AFCON 2021: Comoros irakina na Cameroun nta muzamu n'umwe ifite

Kuri uyu wa Mbere ku isaha ya saa 21:00 PM Cameroun iri mu rugo irakira ibirwa bya Comoros mu mukino wa 1/8 cy'irangiza cy'igikombe cya Afurika. Ni umukino uza kuba ugoye igihugu cya Comoros kubera abakinnyi bayo benshi banduye Covid-19.

Kuri iki cyumweru ubwo Comoros yajyaga gupimwa Covid-19, basanze abakinnyi bayo bagera kuri 12 ndetse n'umutoza mukuru barwaye COVID-19 bituma bashyirwa mu kato. Umuzamu wa mbere wa Comoros witwa Salim Ben Boina afite ikibazo cy'imvune, ndetse n'abandi bazamu babari Ali Ahamada na Moyadh Ousseni bari basigaye, bari mu barwaye Covid-19.

Comoros iri mu bihe bigoye 

Ibi bivuze ko Comoros igomba gukina nta muzamu n'umwe ifite mu bo yatwaye ndetse bituma iza gukoresha umukinnyi ukina imbere akaba ari we ujya mu izamu. Amir Abdou umaze imyaka isaga 8 atoza Comoros na we ntabwo ari bubashe gutoza uyu mukino nyuma yo gushyirwa mu kato.

Itegeko rya CAF rigenga iyi mikino ku bijyanye na COVID-19, rivuga n'iyo ikipe yaba ifite abakinnyi 11 igomba gukina uko byagenda kose. Ikindi ni uko ikipe idafite umuzamu igomba gukinisha undi mukinnyi usanzwe, iyo ibi bitubahirijwe ikipe iterwa mpaga y'ibitego bibiri ku busa.

Ku rundi ruhande ishyirahamwe ry'umupira w'amaguru muri Comoros ryamaze kwandikira CAF riyisaba ko uyu mukino wasubikwa.