Mu mukino wari uryoheye ijisho utari woroshye, Rayon Sports yatsinze Bugesera FC ibitego 2-1, kuri Stade ya Kigali mu mukino w’umunsi wa kane wa shampiyona wabaye ku mugoroba wo kuri uyu wa Kabiri, amanota Rayon Sports yabonye yatumye ikomeza gukubana na APR FC banganya amanota 10 batandukanyijwe n’ibitego bazigamye.
Kwizera Janvier witwaye neza mu gice cya mbere yagize imvune ava mu kibuga
Rayon Sports yari yakoze
impinduka ku bakinnyi basanzwe babanza mu kibuga, kubura kwa Iradukunda Eric
Radu usanzwe ukina ku ruhande rw’iburyo yugarira ndetse n’umusimbura we Nyandwi
Sadam byatumye umutoza Javier Martinez ahengeka Irambona Eric Gisa ku ruhande
rw’iburyo, ubusanzwe akaba amenyerewe gukina ku ruhande rw’ibumoso yugarira.
Nizeyimana Mirafa uri kwitwara neza mu kibuga
hagati yongeye kugirirwa icyizere
n’umutoza cyo kubanza mu kibuga
ku nshuro ya Gatatu yikurikiranya, akaba ari umukinnyi wakinnye umukino
mwiza. Hussein Tchabalala yakinaga n’ikipe yahozemo, yagerageje kugora Irambona
yari ku ruhande rw’iburyo, arema amahirwe imbere y’izamu ariko biranga.
Tchabalala yahuraga n'ikipe yagiriyemo ibihe byiza
Ni umukino wari ufunguye
ku mpande zombi kuko wasangaga buri mwanya buri kipe ikomanga ku izamu ry’indi.
Mu gice cya mbere cy’umukino
amakipe yari ku rwego rumwe kuko ntayarushije indi bigaragarira amaso, amahirwe
yo gutsinda yabonetse ku ruhande rwa Rayon Sports ariko ntibayabyaza umusaruro,
Mu gice cya mbere Bugesera FC niyo yabonye amahirwe akomeye yo kwinjiza igitego
ubwo habura iminota micye ngo igice cya mbere kirangire abasore ba Bugesera bateye
umupira ugarurwa n’umutambiko w’izamu.
Wilonja Jacques wari wakaniye umukino ku buryo bukomeye
Mu gice cya mbere cy’umukino
Tchabalala na Eric Irambona babonye amakarita y’umuhondo nyuma yo gushaka
gusumirana ubwo habaga amakosa aba bakinnyi ntibihangane. Iminota 45 y’igice
cya mbere cy’umukino yarangiye amakipe anganya ubusa ku busa.
Igice cya kabiri
cyatangiranye impinduka ubwo umunyezamu wa Bugesera Kwizera Janvier wari wakomeje kugira ibibazo byo kugongana n’abakinnyi
ba Rayon Sports mu gice cya mbere yasohokaga mu kibuga hakinjira Twagirimana
Pacifique.
Mugisha Gilbert watsinze igitego cya mbere cya Rayon Sports
Gusa ariko igice cya
kabiri nticyahiriye Bugesera yashakaga kubanza igitego Rayon Sports, kuko gusa
ku munota wa 56’ Mugisha Gilbert yatsinze igitego gifungura amazamu ku ruhande
rwa Rayon Sports ku mupira mwiza wari uhinduwe na Rutanga Eric wari ku ruhande
rw’ibumoso. Bugesera FC ntiyacitse integer kuko yakomeje gukina neza ishaka
igitego cyo kwishyura, mu gihe yumvaga kwishyura bishoboka haje kubaho ikosa
ryo gutakaza umupira mu kibuga hagati ku bakinnyi ba Bugesera maze Omar Sidibe
wari ubari iruhande ahita abapapura umupira awusunikira Michael Sarpong atsinda
igitego cya kabiri ku munota wa 63’ w’umukino.
Bugesera ntiyaciwe intege
no gutsindwa ibitego bibiri kuko yakomeje gutera umupira mwiza ishakisha uburyo
bwo kwishyura, gusa ariko na Rayon Sports ntiyoroheye ikipe ya Bugesera kuko
yasirikiraga imbere y’izamu rya Bugesera Fc inshuro nyinshi.
Nyuma yo kwinjizwa ibitego
bibiri, umutoza wa Bugesera Bisengimana Justin yakoze impinduka , Ishimwe Zappy
yasohotse mu kibuga hinjira Niyitegeka Idrissa, naho Nzabanita David asimburwa
na Rucogoza Djihad. Ku ruhande rwa Rayon Sports yasohotse mu kibuga hinjira
Bizimana Yannick, mu gihe Iranzi Jean Claude yasohotse hakinjira Sekamana
Maxime.
Impinduka Bisengimana
Justin yakoze zatanze umusaruro nubwo utari uhagije kuko Rucogoza Djihad
yatsindiye Bugesera Fc igitego kimwe yatsindishije umutwe ku munota wa 89, ku
mupira wari uhinduwe na Peter Otema.
Iminota 90 y’umukino
yarangiye Rayon Sports yegukanye amanota atatu yayigoye, itsinze Bugesera Fc
ibitego 2-1.
Bivuze ko Rayon Sports
iraye ku mwanya wa kabiri aho inganya amanota na APR FC ya mbere banganya
amanota 1o, ariko aya makipe ntanganya ibitego azigamye.
Rayon Sports XI: Kimenyi
Yves 1, Rugwiro Herve 4, Iragire Saidi 2, Eric Rutanga 3, Irambona Eric Gisa 17,
Nizeyimana Mirafa 8, Oumar Sidibe 9, Olokwei Commodole 11, Mugisha Gilbert 12,
Iranzi Jean Claude 21 na Michae Sarpong 19.
Abakinnyi 11 babanje mu kibuga ku ruhande rwa Rayon Sports
Bugesera XI: Kwizera
Janvier 1, Ishimwe Zappy 26, Ngarambe Jimmy Ibrahim 12, Bizimana Joe 6, Wilonja
Jacques 5, Muregenzi Rodrigue 7, Shaban Husein Tchabalala 10, Kibengo Jimmy 16,
Moustapha Francis 24, Peter Otema 17na Nzabanita David 8.
Abakinnyi 11 babanje mu kibuga ku ruhande rwa Bugesera FC
IMIKINO Y’UMUNSI WA KANE MURI SHAMPIYONA UKO YAGENZE YOSE
Ku cyumweru 20 Ukwakira
2019
Heroes FC 2-1 As Muhanga
FC
Musanze FC 1-1 Sc Kiyovu
Sunrise Fc 4-1 Espoir Fc
Gicumbi Fc 1-3 Mukura VS
Ku wa Kabiri 22 Ukwakira
2019
Rayon Sports 2-1 Bugesera
Fc
Gasogi United 0-0 Police
Fc
Marine Fc 1-2 APR FC
Ku wa Gatatu 23 Ukwakira
2019
Etincille FC vs AS Kigali
( stade Umuganda 15h00’)
Umwanditsi – SAFARI Garcon
– inyarwanda.com
TANGA IGITECYEREZO