Twamusuye! Intangiriro y’ubuhanzi bwe n’urukundo rwe na Christian Kayiteshonga: Ikiganiro na Malaika wamamaye mu mivugo-VIDEO

Uyu mugore afite impamyabumenyi y’icyiciro cya kabiri cya Kaminuza mu buhanzi yakuye muri Kaminuza ya Fordhan University iherereye mu Mujyi wa New York muri Leta Zunze Ubumwe za Amerika.

Twamusuye! Amaze ibyumweru birenga bibiri ari mu Rwanda aho yaje gusura umuryango we utuye ahitwa kuri Wonderland, aho bafite serivisi zitandukanye zirimo kwita ku bakiriya, amacumbi yo kuraramo n’ibindi bitandukanye.

Ni heza! Uba wicaye witegeye Kigali neza, wumva akayaga gasusurutsa umutima nta rusaku rw’imodoka nk’izinyuranamo muri Kigali n'amahoni adashira. Ni urugendo rw’iminota nka 30’ mu mudoka ugenda witegereza ibyiza bitatse u Rwanda.

Afite igihe cy’amezi ane mu Rwanda asura umuryango we, akora ibikorwa bitandukanye by’ubuhanzi, yiyibutsa byinshi ku muco w’u Rwanda n’ibindi.

Ni umugore wirekura mu kaganira birambuye yagera ku ngingo yo gushimangira akumvikanisha amarangamutima ye. Nk’ubu yasubije atazuyaje ko ikibazo cy’abangavu baterwa inda mu Rwanda gituruka ku babyeyi batagaraniriza abahungu babo ngo bababuze gushuka abakobwa.

Malaika kandi azi kurwanira ishyaka inshuti ze, ku buryo utamusaba guhitamo hagati ya Meddy na The Ben cyangwa hagati ya Miss Mutesi Aurore Kayibanda na Miss Bahati Grace ngo akwemerere. Akubwira ko ari bamwe atabona uwo ahitamo.

Malaika Uwamahoro twamusuye kuri Wonderland avuga birambuye ku ntangiriro y’urugendo rwe rw’ubuhanzi, uko yisanze mu rukundo na Christian Kayiteshonga n’ibindi

Injira mu kiganiro- Umunyamibare wavuyemo umuhanzi w’inguni zose:

Mu mashuri yisumbuye Malaika yize ku bigo bitandukanye birimo Green Hills Academy, Ifaqe na Lycee de Kigali aho yize ishami ry’Imibare, Ubugenge n’Ubumenyi bw’Isi.

Agisoza amashuri yisumbuye yabonye akazi muri Mashariki, Spoken words Rwanda, Ishyo Arts n’ahandi hanyuranye. Nyuma yaje kubona Buruse ya Perezida ajya kwiga ibijyanye n’ubuhanzi mu Mujyi wa New York muri Amerika, aho yamaze imyaka ine.

Agisoza amasomo ye yatangiye kubona akazi mu bijyanye no gukora filime, ikinamico, imivugo n’ibindi. Kuva ubwo atangira guhamagarwa n’abantu bo muri Afurika y’Epfo, muri Amerika n’ahandi hose bashakaga kumuha akazi.

Yabwiye INYARWANDA ko yimariyemo ubuhanzi kubera ko yavukiye mu muryango w’abahanzi mu ngeri zinyuranye.

Ati “Mama wanjye ni umudozi […] Aba Tantine banjye barabyinaga cyane na bo bagakora amakinamico, aba Tonton banjye barashushanyaga rero nakuze mbireba mbikunda. Kandi kubera ko nakuze mbona ubuhanzi bukoreshejwe mu buryo butandukanye naravuze nti nshobora kuririmba, kubyina gukora ibi. Byose nabigiyemo ntavuga ngo ngomba gukora akantu kamwe.”

Malaika avuga ko buri kimwe akora akibonera umwanya, kubera ko afite intego ashaka kugeraho aho akorera.

KANDA HANO WUMVE INDIRIMBO 'REK TURYE SHOW' MALAIKA YAKORANYE NA DJ MARNAURD

Avuga ko kwiga Imibare, Ubugenge n’Ubumenyi bw’isi ari amahitamo y’ababyeyi be, kuko we atabishakaga. Ariko kandi ngo byamufashije kumenya ururimi rw’Igifaransa n’imibare yifashisha mu buzima bwa buri munsi.

Ati “Byaramfashije kubera ko ubu ngubu nsigaye nkina amafilime mu Gifaransa kubera ko nabashije kwiga urundi rurimi mu mashuri yisumbuye…N’ubwo byangoye ariko ntewe ishema nabyo kuko nabishyize mu buryo bwanjye kandi byaramfashije mu buzima bwanjye.”

Uyu mugore avuga ko mu masomo yose yigaga imibare itari imworoheye, ahanini bitewe n’uko yize ishami atashakaga kuko we yashakaga kwiga iby’ubuhanzi gusa.

Agashimangira ko yakuze ashaka kuba umuhanzi, ku buryo ubwo ku myaka 11 yagarukaga mu Rwanda nyuma agatangira no gukorana na Mashariki yamenye neza ko buri wese afite ubushobozi bwo guhitamo ubuhanzi ashaka gukora.

Asobanura ko ubuhanzi bwe bwibanda cyane ‘ku gutekereza uko sosiyete yahinduka n’uko abantu baba beza kurushaho mu buryo bumwe cyangwa ubundi’.

Avuga ko ku myaka 15 yari yinjiye mu buhanzi, ariko ko yagiye agira amajwi ya benshi bamubwiraga ko inzira yinjiyemo itazamuhira. Akavuga ko yagerageje kurwana asingira inzozi ze yatangiye kurotora kugeza uyu munsi.

Malaika ati “Numvaga ko mfite impano! Iyo mpano hari igihe ituma mbyuka kare nkumva hari ikintu ngomba kwandika nkahita nyandika cyangwa nkavuga ngo aya magambo ko numva akomeye agomba kugira umusanzu. Nariyizeye, kandi nizera impano yanjye. Numvaga nyine ngomba gukomeza kubikurikirana kandi abandi ntabwo bumvaga intumbero yanjye,”

Uyu mugore wabaye muri Uganda, avuga ko ubuzima bwe bwubakiye ku mpanuro ya Nyirakuru wamubwiye ‘gira neza wigendere’. Akavuga ko iri jambo ryamukomeje mu buzima bwe kandi aryubakiraho agirira neza abantu batandukanye.

Akavuga ko gushikama ku mpano ye y’ubuhanzi yamugejeje aho umutima we utatekerezaga. Malaika avuga ko yavuze imivugo ahantu hanyuranye, akina filime imbere y’abakomeye, ariko ko abitse urwibutso rw’umunsi avuga imivugo ari imbere ya Perezida Paul Kagame, yari anyuzwe icyo gihe!

Ati “Ohhh numvaga meze neza! Perezida Kagame ni intwari kuri njye, ndamukunda cyane. Nkunda uburyo bw’imiyoborere iyo mugeze imbere mba numva binteye ishema nanjye. Buri gihe mba ntewe ishema, mba numva nishimiye kugera imbere ye no kubasha kumutaramira,”

“[…] Kenshi iyo ngeze imbere ye mba nishimye cyane. Ni amahirwe adasanzwe kuri njyewe, kubera ko ni umuntu nkunda cyane.”

Ashima Perezida Kagame ku bwa Buruse yamuhaye akajya kwiga ubuhanzi asigaye yifashisha mu gutanga ubutumwa bwiza.

Ubuhanzi bwamuhuje na Christian Kayiteshonga barwubakanye kuva muri Nzeri 2020:

Ku wa 5 Nzeri 2020, ni bwo Malaika Uwamahoro yakoze ubukwe na Christian bwabereye mu Mujyi wa Boston muri Leta Zunze Ubumwe za Amerika.

Bakoze ubukwe nyuma y’uko ku wa 20 Kanama 2020 basezeranye imbere y’amategeko mu muhango wabereye mu Mujyi wa Boston. Nyuma yo gusezerana n’umukunzi we, Malaika ku mazina ye yongeyeho ‘Kayiteshonga’ [Malaika Uwamahoro Kayiteshonga].

Ubukwe bwa Malaika na Christian bwahuje imiryango, inshuti, abavandimwe, abahanzi n’abandi. Mu batashye ubu bukwe harimo; umuraperi Muhire William wiyise K8 Kavuyo wakunzwe mu ndirimbo zirimo ‘Allhamdoulilah’, ‘Ntibayoka’, Ndaguprefera’ n’izindi;

Umuhanzi Nsengiyumva Emmanuel uzwi nka Emmy umaze imyaka irindwi akorera umuziki muri Leta Zunze Ubumwe za Amerika. Ubu bukwe bwatashywe kandi na Miss Mutesi Aurore Kayibanda wabaye Miss Rwanda 2012, Miss Heritage Rwanda 2012 na Miss Fespam 2013.

Malaika avuga ko ubukwe bwe bwagenze neza, akavuga ko yahuye na Christina Kayiteshonga mu 2012 bahuriye mu Karere ka Musanze mu Ntara y’Amajyaruguru.

Icyo gihe bahura Christian yiteguraga kujya muri Amerika kwiga ibijyanye n’ubuhanzi. Malaika avuga ko Christian yamuhaye ikaze aho yakoreraga umushinga we yise ‘Seka Rwanda’.

Akavuga ko mu 2012 Christian yagiye muri Amerika bakomeza kuvugana kugeza ubwo mu 2013 nawe yagiye kwiga muri Amerika. Ngo akigera muri Amerika yatangiye gutekereza kwagura ubuhanzi bwe yifashishije Christian asaba amafaranga nyina.

Ngo ubwo yasabaga nyina amafaranga amubwira ko agiye gusura Christian kugira ngo amufashe gukora imishinga y’ubuhanzi bwe yamubwiye ko uwo agiye kureba ari mubyara we, bombi bakura bazi ko bafitanye isano ya bugufi.

Ati “Mama yavuze ati Christian wuhe ndamubwira nti Christian Kayiteshonga arambwira ngo buriya wari uzi ko ari ‘cousin’ wawe? Ndamubwira nti mubyara wanjye gute ariko ntabwo nabitinzeho,”

Icyo gihe Malaika yari ari mu Mujyi wa New York mu gihe Christian yari atuye mu Mujyi wa Florida. Uyu mugore avuga ko mu gihe cyose yahuraga na Christiana baganiraga nk’abavandimwe ubundi bagakomeza imishinga yabo.

Malaika avuga ko asoje Kaminuza ari bwo Nyina yamubwiye ko yamubeshye ko Christian ari mubyara we, bitewe n’uko yabonaga ubushuti bwe bwavamo ikindi kintu kandi akiri ku ntebe y’ishuri.

We avuga ko yumvaga bakomeza kuba ababyara, ariko ngo Christian yarabyanze amubwira ko amuzi neza ahubwo bakwiye gutangirana urugendo rw’urukundo.

Ati “Icyo gihe njyewe numvaga twakomeza kuba ababyara ariko Christian ati 'Oya! Uranzi ndakuzi wese reka noneho tubikomeze tubigire ibindi'. Ni uko byagenze. Ariko bwaradufashije kuko twabashije kumenyana nta bindi birimo.”

Malaika avuga ko Christian yamukundiye ko ari ‘mwiza, akunda abantu cyane, umuntu ufite agaciro, wubaha kandi ukunda Imana, ukunda Nyina n’umuryango we’.

Ati “Ibyo bintu byose byagiye binyereka ko ari umugabo muzima nshobora kumara iminsi yanjye yose y’ubuzima ndi kumwe nawe.”

Avuga ko umunsi Christian amusaba kurushinga atazuyaje kuko baziranye igihe kinini.

Inkuru wasoma: Malaika Uwamahoro ufite ubuhanga mu kuvuga imivugo yakoreye ubukwe muri Amerika

Incamake ku buzima bwa Malaika Uwamahoro:

Malaika Uwamahoro ni umugore wamamaye mu gukina ikinamico, guhanga imivugo no kuririmba.

Izina rye ryakomeye kubera imivugo yavugiye mu birori bitandukanye birimo Rwanda Day, Inama Rusange y’Afurika yunze Ubumwe n’ahandi.

Yakinnye muri filime zikomeye zirimo nka “Notre Damme Du Nil” yaturutse ku gitabo cya Mukasonga Scholastique yamamaye cyane.

Yanakinnye muri filime ‘Umurage’ ishingiye ku nkuru mpamo y’umwana w’umukobwa witwa Mushimiyimana Aline watewe inda afite imyaka 12 agatangira uburushyi yayobowe na Michael Rothermel wo muri Leta Zunze Ubumwe z’Amerika.

Muri Werurwe 2020 yatanze ikiganiro muri Forbes Africa Woman Leading Women Summit yahuriyemo n’abarimo Leilla Lopez wabaye Miss Universe 2011, Minisitiri w’Ububanyi n’Amahanga w’Afurika y’Epfo Neledi Pandor n’abandi.

Mu Ukwakira 2020 yasohoye umuvugo wise ‘Black Skin’ ugaruka ku buzima bubi abirabura babamo muri Amerika.

Uyu muvugo wagaragayemo Abanyarwandakazi barimo Mutesi Aurore Kayibanda wabaye Nyampinga w’u Rwanda 2012.

Yagize uruhare mu mukino witwa Miracle in Rwanda werekaniwe i Broadway muri New York.

Azi kuririmba cyane kuko yumvikana mu ndirimbo ‘Reka Turye Show’ ya DJ Marnaud.

Inkuru wasoma: Miss Aurore, K8 Kavuyo, Emmy mu batashye ubukwe bwa Malaika Uwamahoro n'umukunzi we Christian

Malaika yatangaje ko gutaramira imbere ya Perezida Paul Kagame ari urwibutso rudasaza abitse, akamushimira Buruse yamuhaye yo kujya kwiga ubuhanzi muri New York

Malaika n'umukunzi we Christian bakoze ubukwe ku wa 05 Nzeri 2020 mu birori byabereye mu Mujyi wa Boston

Malaika uzwi mu kuvuga imivugo, gukina ikinamico na filime yavuze ko ku munsi w’ubukwe bwe yari yuzuye umunezero nyuma yo kurushinga n’inshuti ye y’akadasohoka 

Malaika yavuze ko umukunzi we Christian amukunda bya nyabyo, akamukundira inshuti, umuryango n’abandi 

Umuraperi K8 Kavuyo [Wegeranye na Christian] na Emmy [Uri inyuma ya Malaika] bari mu batashye ubu bukwe 

Umuhanzi Emmy yicaranye na Miss Mutesi Aurore Kayibanda. Malaika ashimangira ko Mutesi ari Nyampinga w’ibihe byose ashingiye ku ndangagaciro zakomeje kumuranga

Malaika avuga ko mu 2012 ari bwo yahuye bwa mbere na Christian batangira urugendo rw’urukundo mu 2017

KANDA HANO UREBE IKIGANIRO CYIHARIYE TWAGIRANYE NA MALAIKA UWAMAHORO

MALAIKA AHERUTSE GUSOHORA UMUVUGO YISE ‘BLACK SKIN’

MALAIKA AFITE UMUVUGO YISE ‘HOW MANY TIMES’

AMAFOTO+VIDEO: Iradukunda Jean de Dieu-INYARWANDA.COM