Inzu 10 z'Imideli zihenze cyane ku Isi mu 2024

Kuba amoko ari menshi, bivuze ko binarangwa n’ ibimenyetso by’inganda cyangwa se kompanyi (company) zibikora zitandukanye. Impamvu ni uko ubu kugura nk’umwenda bitagihagije gusa, ahubwo ari n’ ingenzi kumenya ngo ese uyu mwenda ni uw’iyihe kompanyi mu zikora imyenda?.Abacuruza nabo, ntabwo ushobora gusanga bagurisha kimwe muri ibi, uretse ko biba bifite ikimenyetso (brand) kiranga kompanyi (company) yabikoze.

Isi irahindagurika amanywa n’ijoro. Ubu, abantu mu ngeri zose, urasanga batakibona umwenda nk’ ikintu cyo gushyira ku mubiri ngo wambare wikwize hanyuma ugende. Ahubwo ubu, turashaka kugaragara nk’abakire, abantu basirimutse tubinyujije mu myambarire, ibikoresho dufite ndetse n’ibindi biturimbisha.

Ibyo rero, byahaye inganda  (company) zikora iyo myenda ndetse n’ibyo bikoresho akazi ko guhangana ndetse no kurwanira isoko rigari. Abo, babikuramo amafaranga atagira uko angana, kubera ko gusa wowe uguze nk’umupira wanditseho ikimenyetso runaka, ugatanga amafaranga yagura indi mipira nk’itatu cyangwa se irenze.

Dore amazu 10 y'imideli akomeye kandi ahenze ku Isi mu 2024;

1.  Louis Vuitton

U Bufaransa buranganje mu kwambika abantu. Louis Vuitton, ikaba nayo ikorera mu Bufaransa i Paris. Iyi, ikaba imwe mu nzu zambika abantu zikomeye ku Isi. Ikaba ifite ububiko bugera kuri 400 mu bihugu 50 ku Isi hose.

Louis Vuitton, uyibwirwa n’ izi nyuguti zitangira aya magambo (LV), akensi ziba ziri mu ibara rya zahabu. Ku bw’ubunararibonye ndetse no gukora ibintu byiza kandi bihenze ku Isi, iyi kompanyi ikaba ihagaze agera muri Miliyari 46.5 z'Amadolari.

2. Chanel

Inzu y'imideli ya Chanel irangwa n'ikimenyetso k'inyuguti 2 za C zifatanye, ni imwe mu zubatse izina ku rwego mpuzamahanga. Yatangijwe mu 1910 mu Bufaransa ishinzwe n'umudozi w'imyeda kabuhariwe Coco Chanel.  Izwiho gukora amashakoshi, imyenda, inkweto n'imibavu bihenze. Kuva mu 2018 yaguzwe n'abavandimwe babiri aribo Alain na Gerard Wertheimer. Kugeza ubu ihagaze Miliyari 32.1 z'Amadolari.

3. Gucci

Iyi, abenshi barayizi ndetse n’ibyo ikora benshi ni byo bambara bakanakoresha cyane, nk’ ibikapu n'inkweto ubu usanga abasore n’inkumi bafite ibyinshi ni Gucci. Iyi, ikaba ituruka mu Butaliyani i Florence, akaba ari naho ifite icyicaro gikuru. Guccio Gucci, niwe niyiri gutangiza Gucci nk’ uko n’izina rye ribigaragaza. 

Ikaba izwiho gutunganya ibicuruzwa (ibikoresho) bikozwe mu mpu, ikora ndetse n’ imyambaro y’abana, abagabo ndetse n’abagore. Ikora imibavu ihumura neza, ibikoresho bitandukanye, inkweto ndetse n’ibindi. Gucci, abenshi bayiziho ibikapu n’amasakoshe matoya, bikozwe mu mpu no mu mabara abereye ijisho. Uko kuneza abakiriya, bakora ibintu byiza, bihesha Gucci kuba ku mwanya wa 3, ndetse n’agaciro ka  Miliyari 25.5 z'Amadolari.

4. Hermes

Inzu y'imideli Hermes nayo iri mu zigezweho kandi nayo iherereye mu Bufaransa kuva yashingwa mu 1837 ishinzwe na Thierry Hermes. IkorA imyenda, ibikapu, inkweto, imirimbo y'ubwiza n'ibindi. Mu 2024 ihagaze Miliyari 21.6 z'Amadolari.

5. Prada

Ni kompanyi y'imideli yihariye mu gukora ibikapu by'abagabo n'amashakoshi y'abagore. Ifite icyicaro gikuru mu mujyi wa Milan mu Butaliyani, yashinzwe na Mario Prada mu 1914. Izwiho kandi gukora ibikoresho byo kwifashisha mu ngendo z'indenge. Kugeza ubu ihagaze Miliyari 13.6 z'Amadolari.

6. Nike

Iyi kuva kera yamamaye mu gukora inkweto z'abagabo n'abagore n'abana. Icyicaro cyayo muri Oregon ho muri Leta Zunze Ubumwe za Amerika. Yashinzwe mu 1964, ishinzwe n'abagabo babiri aribo Bill Bowerman na Phil Knight. Mu 2024 ihagaze Miliyari 13..3 z'Amadolari.

7. Ralph Lauren Corporation

Uretse kuba iyi nzu y'imideli ikora imyenda, inkweto n'imibavu, inakora ibikoresho by'ubwiza by'abagore. Yashinzwe mu 1967 na Ralph Lauren, umuhanga mu guhanga imideli. Ifite icyicaro mu mujyi wa New York ndetse uyu mwaka ihagaze Miliyari 9.2 z'Amadolari.

8. Armani

Ni indi nzu y'imideli izwiho kwambika ibyamamare byinshi birimo nka Messi, Beyonce, Michelle Obama n'abandi. Yashinzwe n'umutaliyani kabuhariwe mu mideli Giorgio Armani mu 1975. Uretse gukora imyambaro n'imirimbo, inakora imitako yo mu nzu. Ihagaze Miliyari 7.6 z'Amadolari.

9. Adidas

Iyo havuzwe inganda zikora inkweto nziza benshi bavuga Adidas, nibyo koko uru ruganda rumaze igihe rukora inkweto n'imyenda ya siporo. Yashinzwe mu 1924 mu Budage ishinzwe n'umugabo witwa Adolf Dassler. Kugeza ubu imaze imyaka 100 ikora ndetse ihagaze Miliyari 6.8 z'Amadolari.

10. Michael Kors

Umuhanzi w'imideli Michael David Kors ukomoka mu Bufaransa yashinze inzu y'imideli yitwa Michael Kors yambika cyane abagore dore ko imyenda akora myinshi ari amakanzu y'ibirori. Iyi nzu yayitangije mu 2002, kugeza ubu ihagaze Miliyari 6.2 z'Amadolari.