Abakobwa 11 bahatanira ikamba rya Miss Burundi batangiye umwiherero-AMAFOTO

Kuva kuri uyu wa Kabiri tariki 20 Kamena 2023, aba bakobwa bacumbikiwe kuri Roca Golf Hôtel, aho bazava nyuma y’ibi birori bizabahuza bizasiga hamenyekanye umwe muri bo wegukanye ikamba rya Miss Burundi 2023.

Aba bakobwa bagiye mu mwiherero nyuma y’iminsi yari ishize bari mu bikorwa bigamije gusura ahantu nyaburanga muri iki gihugu, biga amateka y’Igihugu, kubyina imbyino zo mu muco w’ikirundi n’ibindi.

Ibirori byo gutanga ikamba rya Miss Burundi bizaba ku wa Gatandatu tariki 24 Kamena 2023, kuri Donatus Conference Center, guhera saa kumi n'imwe n'igice z'umugoroba (17H30'). Kwinjira ku munsi umwe ni 200,000FBU.

Abakobwa 142 ni bo bari bujuje ibisabwa biyandikishije mu irushanwa ry’ubwiza rya Miss Burundi 2023. Mu byasabwaga harimo ko umukobwa agomba kuba afite uburebure butari munsi ya metero 1,65, atarengeje ibilo 65.

Ikindi ni uko uwitabira iri rushanwa yasabwaga kuba atarigeze abyara cyangwa ngo ashake umugabo. Ndetse akaba atarigeze akatirwa n’inkiko. Nyuma yo gukorwa amajonjora, hasigayemo abakobwa 26.

Abakobwa 11 bazavamo Miss Burundi ni Ngabirabirano Belle Ange Edissa, Keza Blandine, Ishimwe Netty Louange, Kezimana Melissa, Balungura Lyne Cella, Irakoze Erica Aime Carolle, Uwera Ricky Tricia, Kenguruka Clara, Igiraneza Ange Charlene, Mugisaha Elsie Amandine na Ndayizeye Lellie Carelle.

Uzegukana ikamba rya Miss Burundi 2023 azahabwa imodoka yo mu bwoko bwa Toyota Ractis, litiro 480 za lisansi, ubwishingizi bw’imodoka, azajya akorerwa imodoka, yishyurirwe amashuri, anagenerwe umushahara w’ibihumbi 500 Fbu.

Igisonga cya Mbere cya Miss Burundi azagenerwa 2.500.000 Fbu, Igisonga cya Kabiri azahabwa 2.000.000 Fbu naho umukobwa uzagaragaza ko ashyigikiwe cyane azagenerwa 1.000.000 Fbu.

Ubwo iri rushanwa riheruka ku wa 6 Gicurasi 2022 ni bwo Ngaruko Kelly yegukanye ikamba rya Miss Burundi 2022 ahigitse abandi bakobwa 57.

Ibyishimo byari byose ubwo aba bakobwa bagera ahari kubera uyu mwiherero 

Abakobwa 11 bageze mu cyiciro cya nyuma bavuye mu barenga 140 bari biyandikishije muri iri rushanwa

Aba bakobwa bamaze iminsi batemberezwa mu bice bitandukanye by’Igihugu biga amateka

Umukobwa uzegukana ikamba azahabwa ibihembo binyuranye n’imodoka nk’igihembo gikuru