Aman Jay wakuriye mu nyeshyamba za FDLR akaza gutaha mu Rwanda yasohoye indirimbo ‘Ndarufite’ yigisha urukundo anasaba abasigayeyo gutaha

Maniradukunda Juvenal ukoresha akazina ka Aman Jay muri muzika, atangaza ko atazi igihe yagereye mu gisirikare cya FDLR. Aganira na InyaRwanda avuga ko yahisemo gutaha mu Rwanda kuko atagize amahitamo yo gukurira muri FDLR abishaka ahubwo ariho yavukiye, yagiye amenya amakuru mesnhi avuga ko mu Rwanda ari amahoro aho banakangurira ababa mu mashyamba ya Congo gutaha bagakorera igihugu, nawe afata iya mbere.

Aman Jay utuye mu Mudugudu wa Nyakabungo, Akagari ka Rwangara, Umurenge wa Cyanzarwe Mu karere ka Rubavu, afite indirimbo 13. Yavutse mu 1994. Avuga ko icyo gihe amateka amubwira ko umuryango we wimukiye muri Congo, akaba yaramenye ubwenge abona ari inyeshyamba ya FDLR ari muto cyane, ibintu nawe avuga ko atasobanura. Amaze kumenya ubwenge yahise ataha mu Rwanda aho amaze imyaka 8 ari mu Rwanda.

Mu rugendo rwe rwa muzika mu ndirimbo z’urukundo, avuga ko ajya abona akazi mu kigo cya Gisirikare i Mutobo ko kuririmbayo. Indirimbo nshya yise ‘Ndarufite’, avuga ko isobanuye urukundo, ati : ‘Nashaka kwigisha abantu urukundo rukaguma rukiyongera mu bantu, kuko ni cyo cya mbere mba nshaka kuvuga mu ndirimbo’. Akomeza asaba abantu bose baba mu mashyamba gutaha mu Rwanda kuko ari igihugu cyiza, kimakaza amahoro n’urukundo mu bantu, bakareka imyumvire bahabwa iyo bari mu nyeshyamba.