Jojea Kwizera akomeje kubimariramo! Uko Abakinnyi b'Abanyarwanda bakina hanze bitwaye mu Cyumweru gishize

Nubwo mu bihugu byinshi, umwaka w'imikino wa 2023-24 washyizweho akadomo ariko hari aho ugikomeje gukinwa naho ahandi ukaba aribwo uri gushyirwaho akadomo.

Ku wa Gatandatu muri Kenya , ikipe ya AFC Leopards ikinamo Gitego Arthur yatsindaga ikipe ya Kariobangi Sharks ibitego 2-1 mu gushaka umwanya wa 3 w'igikombe cy'igihugu.

Muri uyu mukino wa nyuma w'iyi kipe muri uyu mwaka w'imikino, rutahizamu w'ikipe y'igihugu y'u Rwanda, Amavubi yari yabanje mu kibuga ndetse yewe akina iminota yose y'umukino.

Kuri uyu mukino kandi niho Gitego Arthur yaherewe igihembo cy'umukinnyi watsinze ibitego byinshi muri iri rushanwa aho yatsinze  5 .

Ku wa Kane w'icyumweru gishize ikipe ya Al Ta'awon SC yo muri Libya ikinamo Haruna Niyonzima yatsindwaga na Al Anwar ibitego 2-0 muri shampiyona. Ntabwo uyu mukinnyi w'Umunyarwanda yari yabanje mu kibuga ndetse yewe nta nubwo yari ku ntebe y'abasimbura.

Iyi kipe ya Al Ta'awon SC kugeza ubu iri ku mwanya wa 5 muri shampiyona. 

Muri shampiyona y'icyiciro cya Kabiri mu gihugu cya Sweden mu ikipe ya Sandkvens IF ikinamo Byiringiro League na Mukunzi Yannick,ku wa Gatandatu yatsindwaga na Degerfors ibitego 4-1.

Muri aba bakinnyi 2 b'Abanyarwanda nta n'umwe wabanjemo ndetse yewe nta n'umwe wari ku ntebe y'abasimbura.

Iyi kipe ya Sandkvens IF iri ku mwanya wa 4 muri shampiyona, ikazasubira mu kibuga tariki ya 13 z'uku kwezi ikina na Brage.

Tukiri muri shampiyona y'icyiciro cya kabiri muri Sweden mu ikipe ya Gefle IF ikinamo Rafael York,ku wa Gatanu yanganyaga na Brage ibitego 2-2.

Ntabwo uyu mukinnyi w'ikipe y'igihugu y'u Rwanda, Amavubi yari ari kuri uyu mukino bitewe n'ikibazo cy'imvune afite ariko biteganyijwe ko ku mukino ukurikiyeho azaba yagarutse.

Gefle IF kugeza ubu iri ku mwanya wa 14 muri shampiyona, ikaba izagaruka mu kibuga tariki ya 20 z'uku kwezi ikina na Trelleborg muri shampiyona.

Ikipe ya Kryvbas Kryvyi Rih yo muri shampiyona y'icyiciro cya mbere muri Ukraine ikinamo Bizimana Djihad,ku wa Gatanu yatsinze  iyitwa Inhulets ibitego 2-1 mu mukino wa gicuti utegura shampiyona itaha.

Muri uyu mukino, Bizimana Djihad yari yabanje mu kibuga gusa aza gusimbuzwa. Kryvbas Kryvyi Rih izongera gukina undi mukino wa gicuti ku wa Gatandatu w'iki Cyumweru ihura n'iyitwa FC Dinamo București.

Muri shampiyona y'icyiciro cya Kabiri muri Norway,ku wa Gatandatu ikipe ya FK Jerv ikinamo Mutsinzi Ange yatsinze  Notodden igitego 1-0.

Muri uyu mukino uyu myugariro w'Amavubi yari yabanje mu kibuga ndetse anawurangiza adasimbujwe. FK Jerv kuri ubu niyo iyoboye urutonde rwa shampiyona, ikaba izasubira mu kibuga ikina na Sotra SK tariki ya 16 z'uku kwezi.

Ku wa Kane w'icyumweru gishize muri shampiyona y'icyiciro cya kabiri muri Leta Zunze Ubumwe za Amerika, mu ikipe ya Rhode Island ikinamo Kwizera Jojea yatsindaga Locomotive ibitego 3-0.

Muri uyu mukino uyu mukinnyi w'Umunyarwanda yari yabanje mu kibuga ndetse yewe aza gutsinda igitego ku munota wa 27, anatanga umupira wakivuyemo gusa aza gusimbuzwa ku munota wa 80.

Mu mikino iteganyijwe muri iki Cyumweru:

Uyu munsi ku wa Mbere ikipe ya AS Far Rabat ikinamo Imanishimwe Emmanuel Manguende irakina na Raja CA ku mukino wa nyuma w'igikombe cy'igihugu,ku wa Gatatu ikipe ya Al Ahly Tripoli ikinamo Manzi Thierry izacakirana na Al Madina muri shampiyona.