Sheebah Karungi yagiriye inama Kataleya na Kandle batazi iyo berekeza mu muziki

Mu minsi yashize nibwo byamenyekanye ko Kataleya na Kandle batameranye neza n'abarebereraga inyungu zabo mu muziki, bikaba byaratumye aba bakobwa batuza cyane ntibongere kugaragara, ibintu byateye benshi agahinda harimo na Sheebah Karungi nawe wigeze guhura n'ibibazo nk'ibyo.

Ubwo yari abajijwe icyo yaba abiziho ku gutuza cyane, yavuze ko yagerageje kuvugana n'abantu batandukanye ngo amenye gitera yabyo ariko akaba ataramenya imvano yabyo nyamukuru, ariko akaba akeka ko bashobora kuba barahuye n'ibibazo yigeze guhura nabyo mu myaka yo hambere mu muziki we.

Yavuze ko iyo abahanzi bagiranye ibibazo n'abareberera inyungu zabo, bishobora kugira ingaruka zikomeye ku muziki wabo kuko usanga kenshi bibagora kubona aho bahera batangira kwikorana.

Sheebah Karungi yagiriye inama aba bakobwa kwicara hamwe bagashyira ku meza buri kimwe cyose bifuza gukora no kugeraho hanyuma bakakiganiraho byimbitse. Aha harimo kuganira ku ntego bumva bafite kugeraho mu muziki, ibyifuzo byabo ndetse kandi batibagiwe n'uburyo bazabigeraho.

Sheebah agira ati" Ibya bariya bana narabyumvise bintera impuhwe nyinshi cyane, mu by'ukuri ni abana bafite impano ikomeye ariko ibyo bari kunyuramo ntabwo byoroshye na gato. Ikintu kiba gisigaye ni ukwicara hamwe bakaganira ku iterambere ryabo, bakirinda gutekereza cyane ku byo bakorewe byabaye imyaka yatambutse kuko nabyo bishobora kubasubiza inyuma".

Avuga ko ubundi biba bigoye cyane gutandukana n'abantu bagufashaga hanyuma ugatangira urugendo rwawe wenyine, ibintu  bituma ucika intege ariko nk'umuntu uzi kandi afite icyo ashaka kugeraho mu buzima bwe, aba agomba kwishakira inzira'.

Sheebah Karungi yagiriye inama itsinda ry'abahanzikazi Kataleya na Kandle batazi iyo berekeza mu muziki

Kataleya na Kandle baburiwe irengero nyuma yo gushwana n'ababarebereraga inyungu

Bari mu bahanzikazi batanga icyizere mu muziki