibihembo, Tyla yandika amateka mashya - AMAFOTO

Yanditswe na: Brenda MIZERO
Taliki:18/03/2025 10:27 0

Ku wa 17 Werurwe 2025, Dolby Theatre i Los Angeles habereye umuhango ngarukamwaka wo gutanga ibihembo bya iHeartRadio Music, ibirori bikomeye bihuriza hamwe abahanzi bakomeye ku isi bakishimira ibyo bagezeho mu rugendo rwabo rwa muzika.

Uyu mwaka, ibihembo byahawe abahanzi bitwaye neza mu byiciro bitandukanye, hakaba n’ibyahawe abatoranyijwe n’abafana binyuze mu matora yabereye ku mbuga nkoranyambaga. Ibi birori byayobowe na LL Cool J, umuhanzi w’ikirangirire mu njyana ya hip-hop.

Muri ibi bihembo, abahanzi nka Taylor Swift na Morgan Wallen ni bo bayoboye urutonde rw’abari bahatanye mu byiciro byinshi, kuko buri umwe yari ahatanye mu bigera ku icumi. Bakurikiwe na Kendrick Lamar, Post Malone na Sabrina Carpenter, bari bahatanye mu byiciro icyenda.

Mu byiciro bishya byongewe uyu mwaka, abafana babashije gutora abahize abandi mu bijyanye n’indirimbo zikunzwe muri filime n’amakinamico, abahanzi bateguye ibitaramo by’amateka, ndetse n’abatunguranye mu bitaramo by’abahanzi batandukanye.

Taylor Swift, utabashije kwitabira ibi birori, yahawe igihembo gikomeye cyiswe "Tour of the Century" kubera uruhererekane rw'ibitaramo bye bizwi nka Eras Tour byaciye agahigo mu bitaramo byabayeho, byakozwe ku migabane itanu bigasiga amateka mu muziki.

Yegukanye kandi ibihembo birimo "Favorite Tour Style" ku bwo kwambara imyenda idasanzwe mu bitaramo bye, "Favorite Tour Tradition", "Best Music Video" kubera indirimbo ye "Fortnight" yakoranye na Post Malone, ndetse na "Favorite On Screen".

Byongeye kandi, Taylor Swift yegukanye igihembo cy’umushyitsi watunguranye mu bitaramo by'abandi, aho yagaragaye ari kumwe n’umukunzi we Travis Kelce ku rubyiniro rwa Wembley Stadium i Londres.

Umuhanzikazi Tyla ukomoka muri Afurika y'Epfo yongeye kwandika amateka mashya yegukana igihembo cy'umuhanzi mwiza w'umwaka ku rwego rw'isi, 'World Artist of the Year,' ahigitse abarimo Tems, Burna Boy, Central Cee n'abandi.

Abandi bahanzi bashimiwe ku bw’uruhare rwabo mu muziki barimo Lady Gaga, wahawe igihembo cyiswe "Innovator Award" kubera uruhare rwe mu guhanga udushya mu muziki no gutanga ubutumwa buhindura isi. Mariah Carey, umuhanzi wacuruje ibihangano cyane kurusha abandi bagore mu mateka y’umuziki, yahawe igihembo cya "Icon Award" gishimira abahanzi bagize uruhare rukomeye mu iterambere ry’uru ruganda.

Nelly, umuhanzi umaze imyaka myinshi atanga umusanzu ukomeye mu njyana ya hip-hop na R&B, yashimiwe ahabwa igihembo cya "Landmark Award" kigenerwa abahanzi bagize ingaruka zikomeye ku muco binyuze mu muziki.

Mu rwego rwo gususurutsa abari bitabiriye ibi birori, abahanzi bakomeye barimo Billie Eilish, Bad Bunny, GloRilla, Gracie Abrams, Kenny Chesney, Muni Long na Nelly bagaragaje ubuhanga bwabo ku rubyiniro. Byongeye kandi, amashusho y’igitaramo cya mbere cya Taylor Swift cya Eras Tour cyabereye i Glendale muri Arizona yerekanwe muri iki gitaramo.

Uretse gutanga ibihembo, uyu mwaka muri iHeartRadio Music Awards, abatabaye abahuye n’inkongi z’umuriro muri Los Angeles binyuze mu gikorwa cy’ubugiraneza bwiswe FireAid, bahawe agaciro, aho inkunga batanze izakoreshwa mu kubaka ahangijwe no gufasha mu gukumira ibiza nk’ibi mu gihe kizaza.

Mu batanze ibihembo muri ibi birori, hiyongereyeho ibyamamare byinshi birimo Becky G, Billy Idol, Feid, Jenny McCarthy, Joel McHale, Kelsea Ballerini, Offset, Robin Thicke, Sexyy Red, Victoria Monét n’abandi batandukanye. Ibi byatumye 'iHeartRadio Music Awards 2025' ihinduka umwanya mwiza wo guha agaciro abahanzi, abafana ndetse n’abagize uruhare mu kuzamura umuziki ku isi.

Dore urutonde rwa bamwe mu begukanye ibi bihembo:

Song of the Year: