Uduhigo 10 tubi Erik Ten Hag amaze kugeza kuri Manchester United

Erik Ten Hag yinjiye mu ikipe ya Manchester United mu mwaka wa 2022 yitezweho kuba igisubizo cy'ibibazo byari bimaze igihe mu ikipe ya Manchester United dore ko iyi kipe iheruka gutwara igikombe kimwe mu bikomeye ku mugabane w'iburayi mu myaka ya cyera.

Impamvu yatumye Erik Ten Hag aza mu ikipe ya Manchester United ni imibare myiza yari afite i burayi mu ikipe ya Ajax aho yari asanzwe atoza kandi nta bakinnyi b'ibitangaza n'amazina akomeye yari afite icyo gihe. Aha buri wese yamubonagamo ubushobozi buhambaye kuba yashobora guhangana mu ikipe ikomeye imuha byose yifuza.

Nyuma yo gusinya no kwirata ibigwi ko agiye guhangamura ibikorwa bya Jurgen Kloop wa Liverpool na Pep wa Manchester City, Erik Ten Hag yatangiye guca uduhigo tubi tutigeze tubaho mu ikipe ya Manchester United kuva yabaho cyangwa se hakaba hari haciyeho igihe kirekire cyane.

Dore tumwe mu duhigo tubi Erik Ten Hag yibitseho muri Manchester United:

1. Ikipe ya Galatasaray ntabwo yigeze itsindira mu Bwongereza mu myaka 117 yari ishize kugeza ubwo Erik Ten Hag ageze muri Manchester United.
2. Manchester United ntabwo yari yarigeze itsindwa imikino ibiri ifungura irushanwa rya Campions League. Ten Hag ahageze yaciye ako gahigo.
3. Manchester United ntabwo yari yarigeze itsindwa ibitego birenze bitatu mu mikino yikurikiranya mu irushanwa rya Champions League kugeza Ten Hag ageze Old Trafford.
4. Galatasaray yaherukaga gutsinda igitego hanze y'ikibuga cyayo mu mikino ya Champions League mu mwaka wa 2015 kugeza ubwo ihuye na Mnachester United iyirasa ibitego bitatu byose.
5. Manchester United ntabwo yari yarigeze mu mateka yayo itsindwa imikino ine mu mikino irindwi ibanza ya shampiyona y'u Bwongereza kugeza Erik Ten Hag ahageze.
6. Manchester United yeherukaga gutsindwa ibitego bine mu mikino y'amatsinda mu irushanwa rya Champions League mu myaka 28 ishize. Erik Ten Hag yongeye kwibutsa abafana ba Manchester United ko byigeze kubaho.
7. Manchester United ntabwo yigeze itakaza umukino n'umwe kuri sitade ya Tottenham Hotspurs ariko Ten Hag yanga gukatira ako gahigo aba agakuyeho agashyira mu tundi duhigo.
8. Manchester United ntabwo yari yarigeze itsindwa ibitego bibiri mu minota ine y'umukino bakiniye ku kibuga cya Old Trafford kugeza ubwo Erik Ten Hag abikoreye.
9. Nta wundi mutoza wigeze uhombya nyiri ikipe ya Manchester United nk'uko Ten Hag amaze kubikora mu gihe gito. Sir Ractliffe amaze guhomba arenga Miliyari 1.5 y'amayero kubera ikipe iri mu bihe bitameze neza.
10. Manchester ntabwo yari yarigeze iterwa amashoti 23 mu mukino bakiriye mu irushanwa rya Shampiyona y'u Bwongereza kugeza aho Ten Hag agaragaje ko byose bishoboka.
11. Brighton ntabwo yari yarigeze itsinda ikipe ya Manchester United mu mikino ibiri yikurikiranya kugeza aho ifatiranye Ten Hag.
12. Ikipe ya Manchester United yaherukaga gutsindwa imikino 5 mu mikino 10 bakiriye mu mwaka wa 1930. Ten Hag yongeye gusogongeza abafana ba Manchester United ibyo bihe bya cyera.

Uduhigo Ten Hag amaze gukuraho ni twinshi dore ko aheruka gukoza isoni Sir Alex Ferguson wigeze gutangaza ko ikipe ya Manchester City itazigera igira akarima k'igikoni ikipe ya Manchester United akiriho. Kuri ubu, Manchester City igaragura buri munsi Manchester United, Sir Alex mu mbaraga nke arimo areba.

Kubw'iyi mibare yose no gukomeza guta ikipe mu mpanga, ibinyamakuru byinshi byatangaje ko ubuyobozi bw'ikipe ya Manchester United bwamaze kugirwa inama yo gutandukana n'uyu mutoza bagashaka undi wabasha kuzanzamura iyi kipe yahoranye ubushongore n'ubukaka.

Mu mwaka ushize yegukana umwanya wa kane, Erik Ten Hag yijeje abafana ba Manchester United ko uyu mwaka ari umwe mu bazahatanira igikombe ndetse ahabwa amafaranga yo kugura abakinnyi yifuzaga barimo umuzamu Andre Onana, rutahizamu Rasmus Hojlund, umukinnyi mu kibuga hagati Sofian Amrabat ariko gutanga umusaruro birabihisha.

Amasezerano ya Erik Ten Hag azarangira mu mwaka wa 2025 akaba asanzwe afata Miliyoni 9 z'amayero ni ukuvuga arenga Miliyari 12 Rwf ku mwaka w'imikino (Season).

Erik Ten Hag yageze mu ikipe ya Manchester United mu mwaka wa 2022 asinya imyaka itatu agahembwa Miliyoni 9 z'amayero

Erik Ten Hag amaze gukora amahano atagira ingano mu ikipe ya Manchester United