Imirwano ya Mike Tyson na Jake Paul irabera Texas yahumuye ku isi hose

Uwahoze ari icyamamare mu Iteramakofe, Mike Tyson, agiye kugaruka mu rubuga rw’imirwano mu mukino witezwe cyane aza guhuramo na Jake Paul - umu-YouTuber akaba n’umukinnyi w’Iteramakofe utarabigize umwuga. 

Umukino uzabera muri AT&T Stadium, Texas, mu rukerera rwo ku wa Gatandatu, tariki ya 16 Ugushyingo 2024 mu masaha yo mu Rwanda, biraba bikiri ku itariki 15 Ugushyingo mu masaha ya Texas.

Mike Tyson w’imyaka 58 y’amavuko azaba akinnye bwa mbere umukino ukomeye mu myaka 20 ishize kuko muri 2004 yari yasezeye kuri uyu mukino. 

Jake Paul w’imyaka 28 ukina atarabigize umwuga amaze gukina imikino 11 mu mateka ye, aho yatsinzwe umwe gusa, akaba akomeje kwigarurira abakunzi b’uyu mukino.

Uyu mukino uteganyijwe kuba mu byiciro umunani aho buri gice kimara iminota ibiri. Abakinnyi bazakoresha ‘gants’ za "14oz" aho kuba iza "10oz" zisanzwe ku bakinnyi b’ibilo byinshi. 

Umukino uritabirwa n’abafana barenga ibihumbi 70 muri stade ifite ubushobozi bwo kwakira abantu ibihumbi 105 iyo harimo abahagaze.

Netflix iraza kwerekana uyu mukino ku nshuro yayo ya mbere mu buryo bwihariye. Abifuza kuwureba baraba bagomba kugura ifatabuguzi ry’ukwezi ku giciro cya $6.99 (10,000 Frw).

Mike Tyson uzwi cyane mu mateka y’Iteramakofe, yatwaye imikandara ya WBA, WBC na IBF mu 1987, ariko yahuye n’ibizazane bikomeye birimo gutsindwa na Buster Douglas mu 1990 na Evander Holyfield muri 1996 na 1997. 

Paul nawe ukomeje kugaragaza ubushobozi, aheruka gutsinda Nate Diaz muri Kanama 2023, nyuma yo gutsindwa na Tommy Fury muri Gashyantare uwo mwaka.

Uyu mukino utegerejweho ibintu byinshi ugiye guhuza abakinnyi batandukanye cyane mu myaka n’amateka, ariko bafite icyo bahuriyeho: Ubushobozi bwo gukurura abantu no gutanga icyizere cy’umukino w’amateka. 

Muri Texas hateganyijwe umurwano uza guhuza Mike Tyson na Jake Paul