Ubwoba bugiye gutuma Enrique Iglesias adataha ubukwe bwa mushiki we

Mu byumweru bibiri gusa, Tamara Falco azashyingiranwa na Inigo Onieva, ariko musaza  we, Enrique Iglesias, yasobanuye neza ko atazitabira ubu bkwe kubera indwara y’ubwoba.

Biteganijwe ko ubukwe buzaba ku ya 8 Nyakanga ahitwa El Rincon, kandi hatumiwe abantu bagera kuri 200, barimo barumuna be, Enrique Chabeli na Julio Jose.

Icyakora, Enrique ntabwo azaboneka kandi byabanje kuvugwa ko uyu muhanzi wo muri Espagne  yabuze uko abigenza kubera ibitaramo bye biri imbere.

Ariko, umunyamakuru Sandra Aladro mu kiganiro 'El programa de Ana Rosa' yatanze ibisobanuro bitandukanye.

Indwara y'ubwoba yabujije Enrique Iglesias kuzataha ubukwe bwa mushiki we

Sandra Aladro yagize ati: "Enrique afite indwara yo gutinya ahantu hari abantu benshi. Ntabwo arigera  ajya mu birori aho agomba kwicara ku meza hamwe n'abantu 15 mu gihe cy'amasaha atatu. Ntabwo ajya mu kintu cyose kitari ibitaramo bisanzwe, kuko adashobora kubyihanganira, kuko bituma atamererwa neza."

Tamala uri mu byamamarekazi bivugwa cyane muri Espagne , azi ikibazo musaza we afite kandi ntabwo yababajwe n'umwanzuro we wo kutamutahira ubukwe

Amakuru avuga ko mushiki we Tamara, azi indwara ye kandi atababajwe n’icyemezo yafashe cyo gusiba ibirori bye, kuko burya ngo atigeze yitabira n'ubukwe bw'abavandimwe be, mu gihe cyashize.

Imyaka igiye kuba 3 Enrique yirinda kujya ahateraniye abantu benshi kubera indwara y'ubwoba

Iyi ndwara y'ubwoba yugarije Enrique Iglesias yitwa 'Illness Anxiety Disorder' byatangajwe ko ayimaranye imyaka irenga itatu aho yirinze kujya ahantu hari abantu benshi. Siwe muhanzi w'icyamamare wa mbere urwaye iyi ndwara dore ko hari n'abandi bazwi bagiye bayirwara barimo Ricky James na Maitre Gims.

Enrique Iglesias ari mu bahanzi bake bo muri Espagne  babashije kwigarurira imitima ya benshi ku rwego mpuzamahanga. Ibi abikesha indirimbo ze zakunzwe zirimo nka 'Hero', 'Esperanza', 'Take Back My Love', 'Bailando', 'Subeme La Radio' n'izindi zatumye akundwa cyane.