Gukorera indirimbo Meddy yabifataga nk’ibidashoboka! Ikiganiro na Yannick, Producer mushya muri USA

Ni imwe mu ndirimbo Meddy yari amaze igihe ararikiye abafana be n’abakunzi b’umuziki muri rusange. Iba indirimbo ya kabiri yakoranye na Adrien Misigaro, nyuma y’indirimbo yari imaze imyaka umunani bombi bahuriyemo bise ‘Ntacyo nzaba’.

Kuri Meddy, igihe cyari kigeze kugira ngo bombi bongere guhurira mu ndirimbo yo gusaba abantu kurangamira ingoma y’ijuru, no kugaragaza ko umunezero uba muri Kristo ntahandi wawusanga.

Mulume Yannick [Yannick] wakoze iyi ndirimbo avuka ku babyeyi bafite inkomoko muri Repubulika Iharanira Demokarasi ya Congo (RDC), ariko we yavukiye kandi akurikira i Nyamirambo mu Mujyi wa Kigali.

Ubu hashize imyaka itandatu yimukiye muri Leta ya Dallas muri Leta Zunze Ubumwe za Amerika n’umuryango we, kuko bahagaze mu 2017.

Mu kiganiro na InyaRwanda, Yannick yavuze ko gukurira mu rusengero rwa Impact Mission Church biri mu byamufashije kwinjira mu mwuga wo gutunganya indirimbo, kandi ko asanzwe ari n’umuramyi wakuriye muri korali y’abana bato.

Ati “Nakuze ndirimba muri korali y’abana, n’ubu ndacyayobora mu kuramya no guhimbaza, ku rusengero. Gutunganya indirimbo byaturutse ku itsinda naririmbagamo ryitwa ‘Spritual Brothers’, aho twahimbaga indirimbo, ariko twashaka kujya kuzifatira amajwi (Audio) tugakomwa mu nkokora n’ubukene bw’amafaranga.”

Uyu mugabo avuga ko bagiye bagorwa cyane no kubona amafaranga yo gukoresha indirimbo, bituma agira umuhate wo gushaka kumenya ‘uko indirimbo zikorwa’. Ati “Nashatse kumenya ababikora, uko babikora.”

Yavuze ko yaririmbaga muri ririya tsinda, mu gihe Meddy yari ku gasongero k’abahanzi bakomeye mu Rwanda, bigatuma ahorana inyota yo kumenya uko indirimbo zikorwa. 

Ati “Numvaga ibihangano bya Meddy, ukumva ibihangano bya Beauty for Ashes, itsinda rya Olivier Kavutse n’abandi… Iyo wumvise indirimbo zabo nka ba Dudu, nkumva ni ibintu bintera ishyaka ryo kumenya kwikorera indirimbo.”

Yannick yiyemeje gutangira urugendo rwo gukorera indirimbo abahanzi, arushyizemo imbaraga kubera ko yabonaga ari ibintu byatanga umusaruro, yaba kuri we ndetse no ku itsinda ryo kuramya no guhimbaza Imana yabarizwagamo.

Ntabwo indirimbo yakoreye Meddy ariyo yamwinjije mu kibuga cy’umuziki, kuko asanzwe afite indirimbo nyinshi yakoreye abarimo Adrien Misigaro n’abandi.

Yavuze ko ‘Niyo ndirimbo’ yakoreye Meddy yatumye ‘abantu batangira kumenya ko nkora umuziki’. Ati “Ndatekereza maze imyaka ibiri ndi gukora mu buryo buhoraho.”

Uyu mugabo asobanura ko akigera muri Amerika yafashe igihe kingana n’imyaka ibiri yiga ku ishuri rimwe ribarizwa muri Dallas ibijyanye no gukora ‘Audio’. Yasabwaga kwiga imyaka ine muri ririya shuri, ariko akomwa mu nkokora na Covid-19.

Gukorera indirimbo Adrien Misigaro byamugejeje kuri Meddy:

Yannick asobanura ko atari koroherwa no kugera kuri Meddy, ariko ko kubera ibihangano binyuranye yagiye akorera Adrien Misigaro byatumye yisanga mu biganza bya Meddy.

Ati “Meddy ni inshuti ya hafi na Adrien Misigaro, kandi Misigaro hari indirimbo zirenga eshanu namukoreye. Muri iki gihe urebye wasanga indirimbo nyinshi zimaze gusohoka za Adrien ari njye wazikozeho, ubwo urumva Meddy we nawe yumvise ibyo ndi gukora arabishima cyane.”

Yannick asobanura ko yahuye na Meddy nyuma y’uko atangaje ko atangiye urugendo rw’indirimbo zo kuramya no guhimbaza Imana.

Yibuka ko yahuye na Meddy yitegura gufata amashusho y’indirimbo ye yise ‘Grateful’ mu 2022. Ati “Ndatekereza muri uriya mwaka ari bwo twahuye, kandi ubwo hari hashize igihe tugerageza, ariko bidahura, kandi nawe atuye muri ibi bice bya Dallas. Twaje guhura bigizwemo uruhare na Ernesto.”

Yannick avuga ko akimara guhura na Meddy bagiranye ibiganiro byasize uyu muhanzi asigaye yifashisha ‘Band’ ye mu ndirimbo zinyuranye. 

Kuri we, ni ‘umugisha ukomeye kuba narahuye na Meddy tugatangira no gukorana’. Ati “Ni umugisha kuba natwe turi muri uru rugendo rwo gukorana na Meddy. Ntabwo wabyumva, ni umugisha.”

‘Niyo Ndirimbo’ yatangiye ari igitekerezo cya Adrien Misigaro

Yannick yabwiye InyaRwanda ko Adrien Misigaro ariwe watangije umushinga wo gukora indirimbo ihimbaza Imana, hashize igihe aza guhuza imbaraga na Meddy. 

Ati “Yatangiye ari igitekerezo giturutse kuri Adrien, turicara, dutangira kuyikoraho. Meddy nawe nawe azana igitekerezo cye, mbese uko indirimbo yatangiye ntabwo ariko yarangiye.”

“Bariya bagabo bafite akazi katoroshye, nanjye ndashima ko babonye ko nshoboye, kugirango nyine bakorane nanjye ni umugisha ni ukuri, bari gukorana n’undi muntu uwo ari we wese, ariko kuba barakoranye nanjye ndabishimira.”

Uyu mugabo asobanura ko bari bamaze amezi atanu bakora kuri iyi ndirimbo. Yannick yavuze ko mu gihe yamaze akorana na Meddy yamwigiyeho kunononsora ikintu mbere y’uko kijya hanze, kandi yamubonyeho guca bugufi mu buzima bwe bwa buri munsi.

Yavuze ko Meddy ari umuntu wiyoroshya, uciye bugufi, kandi ukunda amahoro. Ni ibintu avuga ko yishimiye, kuko byanamufashije guhura n’umuryango wa Meddy.

Yannick anavuga ko yanyuzwe n’uburyo Meddy ahimba ururirimbo (Melodie), byatumye nawe yiyemeza gufatira urugero kuri uyu muhanzi.

Muri iki kiganiro, Yannick avuga ko muri we atigeze atekereza akorera indirimbo Meddy, kuko yamubonaga nk’umuntu uri ku rwego rwo hejuru bigoye kuzahura.

Avuga ko kuba byarashobotse bagakorana, abifata gukabya inzozi n’ubwo atigeze azirota. Mu ijambo rimwe, asobanura ko ari ‘umugisha nagize, kandi ntakidashoboa’. 

Ati “Ntabwo byari mu nzozi zanjye, kuko nabonaga ntaho twahurira na Meddy, nanjye ubwanjye bwaranshimishije cyane.”

Yannick avuga ko ashaka gukora indirimbo nziza zimuhuza n’abantu, kandi agakora ibihangano by’ibihe byose bizumvwa ibihe n’ibihe n’ubwo yaba atakira mu murongo w’abakora indirimbo.

Uyu mugabo avuga ko ashima intambwe Adrien Misigaro amaze kumuteresha mu rugendo rwe rw’umuziki. Kandi avuga ko yamubonye nk’umuntu ugerageza ibintu bishya, biri no mu byatumye muri iki gihe bari gukora ku ndirimbo ziri kuri album ye nshya.

Asobanura ko Adrien yamwigiyeho uburyo bwo kwitwara nk’umuramyi, gukorana n’abandi, kwita ku muryago, gukora ibintu bifite intego ihamya, gukunda abantu n’ibindi. Ati ‘Ni umuntu ukunda gusetsa, ni umugisha kumumenya, kandi ni umuntu ujya uhuza. Hari abahanzi benshi yagiye ampuza n’abo, cyangwa akanakora n’abandi.”

Yannick yavuze ko muri iki gihe afite ibihangano byinshi by’abahanzi ari gukoraho birimo nka Album ya Adrien Misigaro, indirimbo za Serge Iyamuremye, Tumaini Byinshi bashobora gukorana muri iki gihe n’abandi.

Yannick yatangaje ko gukorera indirimbo Meddy yabifataga nk'ibintu bidashoboka, kuko amuzi akiri muto 

Yannick yavuze ko yinjiye mu byo gutunganya indirimbo biturutse ku bushobozi budahagije bari bafite mu itsinda ry'abaramyi yabarizwagamo 

Yannick asanzwe ari umuramyi mu rusengero asengeramo muri Dallas 

Yannick asobanura gukorera indirimbo Meddy nk'umugisha yagize mu buzima bwe 

Yannick yavuze ko Meddy yamwigiyeho kunononsora ibikorwa bye mbere y'uko bijya hanze 

Yannick ashima Adrien Misigaro kuko yamucuriye inzira akabasha kugera kuri Meddy 

Yannick ari kumwe na Adrien Misigaro, Gentil Misigaro, Cadeau Marvin na Tumain Byinshi 

Ku wa 23 Mutarama 2023, Yannick yatangaje ko yibarutse umwana n'umukunzi we Dori Mulume

KANDA HANO UREBE AMASHUSHO Y'INDIRIMBO 'NIYO NDIRIMBO' YA MEDDY NA ADRIEN MISIGARO

">