Etoile de L'Est yakangutse ibiryo bihiye, yakora igisa n'amateka mu Rwanda?

Harabura umunsi umwe umwe gusa ngo shampiyona y'icyiciro cya mbere mu Rwanda umwaka w'imikino 2023-24 ugere ku musozo, aho intambara ari yose ku makipe ari inyuma. Kuri ubu shampiyona isa n'aho iri gukinwa yicuritse kuko ibyo guhatanira igikombe byavuyeho, ahubwo ubu hari intambara y'amakipe arwana no kutamanuka.

Nyuma yaho APR FC yegukaniye igikombe cya shampiyona hakibura iminsi bitandukanye n'uko byari bimeze mu myaka itatu itambutse, kuri ubu shampiyona igeze ku munsi wa nyuma mu makipe abiri amanuka mu cyiciro cya kabiri nta nimwe irakatirwa. 

Mu mikino yo ku munsi wa 29 wa shampiyona, yasize ikipe ya Etincelles FC Gorilla FC, Etoile de L'Est Bugesera FC na Sunrise FC arizo zizishakamo ikipe 2 zizakina icyiciro cya kabiri umwaka utaha.

Etincelles FC iri ku mwanya wa 12 n'amanota 32, Gorilla FC ku mwanya wa 13 n'amanota 32, Etoile de L'Est ku mwanya wa 14 n'amanota 31 Bugesera ku mwanya wa 15 n'amanota 29, naho Sunrise FC iza ku mwanya wa nyuma n'amanota 29.

Byagenze gute ngo bigere ku munsi wa nyuma wa shampiyona nta kipe iramanuka?

Kuva shampiyona y'icyiciro cya mbere mu Rwanda yagirwa n'amakipe 16, ni ubwa mbere bigeze ku munsi wa nyuma nibura nta kipe n'imwe iramanuka mu cyiciro cya kabiri.

Ubusanzwe muri shampiyona wasangaga hari ikipe ifite intege nke ndetse bisa n'aho shampiyona yayisize, ku buryo yageraga ku munsi wa 26 yaramaze kwiyakira ko izakina icyiciro cya kabiri.

Uyu mwaka rero ntabwo ariko byagenze kuko amakipe yo mu cyiciro cy'inyuma yasaga n'aho anganya ubushobozi ndetse agakina wagira ngo arimo kurinda, aha twavuga amakipe ane ari mu myanya ya nyuma.

Ikipe ya Etoile de L'Est yasaga naho ariyo ifite imibare myinshi iyicurika mu cyiciro cya kabiri, ariko ubu aho bigeze nayo ifite urufunguzo rwo kuguma mu cyiciro cya mbere.

Etoile ifite umukino wa nyuma izakinamo na Bugesera FC, yawutsinda ikaguma mu cyiciro cya mbere 

Mu minsi 29 ya shampiyona imaze gukinwa, ikipe ya Etoile de L'Est yabaye iya nyuma (16) inshuro 19 zose, iyi kipe kandi inshuro 7 gusa nizo itari mu makipe yamanuka mu cyiciro cya kabiri. Etoile de L'Est ubu iri ku mwanya wa 14, ikaba yaherukaga kuba mu makipe atamanuka mu cyiciro cya kabiri ku munsi wa 10 wa shampiyona.

Habaye iki ngo Etoile de L'Est yisange mu makipe atamanuka mu cyiciro cya mbere

Etoile de L'Est ni imwe mu makipe meza mu mikino yo kwishyura. Iyi kipe mu mikino 10 iheruka gukina iri ku mwanya wa 3 n'amanota 18 ikaba irushwa na APR FC na Rayon Sports. Mu mikino 5 iheruka, Etoile de L'Est iri ku mwanya wa 2 ku rutonde rwa shampiyona kuko mu manota 15 ifitemo amanota 12 irushanwa inota rimwe gusa na Rayon Sports ya mbere.

Ikipe ya Etoile de L'Est yasoje imikino ibanza ya shampiyona ifite amanota 10 ubu ikaba ifite amanota 31, bivuze ko imaze gukorera amanota 21 habura umukino umwe, amanota yikubye kabiri ayo yabonye mu mikino ibanza.

Etoile de L'Est ishobora gukora ibisa n'amateka, Bugesera FC na Sunrise FC zikajyana

Kuva COVID-19 yagera ku Isi, nta kipe iratsinda nibura imikino 4 ya shampiyona mu mikino yo kwishyura ngo imanuke mu cyiciro cya kabiri. Usibye Police FC imaze gutsinda imikino 2 gusa mu mikino yo kwishyura ndetse ikaba iri ku mwanya wa nyuma mu mikino yo kwishyura, Sunrise FC imaze gutsinda imikino 2 Bugesera FC nayo ikaba imaze gutsinda imikino 3.

Sadick Sulley yinjiye mu kibuga asimbuye atsinda ibitego 2, mu mukino baheruka gutsindamo Police FC. Sadick yageze muri Etoile mu mikino yo kwishyura 

Turebye ku mwanya yatambutse, mu mwaka wa 2021-22 Hamanutse ikipe ya Gicumbi FC na Etoile de L'Est, icyo gihe Gicumbi FC nta mukino n'umwe yatsinze mu mikino yo kwishyura, mu gihe Etoile de L'Est yari yatsinze ibiri.

Mu mwaka uheruka, hamanutse ikipe ya Espoir FC na Rutsiro FC. Ikipe ya Espoir FC yari yatsinze imikino 3 gusa mu mikino yo kwishyura, mu gihe yari yatsinze 5.

Urugamba rwo ku munsi wa nyuma wa shampiyona

Ku munsi wa nyuma ikipe ya Etoile de L'Est izakira Bugesera FC. Aya makipe Etoile de L'Est n'itsinda Bugesera izaba yizeye kuguma mu cyiciro cya mbere nta mananiza. 

Bugesera FC nayo n'itsinda Etoile de L'Est izaba yizeye kuguma mu cyiciro cya mbere cyereka Sunrise FC yatsinze Marine FC ibitego biranga 10, bituma ibyago byinshi bisanga ikipe ya Sunrise FC na Bugesera FC kuba zakina icyiciro cya kabiri.

Bugesera FC irasabwa gutsindira Etoile i Ngoma ubundi ikizera kuguma mu cyiciro cya mbere 

Sunrise FC ishobora gusubira mu cyiciro cya kabiri iherukamo muri Covid -19