Gutsinda Real Madrid ni ubutwari, ijisho kuri Manchester City - Thomas Tuchel

Chelsea yatsinze Real ifite agahigo gakomeye i Burayi ko kwegukana ibikombe 13 bya Champions League, mu mukino wo ku wa Gatatu wabereye ku kibuga cya Chelsea cya Stamford Bridge. 

Ibitego 2-0 bya Chelsea byinjijwe na Timo Werner ku munota wa 28 na Mason Mount ku munota wa 85, biba 3-1 mu mikino yombi. Chelsea izakina na Manchester City y'umutoza Pep Guardiola ku itariki ya 29 y'uku kwezi kwa Gatanu i Istanbul muri Turukiya.

Avuga ku ntsinzi y'ikipe ye, umutoza Tuchel yagize ati: "Iki ni ikintu gikomeye rwose, gutsinda Real Madrid ni ubutwari, nashimira abakinnyi banjye, rero nshimishijwe cyane n'uko twitwaye kandi nshimiye cyane iyi kipe".

"Iteka nzahora mbivuga, kuri jye Bayern Munich hamwe na Manchester City ni yo cyitegererezo kandi twashakaga gukuramo icyuho tukegera Manchester City".

Guhurira kuri uwo mukino wa nyuma mu mpera y'uku kwezi, bizaba ari inshuro ya kane Chelsea na City bakinnye muri uyu mwaka w'imikino.

Man City yatsinze Chelsea ibitego 3-1 ku kibuga Stamford Bridge mu mukino wa Premier League mbere y'uko Tuchel ayigeramo asimbuye Frank Lampard.

Ariko Chelsea yasoje icyizere cya Guardiola cyo kwegukana ibikombe bine uyu mwaka ubwo yamutsindaga igitego 1-0 mu mukino wa kimwe cya kabiri cya FA Cup ku itariki ya 17 y'ukwezi kwa kane.

Ku wa Gatandatu City irakira Chelsea mu mukino wa shampiyona, izi ko gutsinda uwo mukino biyihesha kwegukana igikombe cya shampiyona cya gatatu mu myaka ine ishize.

Abajijwe ku mukino wa nyuma wa Champions League w'amakipe abiri yo mu Bwongereza, Tuchel yongeyeho ati: "Uyu mukino wo muri kimwe cya kabiri, twawukinnye neza cyane kandi ducyeneye iyo mikinire nanone".

Umutoza wa Real Madrid Zinedine Zidane yabwiye igitangazamakuru Movistar cyo muri Espagne ati: "Bari bakwiye intsinzi. Twarwanye turanagerageza ariko bari bakwiye gutsinda bagakomeza".

"Abakinnyi bakinnye bari bameze neza byo gukina. Ntewe ishema n'abasore banjye: twaragerageje, twageze ahantu kure nk'aha - umukino umwe gusa ngo tugere ku mukino wa nyuma. Chelsea yakinnye umukino mwiza kandi yakomeje, rero tugomba kuvuga ko bakoze neza".

"Twari dukeneye gukina neza kurushaho ngo dukomeze. Nta mahirwe agaragara y'igitego twagize, bo bayakoze [amahirwe] kandi uwo ni umupira w'amaguru. Ubu turaruhutse turi gutekereza kuri La Liga".

"Birumvikana ko tutishimye. Iyo utsinzwe umukino wa kimwe cya kabiri ntabwo wishima kandi ibyo birasanzwe. Biragoye kubyakira, ariko ejo [kuri uyu wa kane] tuzasubira ku kibuga mu myitozo twiteguye kongera gutangira".

Real Madrid yatsinzwe na Chelsea ibitego 2-0 mu mukino wo kwishyura

Chelsea yakatishije itike y'umukino wa nyuma muri Champions League