Umusaruro wari imvange! Uko Abakinnyi b'Abanyarwanda bitwaye mu Cyumweru gishize

Ku wa Kane w'icyumweru gishize muri shampiyona y'icyiciro cya mbere muri Tunisia, ikipe ya Stade de Tunisien ikinamo Mugisha Bonheur yatsindaga Bizertin igitego 1-0. Muri uyu mukino uyu mukinnyi w'Umunyarwanda yabanje mu kibuga ndetse arangiza n'umukino adasimbujwe.

Kugeza ubu ikipe ya Stade de Tunisien iri ku mwanya wa 7 muri shampiyona, ikaba izasubira mu kibuga tariki ya 19 ikina na ES Sahel. Muri iyi shampiyona y'icyiciro cya mbere muri Tunisia kandi ku wa Kane w'iki Cyumweru ikipe ya Olympique Beja ikinamo Ishimwe Anicet yatsindaga JS Omrane ibitego 2-1.

Kuri uyu mukino ntabwo uyu mukinnyi w'Umunyarwanda yari yabanje mu kibuga ariko yinjiyemo asimbuye ku munota wa 70. Kugeza ubu Olympique Beja iri ku mwanya wa 2 ku rutonde rwa shampiyona, ikaba izasubira mu kibuga tariki ya 19 ikina na EGS Gafsa.

Muri shampiyona y'icyiciro cya Kabiri muri Sweden,ku wa Gatandatu ikipe ya Sandvikens IF ikinamo Byiringiro League na Mukunzi Yannick wavunitse yatsindaga Östersunds FK ibitego 3-1.

Kuri uyu mukino Byiringiro League yari ku ntebe y'abasimbura gusa ntabwo yigeze akinishwa. Kugeza ubu Sandvkens IF iri ku mwanya wa 5 muri shampiyona, ikaba izasubira mu kibuga ikina na Orgryte tariki ya 18 z'uku kwezi.

Tukiri muri iyi shampiyona y'icyiciro cya Kabiri, ku wa Gatandatu ikipe ya Gefle IF ikinamo Rafael York yatsindaga Brage ibitego 2-2. Uyu Munyarwanda yabanje mu kibuga ariko asimbuzwa ku munota wa 79. Kugeza ubu Gefle IF iri ku mwanya wa 14, ikaba izasubira mu kibuga ikina na Oddevold tariki ya 19 z'uku kwezi.

Ku munsi w'ejo ku Cyumweru muri shampiyona y'icyiciro cya mbere muri Ukraine, ikipe ya FC Kryvbas Kryvyi Rih ikinamo Bizimana Djihad yatsindwaga na Dynamo Kyiv ibitego 2-1 muri shampiyona. 

Kuri uyu mukino Kapiteni w'Amavubi yabanje mu kibuga ariko aza gusimbuzwa ku munota wa 67. Kugeza ubu FC Kryvbas Kryvyi Rih iri ku mwanya wa 8, ikaba izasubira mu kibuga ikina na Zorya Luhansk tariki ya 20 z'ukwezi kwezi.

Muri shampiyona y'icyiciro cya mbere muri Azerbaijani mu ikipe ya FC Zira ikinamo Mutsinzi Ange,ku munsi w'ejo ku Cyumweru yatsindwaga na Turan igitego 1-0. Uyu myugariro w'Amavubi yari yabanje mu kibuga ndetse nta nubwo yigeze asimbuzwa.

Kugeza ubu FC Zira iri ku mwanya wa 4, ikaba izasubira mu kibuga ikina na tariki ya 20 ikina na Sabah. 

Ku wa Gatandatu ikipe ya AEL Limassol ikina shampiyona y'icyikiro cya mbere muri Cyprus ikina inakinamo Imanishimwe Emmanuel Manguende yatsindaga Ethnikos Achna FC ibitego 5-2. 

Kuri uyu mukino uyu myugariro w'Amavubi yari yabanje mu kibuga ariko aza gusimbuzwa ku munota wa 61. Kugeza ubu AEL Limassol iri ku mwanya wa 6, ikaba izasubira mu kibuga ikina na Nea Salamina tariki ya 21 z'uku kwezi.

Muri shampiyona y'icyiciro cya mbere muri Macedonia mu ikipe ya AP Brera Strumica ikinamo Rwatubyaye Abdul,ku wa Gatandatu yatsindwaga na FC Shkupi ibitego 3-1. Kuri uyu mukino bakinagamo n'ikipe aheruka kuvamo uyu myugariro w'Umunyarwanda ntabwo yabanje mu kibuga ariko yinjiyemo asimbuye ku munota wa 61.

Kugeza ubu ikipe ya AP Brera Strumica iri ku mwanya wa 7, ikaba izasubira mu kibuga ikina na Voska Sports taliki ya 20 z'ukwezi.

Ku wa Gatandatu ikipe ya Raal La Louviere ikina muri shampiyona y'icyiciro cya Kabiri mu Bubiligi ikanakinamo Samuel Gueulette yanganyaga na RWD Molenbeek igitego 1-1.

Kuri uyu mukino uyu mukinnyi w'Umunyarwanda yari yabanje mu kibuga aza gusimbuzwa ku munota wa 46. Kugeza ubu RAAL La Louvière iri ku mwanya wa Kane, ikaba izasubira mu kibuga ikina na Beveren tariki ya 18.

Muri shampiyona y'icyiciro cya kabiri muri Leta Zunze Ubumwe za Amerika ikipe ya Rhode Island ikinamo Jojea Kwizera ku munsi w'ejo ku Cyumweru yatsindaga Tampa Bay Rowdies ibitego 3-1. 

Kuri uyu mukino ntabwo uyu mukinnyi w'Umunyarwanda yabanje mu kibuga ndetse nta nubwo yari ku ntebe y'abasimbura. Kugeza ubu Rhode Island iri ku mwanya wa 5, ikaba izasubira mu kibuga tariki ya 13 ikina na Loudun United.

Tukiri muri iyi shampiyona Kkandi ikipe ya One Knoxville SC ikinamo Nshuti Innocent ku munsi w'ejo ku Cyumweru yanganyaga na Chattanooga Red Wolves SC igitego 1-1. 

Uyu rutahizamu w'Amavubi yari yabanje mu kibuga aza gusimbuzwa ku munota wa 61. Kugeza ubu One Knoxville SC iri ku mwanya wa Gatandatu, ikazasubira mu kibuga tariki ya 16 z'uku kwezi ikina na CV Fuego.