U Bwongereza mu nzira yo kuzatanga amakipe 5 azitabira Champions League y'umwaka utaha

Ubusanzwe shampiyona zikomeye ku Mugabane w'u Burayi zitanga amakipe ane aba ari bwitabire imikino ya UEFA Champions League buri mwaka w'imikino.

Kuva muri uyu mwaka w'imikino ariko shampiyona ebyiri zitanga amakipe 5. Ibi bigendana n'uko amakipe izi shampiyona ziba zaratanze mu marushanwa y'Umugabane w'u Burayi ariyo , Champions League, Europa League na Conference League aba yaritwaye.

Uku kwitwara neza birebwa hatangwa amanota aho iyo ikipe itsinze shampiyona iturukamo ihabwa amanota abiri naho yanganya igahabwa inota 1.

Ntabwo ari ibi gusa kuko n'imyanya amakipe yasorejemo imikino ibanza mbere y'uko hakinwa iyo gukuranwamo nabyo byahawe amanota.

Ikipe yasoreje ku mwanya wa mbere muri Champions League, shampiyona iturukamo yahawe amanota 12,muri Europa League ihabwa amanota 6 naho muri Conference League ihabwa amanota 4.

Iyo ikipe irenze icyiciro kimwe cyo gukuranwamo ikajya mu kindi ,muri Champions League, Shampiyona iturukamo ihabwa inota 1.5,muri Europa League igahabwa 1.0 naho muri Conference League ihabwa 0.5.

Aya manota yose aratoranywa ubundi shampiyona ebyiri zigize amanota menshi zigatanga amakipe 5.

Kuri ubu Shampiyona y'u Bwongereza irahabwa amahirwe menshi yo kuzatanga amakipe 5 mu mwaka utaha w'imikino bitewe n'uko ariyo ifite amanota menshi kugeza ubu nyuma y'uko ku munsi w'ejo Manchester United na Tottenham Hotspur zibonye itike ya 1/4 cya Europa League naho Chelsea ikabona iya Conference League.

Mu makipe arindwi iyi shampiyona yari yatanze ngo yitabire amarushanwa y'i Burayi , Liverpool na Manchester City nizo zonyine zasezerewe. Muri Champions League, Shampiyona y'u Bwongereza iracyahafite Arsenal na Aston Villa.

Muri rusange kugeza ubu ifite amanota 24.175 aho ikurikirwa n'iya Espagne ifite amanota 21.462 mu gihe ku mwanya wa 3 hari iy'u Butaliyani ifite amanota 19.750.

Shampiyona y'u Bwongereza kugira ngo izatange amakipe 5 muri Champions League y'umwaka utaha, irasabwa ko ikipe yayo imwe izakomeza ikarenga 1/4 cya Champions League, Europa League cyangwa Conference League.

Muri Champions League y'uyu mwaka shampiyona zari zatanze amakipe 5 ni iy'u Butaliyani ndetse n'iy'u Budage.

Shampiyona y'u Bwongereza iri mu nzira yo kuzatanga amakipe 5 mu mwaka utaha w'imikino