Ese Harry Kane yaba ari Rutahizamu utera umwaku ?

Harry Kane yageze muri Bayern Munich mu gufasha iyi kipe kuyitsindira ibitego, gusa nawe ku ruhande rwe byari nk'ubuhungiro, kuko yari yaratsinze ibitego byinshi muri Tottenham Hotspurs, gusa nta gikombe na kimwe yigeze atwarana nayo.

InyaRwanda Sports yibajije kuri uyu mukinnyi utsinda ibitego n'agatego, ariko amakipe yose akiniye akagorwa no gutwara ibikombe - abyumva mu mateka.

Harry Kane ntabwo yashoboye kwegukana igikombe icyo ari cyo cyose haba muri Tottenham Hotspurs, mu ikipe y'igihugu y'u Bwongereza no muri Bayern Munich.

Akigera muri Bayern Munich, abakunzi be bari bazi ko agiye kwandikwaho igikombe cye cya mbere mu mateka, gusa ikibabaje ni uko umukino wa mbere Harry Kane yakinnye muri Super Cup, Bayern Munich yatsinzwe ba RB Leipzig ibitego bitatu ku busa.

Indi mpamvu yatumye twibaza kuri uyu rutahizamu, ni uko amaze gutsindira Bayern Munich ibitego 31 muri uyu mwaka w'imikino, kandi Bayern Munich ikaba isa n'aho nta gahunda ifite yo kwegukana igikombe icyo ari cyo cyose muri uyu mwaka w'imikino.

Bayern Munich ikomeje kurwana n'iminsi ubwo iri gutsindwa umusubirizo, ndetse ikananganya imikino mu buryo budasobanutse. Abasesenguzi, ibi byose babishinja ko umutoza wayo Thomas Tuchel adafite ubushobozi bwo gutoza Bayern Munich.

Kugeza ubu Bayern Munich irarushwa amanota arindwi na Bayer Leverkusen iri ku mwanya wa mbere. Birasa nk'aho Bayer Leverkusen izegukana shampiyona, igikombe Bayern Munich yari imaze imyaka irenga 10 ikiharira nta yindi kipe bagisangira mu Budage.

Imibare igaragaza ko Harry Kane ajya akinira amakipe akomeye, yanatwaye ibikombe, ariko muri icyo gihe aba ari kumwe na Harry Kane, igikombe bikabura. 

1. Mu ikipe y'igihugu y'u Bwongereza

Harry Kane nta gikombe na kimwe aratwarana n'ikipe y'igihugu y'u Bwongereza, kandi ibitego ntabwo asiba kubitsindira iki gihugu. 

Harry Kane yakiniye ikipe y'igihugu y'u Bwongereza imikino 21 yo gushaka itike ya Euro. Imikino ya Euro yo ikipe y'igihugu y'u Bwongereza ntabwo isiba kuyitabira. Muri iyo mikino 21, yatsinze ibitego 23. 

Mu mikino yo gushaka itike y'igikombe cy'isi yose hamwe, Harry Kane yakiniye Ubwongereza imikino 14, akaba yaratsinze ibitego 17.

Ikipe y'igihugu y'u Bwongereza nta gikombe cy'isi cyangwa Euro iregukana ikinirwa na Harry Kane, kandi uyu mukinnyi ni umwe mu bayitsindiye ibitego byinshi.

Harry Kane mu gikombe cy'isi, yakiniye u Bwongereza imikino 11, atsinda ibitego 8 muri rusange. Nta gikombe cy'isi arafasha u Bwongereza gutwara.

Muri Euro, Harry Kane yakiniye u Bwongereza imikino 11, ayitsindira ibitego 4. Nta Euro Harry Kane arafasha u Bwongereza gutwara.

Harry Kane nta gikombe na kimwe yigeze ayifasha ikipe y'igihugu y'u Bwongereza kwegukana 

2. Tottenham Hotspurs

Harry Kane, yakiniye Tottenham Hotspurs imikino itandukanye mu marushanwa anyuranye, gusa nta gikombe yayifashije gutwara, kandi ntabwo yahwemye gutsinda ibitego.

Mu mukino ya English Premier league yakiniye Tottenham Hotspur imikino 306, ayitsindira ibitego 210, gusa nta English Premier League uyu mukinnyi yafashije Tottenham Hotspurs kwegukana.

Muri UEFA Champions League nabwo yakiniye Tottenham Hotspur imikino 32, ayitsindira ibitego 21, gusa nta UEFA Champions League yigeze afasha iyi kipe kwegukana.

Muri Clabao Cup, Harry Kane yakiniye Tottenham Hotspur imikino 19, ayitsindira ibitego 6, ntabwo yafashije iyi kipe kwegukana iki gikombe.

Muri Europa League naho Harry Kane yakiniye Tottenham Hotspur imikino 19, ayitsindira ibitego 15 muri rusange, gusa ntabwo yigeze afasha Tottenham Hotspurs kwegukana Europa League.

Harry Kane yatsinze ibitego byinshi muri Tottenham Hotspurs, gusa Nta gikombe na kimwe yigeze ayifasha gutwara 

3. Bayern Munich

Harry Kane, uyu ni umwaka we wa mbere muri Bayern Munich,  igikombe cya Super Cup cyo cyamaze kumuca mu myanya y'inyoki abireba. Amaze gukinira Bayern Munich amarushanwa atandukanye, nandi nabwo iyi kipe nta rushanwa na rimwe ihabwa amahirwe yo kwegukana. 

Muri Bundesliga, Harry Kane amaze gukinira Bayern Munich 24, amaze kuyitsindira ibitego 27. Bayern Munich ntabwo ihabwa amahirwe yo kwegukana icyo gikombe, kuko irushwa amanota arindwi na Bayer Leverkusen, iki cyumweru gishobora kurangira yabaye amanota 10.

Muri UEFA Champions League, Harry Kane amaze gukinira Bayern Munich imikino 7 atsinda ibitego 4, kugeza ubu Bayern Munich iri mu nzira yo kuvamo kuko umukino wa kimwe cya munani ubanza yatsinzwe na Lazio igitego kimwe ku busa.

Ese Harry Kane udasiba gutsinda ibitego, yaba atera umwaku? Ko akina mu makipe akomeye kandi azi uburyohe bw'igikombe, we abura iki ngo abe afite igikombe.

Ibi byibazwagaho akiri muri Tottenham Hotspurs, gusa biragaragara ko uyu mwaka nawo ushobora kuba mubi kuri Harry Kane.

Harry Kane utaregukana igikombe na kimwe mu buzima bwe uyu mwaka bisa n'aho bizongera kwanga