CANAL+ yakoze impinduka kuri Televiziyo zo mu Rwanda ndetse yakira indi nshya - AMAFOTO

Ibi byabaye mu kiganiro n'itangazamakuru cyabaye kuri uyu wa Gatanu, kibera muri Car Free Zone mu mujyi wa Kigali. Kuri ubu Televiziyo zo mu Rwanda zari mu myanya ya 380 kuzamura, zigomba kumanuka zijya mu myanya ibanza aho zigomba gukurikirana nk'uko byari bimeze, Televiziyo y'igihugu ikaba ariyo ibanza.

Ubuyobozi bwa Canal + kandi bwakiriye Televiziyo nshya ya ISHUSHO TV, igomba gutangira kugaragara kuri CANAL + mu minsi iri imbere.

Ntabwo ari ibyo gusa kuko ubuyobozi bwa CANAL bwamaze impungenge abakiriya bayo bibazaga uko bazareba imikino ya UEFA Champions League izakinwa umwaka utaha mu isura nshya. Imikino ya UEFA Champions League igeze aho rukomeye kuko amakipe yabashije kugera muri ¼ yamaze kumenya ayo azahura nayo mu nzira igana ku gikombe.

Impuzamashyirahamwe y’Umupira w’Amaguru ku mugabane w’i Burayi yakoze impinduka mu irushanwa ry’amakipe yabaye aya mbere iwayo (UEFA Champions League) zirimo kongera amakipe akaba 36 ndetse n’uburyo bw’imikinire bukaba bwahindutse.

Mu kiganiro cyatanzwe na CANAL+ Rwanda kuri wa Gatanu, tariki ya 15 Werurwe 2024, ubwo yegeraga abakiriya bayo ahazwi nko muri Car Free Zone yaboneyeho kuborohereza iyo mikino no kubamara impungenge ku irushanwa rikurikira.

Umuyobozi Mukuru wa CANAL+ Rwanda, Sophie Tchatchoua, yavuze ko mu ntego yabo bahisemo gukomeza kwegereza Abanyarwanda ibyiza binyuze muri gahunda yashyizweho ya ‘Ibyiza ku Bawe’.

Ati “Twahisemo kubereka Shampiyona zose zikomeye i Burayi. Icyo tugira ngo dushyireho umucyo ni uko tugifite Champions League. Umwaka utaha ntabwo imikino yose tuzayibona ariko imikino myiza tuzaba tuyifite kuko tuzahera muri ⅛.”

Kuva mu mwaka w’imikino wa 2024-25 buri kipe izajya ikina n’amakipe umunani atandukanye aho izajya ikina imikino ine mu rugo ndetse n’indi ine hanze, nyuma habarwe amanota yagize.

"Ibyiza ku Bawe", ni gahunda ya CANAL + igamije guha ibyiza byose bishoboka abakiriya bayo ndetse n'abandi bashya 

Muri uku kwezi kwa Werurwe, Televiziyo zigera kuri 5 zirimo na KC2  zizatangira kugaragara mu buryo bwa HD 

Kuri ubu kandi, uragura ifatabuguzi wari usanganwe ukongezwa iminsi 15 y'ubuntu wirebera CANAL +