Undi mukinnyi wa Real Madrid yaba yakorewe irondaruhu?

Kuri uyu wa Kabiri, saa tatu z'ijoro ni bwo ikipe ya Real Madrid yari iri muri Portugal yagiye gusura ikipe ya SC Braga kuri Estadio Municipal de Braga mu mikino yo ku munsi wa 3 w'amatsinda ya UEFA Champions League.

Uyu mukino warangiye iyi kipe yo muri Espagne ariyo yegukanye intsinzi y'ibitego 2-1, ibi bitego 2 byatsinzwe na Rodrygo ku munota wa 16 ndetse na Judde Bellingham ku munota wa 61 naho Djalo wa SC Braga atsinda ku munota wa 63.

Nyuma y'uyu mukino habayeho guserera hagati y'abakinnyi ba Real Madrid n'aba SC Braga, biza gutuma myugariro Antonio Rudiger ajya mu rwambariro ajyanywe n'abashinzwe umutekano kubera uburakari yari afite.

Hahise hasohoka amakuru avuga ko impamvu Rudiger yari arakaye gutya ari ukubera yakorewe irondaruhu n'umutoza wungirije wa SC Braga amutuka, ariko nyuma uyu mukinnyi yifashishije imbuga nkoranyambaga ze ahakana aya makuru avuga ko ari ukutumvikana bisanzwe.

Yanditse ati "Ibintu byose bimeze neza - Naruhutse, mu by'ukuri ntabwo yantutse ankorera irondaruhu rwose, ahubwo habayeho kumvikana guke ubwo twanyuranagaho umusifuzi arangije umukino. Reka ubu twibande kuwa Gatandatu ku mukino dufitanye na FC Barcelona".

Mu cyumweru gishize ni bwo Vinicius Junior yongewe gukorerwa irondaruhu ku mukino banganyijemo na FC Sevilla igitego 1-1 muri shampiyona.

Uko Jude Bellingham yatsinze igitego cya 2

Amakimbirane yabayeho hagati y'abakinnyi ba Real Madrid n'aba SC Braga yatumye hasohoka amakuru avuga ko Antonio Rudiger yakorewe irondaruhu ariko uyu mukinnyi aza kubihakana