Thiago Silva yasubiye mu ikipe y'iwabo muri Brazil

Kuri uyu wa Kabiri ni bwo iyi kipe ibinyujije ku mbuga nkoranyambaga zayo yabitangaje ko uyu mukinnyi w'imyaka 38 yayisubiyemo.

Ibi bibaye nyuma yuko mu kwezi kwashize ari bwo Thiago Silva yari yashyize hanze amashusho arimo amarangamutima avuga ko atazakomenya na Chelsea nyuma y'uyu mwaka w'imikino ubwo amasezerano ye azaba arangiye.

Uyu mukinnyi ukina nka myugariro wo hagati yari yarageze mu ikipe ya Chelsea muri 2020. Muri iyi myaka 4 yari amazemo, yayifashije kwegukana igikombe 1 cya UEFA Champions League, icya UEFA Super Cup n'igikombe cy'Isi cy'amakipe (Clubs).

Mbere yo kwerekeza muri iyi kipe yo mu Bwongereza, yakinaraga Paris Saint-Germain yari yaragezemo muri 2012 avuye muri AC Milan yo yari yaragezemo muri 2009.

Guhera muri 2006 kugeza muri 2009 ni bwo Thiago Silva yakiniye Fluminense y'iwabo muri Brazil ubwo akaba ayisubiyemo nyuma y'imyaka 14.

Muri rusange uyu myugariro w'ikipe y'igihugu asubiye mu ikipe y'iwabo yasinyemo amasezerano azamugeza muri 2026 amaze kwegukana ibikombe 30 ku mugabane w'Iburayi mu makipe 3 yanyuzemo.

Thiago Silva yasubiye mu ikipe ya Fluminense 

Thiago Silva yafashije Chelsea kwegukana igikombe cya UEFA Champions League ya 2020-21