Bikunze kugorana: Icyo imibare igaragaza mu mikino yahuje u Rwanda na Libya

Ikipe y’igihuigu y’u Rwanda "Amavubi" irakira Libya mu mukino wa Gatanu mu itsinda D mu gushaka itike yo kujya mu gikombe cya Afurika  cya 2025 kizabera mu gihugu cya Morocco.

Akenshi usanga biba bitoroshye iyo u Rwanda rwacakiranye na Libya mu marushanwa atandukanye. Nubwo biba bitoroshye ku Rwanda ku ruhande rwa Libya ho akazi ntabwo kaba gakomeye cyane kuko imibare igaragaza ko u Rwanda rudakunda gutsinda Libya.

Igihe u Rwanda ruheruka gukura intsinzi ikomeye kuri Libya hari muri 2014 aho umukino wabanje rwanganyije na Libya ubusa ku busa muri Tunisia, naho umukino wo kwishyura u Rwanda rutsinda Libya ibitego bitatu ku busa.

Mu minsi ya mbere ya 2014 nabwo ikipe y'igihugu ya Libya yakunze kuba inzozi mbi ku ikipe y'igihugu y'u Rwanda "Amavubi" no mu mikino ya gicuti, nta bucuti ikipe y'igihugu ya Libya yagaragaje.

Ku itariki 23 Gicuransi 2012, ikipe y'igihugu ya Libya yakiriye Amavubi mu mukino wa gicuti wabereye i Tunis muri Tunisia. Ni umukino warangiye Libya itsinze Amavubi 2-0.

Ku itariki 20 Werurwe 2013, i Kigali mu Rwanda hongeye kubera umukino wa gicuti wahuje Libya n'Amavubi, umukino nanone urangira Libya itsinze u Rwanda 1-0.

Ku itariki 18 Gicurasi i Rades muri Tunisia, ikipe y'igihugu ya Libya yari yakiriye u Rwanda mu marushanwa yo gushaka itike y'Igikombe cya Africa, umukino warangiye amakipe yombi anganyije Ubusa ku busa. Amavubi yari agiye kuva mu biganza bya Kassa Mbungo Andre akajya mu bya Stephen Constantine, ataha akubita agatoki ku kandi.

Ku itariki 31 Gicuransi 2014, Amavubi yakiriye Libya kuri Stade ya Kigali i Nyamirambo, ubu yitwa Kigali Pele Stadium. Uwo mukino warangiye u Rwanda rutsinze Libya ibitego bitatu ku busa, ibitego byatsinzwe na Daddy Birori. 

Ibyo bitego bya Daddy Birori, yabitsinze ku mipira ibiri yahawe na Ndahinduka Michael (Bugesera) n'umwe yahawe na Rusheshangoga Michel. Iyo ntsinzi ya 3-0 isa naho yahumuye ikipe y'igihugu ya Libya kuko Amavubi ntabwo arongera kuyitsinda.

Ku itariki 13 Ugushyingo 2015, Libya yongeye kwakira Amavubi i Tunis muri Tunisia, umukino wo gushaka itike y'Igikombe cy'Isi cyabereye mu Burusiya. Uwo mukino warangiye Libya itsinze Amavubi 1-0.

Ku itariki 17 Ugushyingo, Amavubi nibwo yakinnye umukino wo kwishyura, aho bari bazi ko Libya bongera kuyigiraho umupira, ariko ibyavuye mu mukino, bitandukanye n'ibyo bari biteze.

Uretse igitego kimwe u Rwanda rwatsinzwe cya Jacques Tuyisenge, Libya yo yinjije ibitego bitatu mu izamu ry'u Rwanda, umukino urangira ari ibitego bitatu bya Libya kuri kimwe cy'u Rwanda. Icyo gihe Libya yahise ikomeza mu cyiciro gikurikiyeho ku giteranyo cy'ibitego 4-1 cy'u Rwanda.

Ku itariki 7 ukuboza 2017, Libya yari yaratumiwe mu mikino ya CECAFA yabereye muri Tanzania, yarongeye icakirana n'u Rwanda, gusa kuri iyo nshuro ntabwo Libya yatinze u Rwanda, kuko umukino warangiye amakipe yombi yaguye miswi Ubusa ku busa.

Ku itariki 23 Mutarama, mu gace ka Angier mu gihugu cya Morocco, Libya yongeye gucakirana n'u Rwanda mu mukino wa nyuma mu matsinda ya CHAN yaberaga muri Morocco. U Rwanda rwasabwaga kunganya umukino rugakomeza muri kimwe cya Kane rufite amanota atanu, naho Libya igahita itaha ari iya gatatu n'amanota ane.

Iminota 90 y'umukino yarangiye u Rwanda rukinganya na Libya ubusa ku busa. Ikitazibagirana mu mitwe y'abanyarwanda, ni uko umukino wari wamaze kugera ku munota wa 90+6, habura amasegenda ngo urangire, nuko Libya ikabona igitego cyahise gituma Amavubi asezererwa muri CHAN.

Umukino uheruka guhuza ikipe y’igihugu y’u Rwanda Amavubi na Libya wari umukino wa mbere wo gushaka itike yo kujya mu gikombe cya Afurika  mu itsinda D, ni umukino wabereye mu gace ka Tripoli muri Libya, warangiye ibihugu byombi biguye miswi ku itariki 4 Nzeri 2024.

Kuri iyi nshuro noneho ikipe y'igihugu y'u Rwanda niyo irakira Libya kuri stade Amahoro mu mujyi wa Kigali. Kuri uyu wa Kane ku itariki 14 Ugushyingo 2024, Amavubi arakina umukino wa Gatanu mu majonjora yo gushaka itike yo gukina igikombe cya Africa AFCON ya 2025.

Ikipe y’igihugu y’u Rwanda irasabwa gutsinda uyu mukino wa Libya kugira ngo yuzuze amanota umunani, ikomeze guhagarara bwuma mu gushaka itike yo kujya mu gikombe cya Afurika. 

Ubwo ikipe y’igihugui y’u Rwanda "Amavubi" iraba icakirana na Libya I Kigali, i Cotonou muri Benin naho haraba hari gukinwa umukino karundura urahuza ikipe y’igihugu ya Benin na Nigeria.

Ikipe y'igiihugu y'u Rwanda, Amavubi, arakira Libya mu mukino udakunda kuyorohera

Amavubi arasabwa gutsinda Libya ubundi agategereza ibiva hagati ya  Benin na Nigeria n'uko azitwara i Lagos