Bamwita Messi wa Turkey! Ibyo wamenya kuri Arda Güler utera umupira muri Euro bikizihira Real Madrid

Ubwo Turkey yakinaga na Georgia muri Euro, Arda Güler yatsinze igitego cyatumye aba umukinnyi muto watsinze igitego muri Euro. 

Arda Güler yavukiye muri Altındağ, Ankara muri Turkey,  ku itariki 25 Gashyantare muri 2005. Akomoka ku babyeyi nabo bakomoka muri Turkey, ari bo Umit Guller na Serap Guller.

Ubwo yari afite imyaka icyenda muri 2014, Arda Güler yatangiye gukina umupira w'amaguru, atangirira mu ishuri ry'abakiri bato rya Gençlerbirliği muri Turkey, ayikinira kuva muri 2014 kugera muri 2019.

Ubwo muri 2019 yatandukanaga na Gençlerbirliği Academy, yerekeje muri Fenerbahce naho mu bakiri bato, ayikinira kugera muri 2021 ubwo yatangiraga gukinishwa mu ikipe nkuru ya Fenerbahce, aho yatangiye gutazirirwa izina rya Messi wa Turkey.

Kuva muri 2021 Arda Güler yatangiye gukinira Fenerbahce nk'umukinnyi wabigize umwuga. Muri 2023 Real Madrid yaramubengutse, ihitamo kumujyana kuri Santiago Bernabeu.

Akiri muri Fenerbahce, Arda Güler yakinnye imikino 32 atsinda ibitego birindwi. Kuva yagera muri Real Madrid mu mpeshyi ya 2023, amaze kuyikinira imikino 10, afite ibitego bitandatu.

Kuva muri 2021, Arda Güler yatangiye gukinira Turkey y'Abatarengeje imyaka 17, akaba yarayikiniye imikino 10 atsindamo ibitego bine.

Mu ikipe y'igihugu nkuru ya Turkey, Arda Güler yatangiye kuyikinira kuva mu mwaka wa  2022, amaze kuyikinira imikino umunani no kuyitsindira ibitego bibiri.

Umunya Turkey ukinira Real Madrid mu kibuga hagati, Arda Güler, afatwa nka Messi wa Turkey 

Arda Güler ni we mukinnyi muto watsinze igitego muri Euro 

Real Madrid yishimira kuba ifite umukinnyi nka Arda Güler