Akari ku mutima wa Mc Nario uri mu bazayobora iserukiramuco rikomeye rizabera i Kampala muri Stade

Ni iserukiramuco rigiye kuba ku nshuro ya mbere rikabera i Kampala, hanyuma ku nshuro ya kabiri rikazabera i Kigali. Iyo serukiramuco ryitwa Kigampala Festival [Uganda-Rwanda Festival]. Ku nshuro yaryo ya mbere ryateguwe na Bruso Ventures ku bufatanye na NBS.

Rizaba tariki 17 Ukuboza 2022, ribere i Kampala muri Lugogo Cricket Oval. Ni iserukiramuco rikomeye dore ko no kwinjira byihagazeho aho mu myanya isanzwe ari amashiringi ya Uganda ibihumbi 50, muri VIP ni amashiringi ibihumbo 100 naho muri VVIP ni amashiringi Miliyoni eshatu.

Umunyarwanda Mutabazi Robert [MC Nario] na Anita Pendo bari mu bazayobora iri serukiramuco. Yavuze ko yishimiye cyane kugirirwa iki cyizere na cyane ko ari ubwa mbere azaba ayoboye igitaramo muri stade nini muri Kampala. Ati "Ndishimye, ndi umunyamugisha, ni ubwa mbere nzaba ngiye kuri stge nini nk'iriya muri stade". 

Yavuze ko kuri we iri serukiramuco risobanuye ko "abanyarwanda n'abanya-Uganda babaye umwe". Ati "Bwa bumwe bwabo bwari bwaravuyeho bwasubiyeho, ngira ngo abanyarwanda barabibonye nyuma y'aho Gen. Muhoozi aziye mu Rwanda na Perezida Kagame akajya kwitabira isabukuru ye [muri Uganda] nyuma y'imyaka 5 imipaka ifunze, turongeye turafunguye".

MC Nario ashimira abanya Uganda bateguye iri serukiramuco, akavuga ko abo mu myidagaduro muri Uganda "badukunda cyane kurusha uko twebwe tubakunda, kuko twebwe ntiturategura igitaramo na kimwe cy'Abagande hano". Ati "Ntacyo twakoze, usibye kuzana umuhanzi ariko hari iserukramuco twari twategura ngo dutumize abagande baze mu Rwanda?, oya ntaho turakibona".

Yavuze ko ubutaha iri serukiramo rizabera mu Rwanda anavuga ko barimurikiye bwa mbere mu Rwanda mu bihe bishize, Anita Pendo akaba ari we wari MC ubwo ryamurikirwaga i Kigali. Ati "Ni iserukiramuco rikomeye rishyigikiwe n'ama Televiziyo akomeye, RwandAir na Movit".

Yijeje abaturage ba Uganda ko bazryiherwa cyane, ati "Nzabaha show, nzabaha Vibe, nzabaha umuziki mwiza, indirimbo z'abanyarwanda 100% ni zo bashaka, nizo tuzabaha,..Ikindi nababwira ni uko dufite aba Dj beza bavuye mu Rwanda, Pendo arahari, Dj Karet, Mc Nario,..bigenze neza na Dj Toxxyk ashoboza kuzahaboneka, bari mu biganio". 

Mc Nario uri mu ba bashyushyarugamba bagezweho muri Kigali muri iyi minsi, yunzemo ati "Hanyuma ikindi nakubwira ni uko abahanzi nyarwanda bazaba bahari, bari kurangiza ibintu byo kubishyura ariko barahari, kugeza ubu nabonye The Ben bamaze kumusohora kuri Flyer, Salvador, Ykee Benda,..reka twizere hamwe n'Imana bizakunda".

Mu gusoza, MC Nario yavuze ko ari cyo gihe ngo abanyarwanda batuye muri Uganda bishimane n'abanya-Uganda binyuze mu ndirimbo z'abo mu bihugu byombi. Yavuze ko abazitabira iri serukiramuco, bazambara imyenda iranga ibi bihugu, abanyarwanda bambare imishanana, bacurange ingoma, babyine kinyarwanda, hanyuma hanabeho umwanya w'aba Dj n'aba Mc.

MC Nario ategerejwe i Kampala

Mc Nario na Mc Anita Pendo bari mu bazayobora iri serukiramuco ribaye ku nshuro ya mbere