Gutakaza kwa Miami Heat, umwana na se mu kibuga! Udushya twaranze umunsi wa mbere wa NBA

Nubwo Shampiyona yatangiye kuri uyu wa Gatatu itariki 23 Ukwakira 2024, no mu rukerera rwo kuri uyu wa Kane itariki 24 Ukwakira 2024 nabwo yakomeje nuko Miami Heat itangira itsindwa umukino wa mbere.

Mu rugo imbere y'abafana bayo, Miami Heat yatsinzwe na Orlando Magic amanota 116 kuri 97. Ni umukino warangiye mu duce tune dukinwa Miami Heat ibashije gutsinda agace ka kane gusa, mu gihe utundi twatsinzwe na Orlando Magic.

Mu yindi mikino yakinwe mu gitondo cyo kuri uyu wa Kane Detroit Pistons yatsinze Indiana Pacers amanota 115 ku 109, Atalanta Hawks yatsinze Brooklyn Nets amanota 120 ku 116, Milwaukee Bucks yatsinze Philadelphia amanota 124 ku 109.

Si iyo mikino gusa yabaye mu rukerera rwo kuri uyu wa Kane kuko Cleveland Cavalier yatsinze Toronto Raptors amanota 136 ku 106, Charlotte Hornets itsinda Houston Rockets, New Orleans Pelicans itsinda Chicago Bulls;

Memphis Grizzlies itsinda Utah Jazz, Phoenix Suns itsinda Los Angeles Lakers Clippers naho Golden State Warriors itsinda Portland Trial Blazzers.

Miami Heat yatangiye nabi imikino ya NBA umunsi wa mbere

Shampiyona nyirizina ya NBA yatangiye mu rukerera rwo kuri uyu wa Gatatu itariki 23 Ukwakira 2024. Mu mikino ibiri y’umunsi wa mbere, Boston Celtics ifite igikombe giheruka, yatangiye neza itsinda New York Knicks amanota 132-109. Jayson Tatum yigaragaje cyane kuko yatsinze amanota 37, atanga n’imipira 10 yasaruye andi manota.

Ubwo NBA yatangiraga, amateka akomeye yabereye mu mukino wa Los Angeles Lakers aho LeBron James yanditse amateka yo gukina umwaka wa 22 muri NBA, avanaho agahigo ka Vince Carter wakiniye Totonto Raptors, Brooykin Nets, Orlando Magic, Phoenix Suns, Dallas Mavericks, Grizzlies, Hawks na Sacramento Kings.

LeBron kandi yanditse andi mateka akomeye aho we n’umuhungu we Bronny James banyeganyeje isi bagakinana ku nshuro ya mbere muri NBA. Umwana yakinanye na Se mu mukino umwe, ni ubwa mbere byari bibaye mu mateka ya NBA.

Lebron James n'umuhungu we Bronny James bahuriye mu kibuga bakina shampiyona ya NBA

Kuri uyu wa Gatatu kandi ubwo Boston Celtics iheruka gutwara iki gikombe yamanukaga mu kibuga, abakinnyi bayo baserutse bambaye impeta zigaragaza ko bagiye gutangira urugendo rwisubiza igikombe. Ni impeta ibarirwa agaciro k’ibihumbi 40$, arenga Miliyoni 54 Frw.

Imiterere y’iyi mpeta yari yanditseho ijambo Celtics, rizengurutswe n’uduce 18 twa zahabu dusobanura ibikombe bya NBA iyi kipe ifite bihwanye na 18, ikaba ariyo kipe imaze kwegukana NBA inshuro nyinshi. 

Ku muzenguruko w’impeta hejuru hari handitse ijambo World, ryandikishijwe zahabu 30 zisobanura imyaka 30 iyi kipe imaze ikinira ku kibuga cyayo TD Garden.

Boston Celitics yakinanye impeta z'akataraboneka zisobanuye byinshi mu mateka yayo