Rema: Uko yashimangiye impano ye kugeza Barack Obama abaye umufana

Ubu, ari imbere mu guhindura imiterere y'umuziki wa Afurika, aharanira kugeza Afrobeats ku rwego mpuzamahanga.

Yatangiye urugendo rwe rwa muzika mu 2018, ubwo yashyiraga hanze freestyle ku ndirimbo ya D'Prince, bikamutangaza cyane ku mbuga nkoranyambaga. 

Ibi byatumye D'Prince amutumira muri Lagos, aho yasinye amasezerano na Jonzing World, inzu itunganya umuziki ifitanye isano na Mavin Records. 

Mu mwaka wa 2019, Rema yashyize hanze EP ye ya mbere, yise "Rema", ikaba yarakunzwe cyane muri Nijeriya ndetse no ku rwego mpuzamahanga. 

Indirimbo nka "Dumebi" yamufashije kubona izina rikomeye, ndetse iyi ndirimbo ikaba yarashyizwe mu rutonde rwa playlist ya Barack Obama mu mwaka wa 2019 nkuko tubikesha Wikipedia

Rema akomeza kugera ku ntera nshya mu muziki we, aho yashyize hanze indirimbo "Calm Down" mu 2022, nayo yakunzwe cyane ku isi yose. 

Yashinze umuziki we ku njyana yise "Afrorave", aho akomatanya Afrobeats n'umuziki w'Abarabu. Ibi byose byatumye atangira guhiga abandi bahanzi mu muziki wa Afrobeats, aharanira kwagura inzira z'umuziki wa Afurika.

Ubuzima bwa Rema bwagize imvune nyuma y'uko se, Justice Ikubor, yitabye Imana mu 2008, mu buryo butunguranye. Rema yigeze gusaba ko habaho iperereza ryimbitse ku rupfu rwa se, ariko kugeza ubu nta bisubizo byagaragaye. 

Nubwo yabajwe n'igihombo cy'ubuzima bwe, Rema ntiyigeze areka guhanga udushya mu muziki, kandi ubu ari umwe mu bahanzi bakomeye ku isi.

Mu 2023, Rema yegukanye MTV Video Music Award mu cyiciro cya "Best Afrobeats", byerekana neza uburyo afite impano idasanzwe. 

Uyu mwaka kandi, yanditse amateka akomeye ubwo yabaga umuhanzi wa mbere w'Umunyafurika kugaragara ku ishusho y'ikinyamakuru cya Rolling Stone, aho yagaragaye ku rupapuro rw'imbere rwacyo.

Rema akomeje kuba ikitegererezo ku bahanzi bose bo muri Afurika, kandi ari kwerekeza kure mu rugendo rwe rwo guteza imbere muzika ya Afurika ku rwego mpuzamahanga.