Ruben Amorim yemeye ko ikipe atoza ariyo mbi mu mateka ya Man United

Ni amagambo yaturutse ku ntsinzi nke n’imyitwarire idashimishije mu mikino ya shampiyona ya Premier League.

Nyuma yo gutsindwa na Brighton ibitego 3-1 ku kibuga cya Old Trafford, byagaragaye ko United ifite intege nke. Iri ku mwanya wa 13 ku rutonde rwa shampiyona, ikaba yarabonye amanota 11 gusa mu mikino 11 kuva Amorim yatangira kuyitoza mu Ugushyingo.

Intsinzi nke zatumye ikipe ishyirwa mu majwi, dore ko ari ubwa mbere kuva mu 1989-90 yatsinzwe imikino 10 byihuse mu mwaka wa shampiyona.

Amorim yagize ati: “Ni twe kipe mbi mu mateka ya  Manchester United. Turi ikipe mbi cyane mu mateka ya Manchester United. Abafana bacu barababaye, nanjye nguma gutungurwa. 

Kugira ngo bihinduke, tugomba kubanza kwemera ukuri tukamenya aho duhera. Ndabizi ko ibi bizavugwa cyane, ariko ni byo."

Aya magambo yerekana ishusho mbi y'ibiri kubera mu ikipe yigeze kwiharira ibigwi mu Bwongereza no ku isi hose.

Bamwe mu basesenguzi nka Leon Osman basanga amagambo ya Amorim afite ishingiro. Yavuze ko ikipe yatanzweho amafaranga menshi itagombye gutanga umusaruro mubi nk’uyu. 

Yagize ati: "Abakinnyi b'iyi kipe bagereranywa agaciro ka miliyoni £391, ariko intego zabo zitanga isura mbi. Kuba umutoza avuga ko ari ikipe mbi cyane mu mateka birababaje ariko biragaragaza ukuri."

United yatsinzwe imikino 6 ku kibuga cyayo muri uyu mwaka w’imikino, ikaba ari bwo bwa mbere ibi bibaye kuva mu 1893-94. Ikindi kandi, mu mikino itanu iheruka yakiniye mu rugo, buri gihe yabanjwe igitego cya mbere, ibintu bidahesha icyubahiro ikipe yahoze yitwa "Red Devils."

Nubwo ibintu bitifashe neza, Amorim aracyafite icyizere. Nta byinshi yagaragaje ku buryo ashaka guhindura iyi kipe, ariko yashimangiye ko kubanza kwemera amakosa ari intambwe ya mbere yo kuyazamura.

Umutoza wa Manchester United yemeje ko ikipe afite ariyo mbi mu mateka ya Man United