Ibyo wamenya ku bitaramo bine bya Aline Gahongayire i Burayi

Gahongayire yabwiye InyaRwanda, ko ibitaramo bye ku Mugabane w’u Burayi yamaze kwemeza ko bizatangira muri Kamena 2025, kandi bizabera mu bihugu bine. 

Uyu muhanzikazi wamamaye mu ndirimbo zirimo nka ‘Ndanyuzwe’, yahamije ko ibitaramo bye bizabera mu Bubiligi, mu Budage, mu Bususiwi ndetse no mu Bufaransa ‘ku matariki azatangazwa mu gihe kiri imbere’. 

Ati “Ni ibitaramo nzakorera mu Burayi, kandi nzaba ndi kumwe n’abandi bahanzi bazatangazwa mu gihe kiri imbere. Navuga ko bizabera mu bihugu bine, kandi ni ibitaramo bigamije ubutumwa bwiza bwa Kristo, no gukomeza urugendo rwo gushima Imana. 2025, gahunda ni ugukomeza gushima.”

Gahongayire yaherukaga mu Burayi mu bitaramo yakoreye cyane mu Bubiligi, cyabaye 5 Ukwakira 2024, aho yari yatumiwe na Team Producer ihagarariwe na Justin.

Aline Gahongayire ni umuhanzikazi w’indirimbo zihimbaza Imana (Gospel) ukomoka mu Rwanda. Azwi cyane kubera ijwi rye rikomeye, indirimbo zifite ubutumwa bwimbitse, ndetse n’uruhare rwe mu gufasha no guteza imbere abandi bahanzi.

Yavutse mu muryango w’abakirisitu, bikaba byaramugiriye ingaruka nziza ku muziki we. Ni umwe mu baririmbyi batangiye umuziki wo kuramya no guhimbaza Imana akiri muto.

Yatangiye kumenyekana mu Rwanda binyuze mu ndirimbo "Warampishe", "Ndanyuzwe", "Nzakomeza", n’izindi. Afite ubuhanga mu kuririmba no kwandika indirimbo zifasha abantu mu bihe bitandukanye by’ubuzima.

Yakoranye n’abandi bahanzi bakomeye mu muziki wa Gospel, harimo abarimo Israel Mbonyi, Tonzi, n’abandi. Azwiho kugira umutima wo gufasha, aho ashyigikira abatishoboye n’abagore bafite ibibazo binyuranye.

Yashinze imishinga ifasha abana b’imfubyi n’abari mu buzima bugoye. Akunze gukoresha umuziki nk’uburyo bwo gutanga ubutumwa bw’ibyiringiro, gukangurira abantu kugira ukwizera no gukomera ku Mana.

Azwiho indirimbo zifite imbaraga, kandi zifite amavuta. Kugeza ubu Aline Gahongayire amaze gusohora alubumu 6 akaba yitegurira kumurika abakunzi be alubumu ye ya 7, 8, ndetse n’iya cyenda.

Ni we washinze umuryango udaharanira inyungu "Ndineza Organization" mu rwego rwo gufasha abatishoboye cyane cyane abana n'abagore.

 

Gahongayire yatangaje ko agiye gukorera ibitaramo bikomeye mu bihugu bitandukanye i Burayi 

Gahongayire yavuze ko ibi bitaramo bigamije gushimira Imana mu nguni zose z’ubuzima

 

Gahongayire yaherukaga mu Bubiligi mu gitaramo gikomeye yahakoreye 

Gahongayire yavuze ko muri ibi bitaramo azataramana n’abandi bahanzi

Gahongayire yavuze ko ibi bitaramo bizaba umwanya mwiza kuri we wo guhura no gusabana n'abafana n'abakunzi b'umuziki we 

KANDA HANO UBASHE KUREBA ZIMWE MU NDIRIMBO ZA ALINE GAHONGAYIRE

">