APR FC yasinyishije umukinnyi w'Umugande

Nk'uko amakuru abivuga, uyu mukinnyi wari usigaranye amasezerano y'umwaka n'igice mu ikipe ya Villa SC, yasinyiye ikipe y'Ingabo z'igihugu imyaka 2.

Uyu mukinnyi ukina asatira anyuze ku ruhande rw'iburyo avuye muri iyi kipe ikina shampiyona y'icyikiro cya mbere muri Uganda amaze gutsinda ibitego 5 ndetse yaranatanze imipira 3 ibivamo mu mikino 13 ya shampiyona yari amaze gukina.

Hakim Kiwanuka w'imyaka 24, asanzwe anakinira ikipe y'igihugu ya Uganda kuva mu 2022 ndetse no ku mukino uheruka bakinnyemo n'u Burundi mu gushaka itike ya CHAN 2024 niwe watsinze igitego kibusezerera.

Yari yarageze muri Villa SC mu mwaka wa 2023 aho mu mwaka ushize w'imikino yanatwaranye nayo igikombe cya shampiyona. Yari yarayigezemo avuye mu ikipe ya Proline FC isanzwe ikina muri shampiyona y'icyiciro cya Kabiri muri Uganda.

Uyu ni mukinnyi wa Kabiri ikipe ya APR FC isinyishije muri iri soko ry'igura n'igurisha ku bakinnyi ryo muri Mutarama nyuma ya Nshimirimana Ismaël ’Pitchou wongeye gusinyishwa nyuma y'uko yari yaratandakunye nayo.

Iyi kipe kugeza ubu iri ku mwanya wa Kabiri ku rutonde rwa shampiyona n'amanota 28 aho ifite n'imikino ibiri y'ikirarane.

Hakim Kiwanuka wamaze gusinyira APR FC 

Hakim Kiwanuka yari mu bakinnyi beza muri shampiyona ya Uganda