Intego ye ni igikombe cya shampiyona! Ibyo wamenya kuri Joseph Sackey wifuzwa na Rayon Sports

Joseph Sackey  ukinira Muhazi United, ni umukinnyi w’umupira w’amaguru ukomoka muri Ghana, wavukiye mu gace ka Somanya Krobo. Afite imyaka 22, ariko urugendo rwe mu mupira w’amaguru rugaragaza ubunararibonye bwinshi ndetse n’urukundo rw’uyu mukino kuva akiri umwana. Yakuze areba umupira w’amaguru kandi afashwa guteza imbere impano ye n’abantu batandukanye, cyane cyane umujyanama we, Chris.

Joseph yanyuze mu makipe atandukanye muri Ghana harimo Tema Youth FC, Proud United, New Edubiase United na Wa Suntaa SC. Mu gihe yakiniraga Wa Suntaa SC, yakoraga bidasanzwe kuko yagiraga inshingano zo kugenzura imyanya itatu itandukanye mu mukino umwe.

Uretse kuba akina nk’umukinnyi wo hagati wugarira (defensive midfielder) Jioseph Sackey yahamirije Inyarwanda ko azi no gukina yugarira kuko ubwo yakinaga muri Sunta SC yanakinnyeho nka myugariro kubera ko umwe mu bakinnyi yari yakomeretse.

Si aho gusa kuko Joseph Sackey anashoboye gukina nk’umunyezamu kuko yigeze gukina igice cya kabiri, kubera ikarita itukura yahawe umuzamu w’ikipe yabo kandi nta basimbura basigaranye, yatanze igitekerezo cyo kuba umuzamu. Ibyo byerekanye ubuhanga bwe mu mukino ndetse n’ubushake bwo gufasha ikipe gutsinda.

Joseph Sackey ni umukinnyi wihariye ushobora gukina imyanya myinshi, ariko umwanya akunda cyane ni uwo hagati wugarira umwanya benshi bakunda kwita kuri 6.

Joseph Sackey akenshi iyo yicaye yibuka cyane imikino myiza yakinnye muri Ghana, ariko ibihe by’ingenzi by’ubuzima bwe mu kibuga harimo umukino yakinnyemo na Rayon Sports uyu mwaka i Kigali, ndetse n’indi mikino yakinnyemo na APR FC mu mwaka ushize, aho yitwaye neza cyane akaba ari nabwo umutoza wa Rayon Sports yamuteye imboni agatangira kumutekereza.

Joseph yahamirije InyaRwanda ko yatangajwe n’uburyo yamenyekanye mu Rwanda binyuze ku mutoza wa Rayon Sports, abayobozi b’ikipe, abanyamakuru ndetse n’imbuga nkoranyambaga. Ibi byamuhaye icyizere n’imbaraga zo gukora cyane kugira ngo yitware neza.

Ubwo Rayon Sports yari imaze gutsinda Muhazi United ibitego 2-1 umukino ukirangira uyu mukinnyi yagaragaye aganira n’umutoza wa Rayon Sports ukomoka muri Brazil Robertinho, ndetse bivugwa ko yamubwiye ko yifuza ko Sackey yazajya gukinira Rayon Sports.

Ubwo yaganiraga na InyaRwanda, Joseph Sackey yahamije ko afite intego yo gufasha Rayon Sports kwegukana igikombe cya shampiyona y’u Rwanda. Yagize ati: “Nakunze cyane igihugu cy’u Rwanda ni igihugu cyiza kandi nshaka kwiga byinshi cyane cyane ku mupira w’amaguru hano. Intego yanjye ni ugutera imbere mu mwuga wanjye w’imikino, nindamuka ngeze mu ikipe ya Rayon Sports intgo izaba ari uguhatanira igikombe”

Joseph ni umukinnyi uhora yirinda ibikorwa bishobora kumutera imvune, agaha agaciro ikiruhuko gihagije ndetse akanashyira imbere gusenga, avuga ko Imana ari umusingi w’ibikorwa bye byose. Afite icyerekezo cyo kuba urugero rwiza ku bandi bakinnyi, by’umwihariko abakizamuka mu mupira w’amaguru.

Joseph Sackey yavuze ko abafana ba Rayon Sports bafite umutima udasanzwe wo gushyigikira ikipe yabo, kandi yabasezeranyije ko azakora ibishoboka byose ngo abashimishe. Yagize ati: “Nshaka kubaha umupira mwiza no kubashimisha, ntibazigera bicuza kumbona nkina.”

Sackey yifuza kugera ku rwego rwo hejuru mu mupira w’amaguru, ariko nanone akaba umuntu ufite izina ryiza n’imyitwarire myiza hanze y’ikibuga. Afite intego yo kwigira ku rugendo rwe rwa Rayon Sports no gukomeza guteza imbere impano ye. Yongeraho kandi ko imikino yo mu Rwanda iri ku rwego rwiza cyane ugereranyije na shampiyona nyinshi za Afurika, ndetse ko yishimira uko abayobozi bayo bayiteza imbere.

Urugendo rwa Joseph Sackey rugamije gusiga umurage mwiza mu Rwanda no hanze yarwo. Uyu mukinnyi, ufite ubushake bwo gukura mu mwuga we no gufasha ikipe ya Rayon Sports, agaragaza ko ahisemo neza gukomereza ibikorwa bye mu gihugu cy’u Rwanda, igihugu afata nk’ahantu hazamufasha kugera ku rwego rwo hejuru mu mupira w’amaguru.

Joseph Sackey wifuzwa na Rayon Sports yavuze ko naramuka ayigezemo intego ari ukuyifasha kwegukana igikombe cya shampiyona

Joseph Sackey yashimangiye ko imikino yakinnye na APR na Rayon Sports ariyo yagaragaje urwego rwe rwiza

Umunya Ghana Joseph Sackey afite intego yo kuba urugero rwiza hanze y'ikibuga no mu kibuga