Perezida Kagame yaganiriye na Amerika ku birimo ibibazo bya Congo

Ibi Umukuru w'Igihugu yabitangaje mu rukerera rwo kuri uyu wa Gatatu tariki ya 29 Mutarama 2025 abinyujije ku rubuga rwe rwa X.

Yagize ati " Nagiranye ikiganiro cyiza n’Umunyamabanga Marco Rubio ku bikenewe ngo imirwano ihagarare mu burasirazuba bwa DRC no mu gushakira umuti wa burundu umuzi w’amakimbirane.”

Perezida Kagame yakomeje atangaza kandi ko indi ngingo baganiriyeho ari iyo gukomeza guteza imbere umubano mwiza usanzwe hagati y’u Rwanda na Leta Zunze Ubumwe za Amerika, hashingiwe ku bw’ubuhane bw’inyungu za buri ruhande.

Ati" Hashingiwe ku kubaha inyungu za buri gihugu. Niteguye gukorana n’ubutegetsi bwa Trump mu kubaka ubusugire n’umutekano abaturage bo mu Karere kacu bakwiye."

Perezida Kagame yagiranye iki kiganiro na Marco Rubio mu gihe ibibazo byo mu burasirazuba bwa Repubulika Iharanira Demokarasi ya Congo byakajije umurego, aho ubu umutwe wa M23 wamaze gufata umujyi wa Goma nyuma y’urugamba rukomeye aho n'abasirikare benshi ba FARDC na n’imitwe bifatanya bamanitse amaboko bagahungira mu Rwanda.

Ni mu gihe kandi ku munsi w'ejo ku wa Kabiri tariki ya 28 Mutarama 2025, abaturage bo mu Murwa Mukuru wa Kinshasa, biraye kuri ambasade z’ibihugu bitandukanye birimo u Rwanda, Leta Zunze Ubumwe za Amerika, Uganda, Kenya n’u Bufaransa bakazitwika.

Leta Zunze Ubumwe za Amerika, ni kimwe mu bihugu byagiye bigwa mu mutego wo kugendera ku kinyoma cyahimbwe na DRC ko u Rwanda rufasha umutwe wa M23, mu gihe u Rwanda rutahwemye kubihakana.

Gusa iki gihugu cy’igihangange, cyakunze gutsindagira ko nta kindi cyatanga umuti w’ibibazo bimaze igihe mu burasirazuba bwa DRC atari ibiganiro bya Politiki aho kuba intambara y’amasasu, ndetse kikavuga ko gishyigikiye ibiganiro by’i Nairobi n’iby’i Luanda n’imyanzuro yagiye ibifatirwamo.

Perezida Kagame yaganiriye na Amerika ku birimo ibibazo bya Congo

Umunyamabanga wa Leta Zunze Ubumwe za Amerika ushinzwe Ububanyi n'Amahanga, Marco Rubio yaganiriye na Perezida Kagame ku birimo ibibazo bya Congo