Bahati agiye gukora ubukwe n’umukobwa aherutse kwambika impeta y’urukundo

Habiyambere Jean Baptiste Bahati ‘Makaca’ avuga ko we n’umukunzi we bazatangira urugendo rushya rwo kubana nk’umugabo n’umugore, ku wa 5 Kanama 2023 nyuma y’imihango y’ubukwe iteganyijwe.

Yabwiye InyaRwanda ko imyaka itatu ishize ari mu rukundo n’uyu mukobwa, kandi ko mu minsi iri imbere aribwo azatangaza ibijyanye na gahunda z’ubukwe.

Ati “Nk’uko wabibonye kuri ‘Save the Date’ yitwa Cecile. Ni ‘fiancé’ wanjye tumaranye imyaka itatu mu rugendo rw’urukundo. Mu gihe cya vuba nzashyira hanze ‘Invitation’ igaragaza aho ubukwe buzabera n’ibindi.”

Bahati atangaje integuza y’ubukwe bwe, nyuma y’uko mu Ukuboza 2021, yambitse impeta y’urukundo uyu mukobwa amuteguza kurushinga nk’umugabo n’umugore. Ibirori byo kwambika uyu mukobwa impeta byabereye muri Kenya ku nyanja y'u Buhinde.

Icyo gihe, Bahati yabwiye InyaRwanda ko umwaka wa 2022 utazamusiga akoze ubukwe. Ariko avuga ko hari byinshi yari agishyira ku murongo n’umukunzi we, byatumye badahita bakora ubukwe.

Uyu muhanzi wamenyekanye muri filime zirimo ‘Mbaya’, avuga ko umukunzi we adakunga kujya mu itangazamakuru ari nayo mpamvu atigeze asohora amafoto ye.

Bahati yatangaje ko ku wa 15 Kanama 2023 azarushinga n’umukunzi we

Mu 2021, Bahati yagaragaje ko yambitse impeta umukunzi we ariko ntiyamwerekana

Bahati yavuze ko umukunzi we adakunda kugaragara cyane mu itangazamakuru

Bahati avuga ko hari byinshi byatumye yiyemeza kubana akaramata n’uyu mukobwa