Ahabanza Imikino

Umutoza wa Manchester United yatangaje ko abakinnyi be bagira ubwoba mu kibuga

Yanditswe na: Aloys Niyonyungu
Taliki:5/01/2025 13:29 0

Umutoza w'ikipe ya Manchester United,Roben Amorim yatangaje ko abakinnyi be bagira ubwoba mu kibuga bijyanye n'ibihe bitari byiza barimo.

Kuri iki Cyumweru Saa Kumi n'Ebyiri n'iminota 30 kuri Anfield Stadium ikipe Liverpool iraba yakiriye Manchester United mu mukino wo ku munsi wa 20 wa shampiyona y'icyiciro cya mbere mu Bwongereza.

Mu kiganiro n'itangazamakuru gitegura uyu mukino, Roben Amorim utoza Manchester United yatangaje ko abakinnyi be bahangayitse ndetse rimwe na rimwe bakaba bagira n'ubwoba mu kibuga bijyanye n'ibihe bitari byiza barimo.

Yagize ati " Abakinnyi barahangayitse, kandi rimwe na rimwe bakagira ubwoba mu kibuga. Tugomba guhangana n'ibyo. Dukeneye abayobozi kugira ngo bafashe abandi basore kandi ndi umuntu ufite inshingano nyinshi hano mu kugira ngo tuzamure uko twitwara.

Ushobora kubona abakinnyi bagerageza, rimwe na rimwe bahangayitse cyane, batinya gukina umupira w'amaguru kuko uyu ni umwanya utoroshye kandi tuzafasha abakinnyi kuba beza".

Yavuze ko aribyo koko afite igitutu kuba batarimo kwitwara neza. Ati" Nibyo koko hari igitutu kinini. Kuri njye, ni ishema ndetse n'imikorere. Biba bikomeye iyo tudakoze neza".

Roben Amorim kandi yavuze ko bigoranye kuba Manchester United yazaboneka mu makipe ane ya mbere muri Premier League uyu mwaka w'imikino nurangira.

Yagize ati " Nkigera hano nasobanuye byose mbere, nubwo nyuma y'uko dutsinze Everton mwavugaga ku kuza mu makipe ane ya mbere, nasobanuye ko ntegereje ibi ariko biragoye guhangana n'ibibazo byose n'imikorere mibi ndetse n'igihombo. Mu by'ukuri biragoye".

Yavuze ko ikintu gishobora kumufasha muri ibi bihe ari ugukorana imyitozo n'abakinnyi ndetse no kuba arikumwe n'umuryango we.

Ati" Ikintu gishobora kumfasha ni imyitozo hamwe n'abakinnyi. Kandi mfite n'umuryango wanjye ubu hano ku buryo bitandukanye cyane kandi na byo bishobora kumfasha cyane".

Kugeza ubu ikipe ya Manchester United imaze gutsindwa imikino 5 yikurikiranya muri Premier League,ibituma iri ku mwanya wa 14 n'amanota 22. Igiye gukina na Liverpool yo iyoboye urutonde rwa shampiyona n'amanota 45.