Liverpool yatsinzwe na Everton ibitego bibiri ku busa, isa n'aho imanitse amaboko mu gikombe cya shampiyona, naho Manchester United itsinda Sheffield United.
Mu mujyi wa Liverpool kuri Goodison Park, niho Liverpool yatakarije icyizere cyo kwegukana igikombe cya Shampiyona "English Premier League", nyuma yo gutsindwa na Everton ibitego bibiri ku busa, ikipe nayo ibarizwa mu mujyi wa Liverpool.
Liverpool imaze gukina imikino 34 muri English Premier League, ubu irarushwa amanota atatu na Arsenal ya mbere, ikarusha inota rimwe Man City ya gatatu, gusa Man City yo ikaba igifite ibirarane bibiri.
Nyuma yo gutsinda Liverpool, Everton yahise ifata umwanya wa 16 n'amanota 33, ikomeza gushimangira ko nubwo yigeze gukurwaho amanota 10 itazamanuka mu cyiciro cya kabiri.
Ibi Everton yabigezeho ku bitego bibiri ku busa bwa Liverpool, ibitego byinjiye ku munota wa 27 na 58, bitsinzwe na Dominic Calvert-Le win na Jarrad Branthwaite.
Mu wundi mukino wabereye kuri Old Trafford, Manchester United yabonye amanota atatu nyuma yo gutsinda Sheffield United ibitego bine kuri bibiri.
Sheffield United niyo yabanje gufungura amazamu ku gitego cya Jayden Bogle yatsinze ku munota wa 35, nuko myugariro Harry Maguire yishyura ku munota wa 42.
Igice cya mbere cyarangiye ari igitego kimwe kuri kimwe, abafana ba Manchester United bakomeza kwinuba umutoza wabo.
Mu gice cya kabiri Sheffield United niyo yahise ibona igitego cya kabiri mbere, kuko ku munota wa 50 Ben Brereton Diaz yari yamaze gutsinda igitego cya kabiri mu izamu rya Man United.
Ku munota wa 61 na 81 Kapiteni Bruno Fernandez yatsindiye Manchester United ibitego bibiri, itangira kuyobora umukino n'ibitego bitatu kuri bibiri bya Sheffield United.
Umunya Denmark Rasmus Hojlund ku munota wa 85 yatsindiye Manchester United igitego cya Kane, nuko umukino urangira Manchester United yongeye kubona amanota gatatu.
Gutsinda uyu mukino, byatumye Manchester United ifata umwanya wa Gatandatu n'amanota 53, ibintu bitagize icyo biyimarira kubera ko ikirushwa amanota arindwi na Tottenham ya Gatanu.
Nyuma yo gutsindwa na Everton ibitego bibiri ku busa bwa Liverpool, kwa Liverpool bamaze gutakaza icyizere muri English Premier League
Harry Maguire, Bruno Fernandez na Rasmus Hojlund bongeye gufasha Manchester United kubona amanota atatu
Eng
RSS 
TANGA IGITECYEREZO